期間限定！The Peninsula Hotel X Tiffany & Co. （New York Spirit）Afternoon Tea 好多人都知，食tea文化係由英國人最先開始。以前英國人習慣只係食午餐同晚餐，而晚飯時間一般係晚上8、9點。相傳喺19世紀，百福公爵Anna Maria Russell (Duchess of Bedford) 喺午餐同晚餐之間覺得肚餓，於是諗到喺下午4時飲杯茶、食件cake或三文治醫下肚，之後仲請埋幾個好姐妹一齊傾計開party，所以叫做「Afternoon Tea」。 而大家經常聽到嘅High Tea並唔係指「好High Class嘅Tea」，High Tea嘅意思係講緊以前勞動階層(working class)放工後5時至7時在高檯上食一餐，通常有肉類、魚、菜、焗豆等食物，講到尾其實係草根式便飯。而貴族根本係唔會食High Tea。 所以High Tea完全唔關Afternoon Tea事，千岐咪搞錯啊！唔係講出嚟會笑死人㗎！傳統上，afternoon tea呢種貴族玩意都喺低桌 (low table) 進行，或者大家坐喺梳化上舒舒服服嘆茶，所以又有「Low Tea」嘅說法。 香港半島酒店與Tiffany & Co.將於6-8月期間合作推出「紐約神韻」（New York Spirit），以Tiffany & Co.作為主題嘅特色下午茶，絕對係半島酒店經典下午茶嘅華麗變奏！可以喺酒店大堂茶座悠閒享受下午茶，絕對係今個夏日嘅最有吸引力嘅Afternoon Tea ! 由於妹妹係6月生日，再加上我哋都超鍾意食tea，所以New York Spirit呢個期間限定嘅Afternoon Tea啱晒我哋！ Peninsula係全港我最鍾意去食tea嘅酒店。第一係Peninsula嘅Afternoon Tea係最傳統，第二係真心覺得食物係最好食，第三係環境同服務都係非常好。 而最好亦係最唔好嘅一點就係要排隊，最唔好當然就係冇得預約要排隊，最好就係好公平、人人想食都要排。週末嚟親閒閒地都排2個鐘，所以今次特登揀咗平日嚟試今次期間限定嘅tea set。 The Lobby由下午2點開始提供下午茶，我哋2點前就嚟到排隊，都等咗1個鐘先位。難得唔使揀食咩，啱晒我呢個選擇困難症患者～但淨係揀飲品都難！ 我哋當然係叫期間限定嘅The Peninsula Hotel X Tiffany & Co. （New York Spirit）Afternoon Tea 啦！除咗半島酒店出品嘅經典英式鬆餅外，當然仲有Tiffany Blue嘅超靚甜點。 今次兩大品牌crossover，原來背後係有故事嘅。Tiffany & Co.喺香港第一間專門店就係喺1988年開設喺香港半島酒店商場，6年後特別為半島酒店獨家設計咗一款瓷器套裝，咁啱慶祝酒店新翼落成。呢款瓷器套裝依然沿用至今，大家有去過半島食tea就一定見過用過。瓷器以米白為主色調，配深藍同金邊嘅設計，高貴典雅，與酒店大堂茶座佈置非常配合。 好啦！我哋嘅tea set送到嚟喇！正式嘅下午茶點心係放置喺一座「三層茶架」（Three-Tier Petit Four Stand）： 第一層（底層）放三明治等鹹點（tea sandwich），第二層（中間層）係英式傳統鬆餅（scone），第三層（最上層）就小蛋糕、水果塔等甜點。 由於半島酒店出品嘅scone實在太出名喇，放喺最底一層完全可以理解嘅！ 「紐約神韻」下午茶包含咗半島酒店最受歡迎嘅鹹甜點。 有朋友可能唔知三層架上面咁多點心應該食邊樣先！其實大家係應該按住由鹹至甜、由淡到濃咁嘅次序慢慢享用。 （建議根據呢個順序進食） Tea sandwich有4款（由左至右）：青瓜三文治、香草煙三文魚bagel、燻牛肉酸瓜三文治、蘑菇脆撻 青瓜三文治：雖然簡單，但好好食 香草煙三文魚bagel：中間嘅cream cheese為成個bagel畫龍點睛，4款中我最鍾意 燻牛肉酸瓜三文治：聽講過半島嘅咖喱包好味，但我每次都緣慳一面，今次終於試到，真係好好味 蘑菇脆撻：本人對菌類敏感，所以唔食得。而勁愛菇菌類嘅兩個妹都超鍾意，話菇味勁rich 跟住當然就係食半島酒店名氣十足嘅scone，配埋奶油忌廉同有機草莓jam，perfect！食咗咁多年半島嘅scone，雖然外形上有改變，但味道同質感仍然能夠保持水準。有試過半島scone嘅朋友應該會認同呢度出品嘅scone係全港最好食！ 講到最吸引眼球嘅，當然就係茶點銀架最上層嘅Tiffany Blue甜點 （由左至右）：青檸椰子cupcake , Tiffany Signature Blue Box , New York cheesecake , Vanilla macaron 青檸椰子cupcake : cupcake上面灑上白色、藍色珠，cream好light，即使有椰絲都唔會好甜。cupcake質感好好，連平時唔好cupcake嘅我都勁鍾意，充滿驚喜地覺得好味。 Tiffany Signature Blue Box：擁有Tiffany Blue Box嘅外形，內裏係雲喱拿cream藍莓jam加上杏仁海綿蛋糕。由於外面係糖皮，如果連埋一起食會甜爆，所以唯有忍心d ！（小插曲：由於其中一個嘅糖皮做得冇咁好，所以好快就溶，搞到一定要連住食，甜到爆！我就決定將另一個拎走，但經理請我唔好帶走，食埋先，因為話會溶，整到其他食物係糖皮。於是唯有硬住頭皮食，好彩另一個嘅糖皮係可以俾我挑起，我先可以食到。） New York cheesecake： cheesecake係好味嘅，原本cheese同檸檬都酸酸地，可以中和下甜味，餅底亦做得好，但兩邊嘅牛油酥餅勁甜，食起嚟個質感唔多好，唔脆、淋淋哋咁，唔鍾意。 Vanilla macaron：又一Tiffany Blue甜品，用咗馬達加斯加雲喱拿嚟整， macaron上面仲用咗銀箔點綴。齋睇係好賞心悅目嘅，但一食就即刻後悔，因為原本個macaron就已經甜到嘔，仲要加埋我唔食嘅白朱古力，食完甜到死咗！ 最後喺埋單後，酒店會送上一份小禮物：由舊年奪得「最佳比利時朱古力大師」殊榮嘅半島酒店朱古力大師郭萬亨手工製作嘅精品朱古力－忌廉黑朱古力！上面仲裝飾咗一塊印有大堂茶座天花滴水獸圖案嘅白朱古力薄片。 半島嘅朱古力我一直都好鍾意食，呢款忌廉黑朱古力真係勁好味，超軟滑，唔太甜 （白朱古力薄片我冇食），好彩下午茶係由忌廉黑朱古力作結，而唔係由嗰個甜到喪心病狂嘅macaron作結，否則心情一定變會差！ 半島酒店嘅service真喺超好、超細心，我妹叫咗Earl Grey飲，從壺茶嚟到檯上面，直至我哋走，壺茶都係keep住有水，同埋係熱嘅。每一次加水都好安靜、有禮貌，唔會打擾到客人。當我話想要冰，經理即刻好醒目話幫我拎杯ice tea去加冰。 唔係要過分殷勤熱情，當然亦唔可以冷漠無禮，能夠做到不卑不亢、專業、有禮咁服務客人，老實講，宜家喺香港有咁好服務質素嘅地方真係唔多，而半島酒店就係做得到！咁樣先真係擁有食Afternoon Tea嘅感覺同待遇。 「紐約神韻」下午茶每位358港元*、兩位628港元* （*另收加一服務費） 有效期：2016年6月1日至8月31日 網址：http://hongkong.peninsula.com/zh/special-offers/tiffany-afternoon-tea
