日本處處都有溫泉，草津溫泉、有馬溫泉等都係好出名嘅溫泉區。我今次介紹嘅大町溫泉鄉地處日本最著名嘅立山黑部阿爾卑斯山脈旅遊路線長野縣一側嘅山口，係立山黑部阿爾卑斯山脈路線嘅起點或終點，亦係必經之地，可遠眺立山山脈，距離黑部水庫只係30分鐘車程。即使係夏天去，涼浸浸嘅天氣好適合浸溫泉。 遊覽完立山黑部阿爾卑斯山脈路線，我哋當晚就喺長野縣大町市住一晚，好好休息。大町市有個大町溫泉鄉 （Omachi Onsenkyo），我覺得遊覽完立山黑部可以浸溫泉一定好正，加上好鍾意大町溫泉鄉呢個名，所以就嚟呢度住。 喺長野縣呢度好少見到長野呢個名稱，反而會經常見到信州呢個名。其實信州係長野嘅古稱，長野縣位於本州中部，位於中央高地上，係日本八個內陸縣份之一，面積係全日本第四大。由奈良時代起到明治被被分為十郡，成為令制國中嘅信濃國，所以一般大眾以及旅行業者也都稱呢度為信州或信越（信濃與越後）。 大町溫泉（Omachi Onsen）又稱“信州大町溫泉”，係日本長野縣著名溫泉，位於鹿島川河畔。大町溫泉開發始於1964年（昭和39年），地下泉水源自立山、黑部山脈，經葛溫泉由大町引出，平成7年後又不斷開發新泉口，水量豐富，形成了現在嘅大町溫泉鄉。 大町溫泉周圍群山峻嶺，是位於恬靜自然之中嘅溫泉鄉。 大町溫泉鄉只有大概有15間旅館，對於有選擇困難症嘅我，揀咗好耐，終於揀到綠翠亭 景水係符合晒我呢個麻煩人嘅所有要求。 一如門口就見到歡迎牌上寫咗今日入住嘅客人名稱，當然亦有我份啦！好明顯見到得我哋一組外國客人。不過最搞笑係竟然見到有人姓「竹重」囉！ 喺旅館玄關旁邊係景水名泉－「延命の泉」，「延命の泉」湧出嚟嘅泉水就係立山黑部流到大町嘅天然地下水。由於旅館希望客人健康長壽，好似泉水源源不絕，所以命名為「延命の泉」。 旅館從外到內都充滿日式風情。我哋喺Reception辦理完check in手續，專門負責接待我哋嘅旅館人員就帶我哋去房間。旅館人員係位能夠講流利英文嘅菲律賓籍女士，由於嫁咗俾日本老公，所以就嚟咗日本生活。一見到我哋就同我哋道歉，原來除咗佢之外，仲有位女將負責招待我哋，由於佢安排緊我哋嘅晚餐，所以未可以抽身同我哋打招呼。 綠翠亭 景水分咗3個館：蔵の館 紫／薫風の館 茜／湯楽の館 翠 喺Lobby旁邊嘅兩個電梯係去蔵の館 紫同薫風の館 茜呢兩個館。呢兩個館嘅房係冇私人風呂，價錢相對嚟講會平D。 而我哋住喺另一棟湯楽の館 翠 「湯楽の館 翠」有個好雅致嘅休息室「花苑」，大家可以嚟呢度上網，因為全館只有呢度提供Wi-Fi 「花苑」外面就係足湯－「楽座の湯」，室外氣溫只有16度，超級適合泡湯～ 客人可以喺度浸下腳，好好休息下，欣賞一下呢個咁靚嘅日式庭院。 綠翠亭 景水全館只有8間房內擁有私人風呂，全部位於湯楽の館 翠，另外有部電梯上房。 由於我預訂咗有私人風呂嘅房間，所以住喺湯楽の館 翠。 我哋住喺6樓月見の階「仲秋」，房間內有私人展望露天風呂「月の湯」。 一入房間，左邊喺玄關，右邊係洗手間。 一入到房間就見到嘅行李已經送到上房喇！我哋間房係尾房，呢樣我完全係無所謂，因為頭／尾兩間房一般會多D窗，而且相對比較安靜。當然，景水嘅客人好有質素，安靜到我以為只有我哋住喺呢一層。 住得溫泉旅館一定要住和式房間！超鍾意間房！第一當然係夠大（13榻），大家見到相中房間內鋪咗一塊塊嘅榻榻米，13榻即係有鋪咗13塊榻榻米，冇鋪榻榻米嘅地方係唔會計算在內！第二就係房間夠新、夠乾淨。第三就係真係好和式，門窗真係用和紙做。所以千挑細選真係好重要，我哋都好滿意！ 千岐咪睇小一間榻榻米房間，其實「大和文化」嘅縮影盡在其中。如果大家去到和室，有D禮儀大家係一定要遵守嘅！ 1. 喺和室內，「床の間（とこのま）：擺飾掛軸・陶器・插花等飾品嘅空間，係和室裡最神聖嘅空間。（即係上面張相鋪咗綠色布嗰度。大家亦唔好喺嗰度擺放任何嘢！） 「床の間」前面嘅喺座位係「上座」，簡單嚟講就係離門口最遠嘅座位。「上座（かみざ）」係俾最年長嘅長輩或最高職位者嘅座位。「下座」係離入口最近嘅座位，「下座（しもざ）」係俾晩輩或最低職位者嘅座位。分辨上下座位係首要禮儀，如果先抵達了，大家都還沒到，此時要坐在最末席等待。 2. 喺榻榻米上行走要注意，盡量滑步不要踏步，而且唔好踩榻榻米嘅鑲邊布。 相信大家都知道日本嘅溫泉旅館出晒名服務好，綠翠亭 景水嘅服務簡直好到無可挑剔！我哋一入到房就即刻沖茶俾我哋飲，向我哋講解館內同房內設施，同向我哋查詢食晚飯時間。 房間內有間好大嘅更衣室，同私人露天風呂係連住，方便大家浸完浴可以整理。大家可以放心，只要拉上紙趟門，風呂就完全係獨立空間，可以一個人舒舒服服泡湯。 跟住落嚟當然就係睇下我哋房內嘅私人露天風呂。風呂喺信楽焼，信楽焼喺日本一種好出名嘅陶器。風呂用散發住木頭嘅香味，感覺好正。仲有就係話明係展望露天風呂「月の湯」，一望出去就係鹿島川，而且可以推開整排窗欣賞景色。 已經唔記得從幾時開始鍾意泡湯，即係浸溫泉，有D人可能覺得泡湯係上咗年紀或者係老人家先鍾意，實在太舒服喇，我相信只要浸過第一次後就一定會愛上。 於是我哋係食飯前就好好享受房間內嘅私人風呂。大家唔好以為個風呂好細，浸咗落去先知原來好大、好深。真係超級舒服！気持ち！ 浸完溫泉當然要換番一身浴衣啦！如果唔識可以請旅館人員幫手，我就梗係自己搞掂啦！ 食完飯，外面開始落雨，令氣溫降到12度左右，咁清涼，浸溫泉一流！ 不過，食飽最好唔好即刻沖涼同泡湯，所以就去咗浸足湯。 旅館足湯會提供座墊同毛巾俾大家使用。 竟然冇人嚟浸足湯，於是我哋可以一路浸腳，一路 girl's talk ~ 番到房間，就見到旅館人員已經幫我哋鋪好床鋪。仲沖定熱茶俾我哋飲，超級貼心！老實講，真心覺得呢度係我成世女到亦家為止瞓過最舒服嘅床鋪。 休息咗一輪，我就決定去大浴場泡湯。 旅館有兩個大浴場－「高瀬の湯」同 「清音の湯」，分成男女湯。日本溫泉旅館一般最少都有兩個浴場作為男女湯，每日最少交換一次，等客人可以浸到晒唔同嘅大浴場。呢種做法喺一般溫泉旅館係非常普遍。 旅館大浴場開放時間係 15:00～24:00／5:30～9:30 當日下午至午夜，「清音の湯」係女湯，而「高瀬の湯」就係男湯。而到第二日朝早就會交換，「高瀬の湯」變成女湯，「清音の湯」變成男湯。 如果大家有任何問題，一定要向入住嗰間旅館查詢清楚，入錯咗大浴場就大件事喇！因為有 d溫泉旅館只會派人告知住客或者將旅館information放喺房間內俾客人睇，而唔會喺大浴場外有任何標示，所以大家一定要好小心。 泡湯前將衣物同隨身物件放喺更衣室內。由於大浴場係要裸浸，個人係接受到裸浸（如果只有我同朋友），所以特登揀無人浸嘅時間先去。不過好友未浸過溫泉，決定留喺房度慢慢浸，好幸運可以俾我包場，一個人獨霸成個女湯。不過由於燈光好暗，得我一個都驚驚哋！ 「清音の湯」一共有3個溫泉池同一間桑拿房。其中兩個溫泉喺室內，一個係露天溫泉。 綠翠亭 景水嘅溫泉泉質屬於単純温泉（弱鹼性低張性高溫泉），透明無色無味無臭。呢種溫泉有改善神經痛、肌肉痛、關節痛、關節炎、腸胃病、婦女病、寒症、疲勞、麻痺等症狀嘅功效。 呢個有水力按摩功能嘅溫泉池真係好正，浸完成個人都放鬆晒，勁relax！ 露天風呂やまぶき上面雖然有個木亭，但並冇將整個風呂遮晒。從室內大浴場到露天風呂，只係隔住度玻璃門，赤裸裸行出去只有大概12度嘅室外，仲要外面落住微雨，雖然只係幾步冇嘢遮住，但真係夠晒凍！ 不過泡湯一定要浸露天風呂先有泡湯feel！所以點都一定要浸！因為一浸番落溫泉，簡直覺得舒服到從人間升上天堂。身體被溫泉水擁抱，雨絲會落喺肩膊上，形成強烈嘅對比。一邊聽住流水聲、風聲、雨聲，一邊望住雨絲落喺植物嘅葉上，再喺溫泉上形成一圈圈漣漪，完全好似置身於仙境一樣。 喺大浴場內有齊大家需要嘅清潔同基本用品，方便泡完湯可以使用。 泡湯完畢記得要補充水分！！！ 泡完湯會擁有非常放鬆、非常舒服嘅睡眠時間～ 第2日由5:30－9:30am「高瀬の湯」同 「清音の湯」就會交換使用。「高瀬の湯」變成女湯，「清音の湯」變成男湯。 由於我揀大家去食早餐時間去浸，於是又再一次包起成個「高瀬の湯」大浴場。 「高瀬の湯」內只有一個室內大浴場同一個露天風呂！ 露天風呂 さんすい 係旅館露天風呂會見到小石碑，石碑上刻住一對男女，代表日本神祇「道祖神」，保佑信徒五穀豐收、無病息災、子孫繁盛等。（聽聞過浸溫泉會特別容易受孕，唔知係溫泉嘅功效，定係咪拜咗道祖神呢？） 道祖神以前喺路邊常見，一般出現喺聚落或村莊中心，或者村內外分叉路，現今已經非常罕見。但喺長野縣安曇野境內大約有4百座石像道祖神，以市町村單位計算係全日本第一！ 緑翠亭 景水 北の安曇野・立山・黒部アルペンルート／信州大町温泉郷 緑翠亭景水 website： http://www.keisui.jp/index.php address： 〒398-0001 長野県大町市平2884-13
