立山黑部一日遊（1）－立山黑部玄關「立山站」＋日本第一落差嘅「稱名瀑布」＋美女平「天堂之道」 立山黑部係日本最熱門嘅登山勝地之一，全段位於中部山嶽國立公園內。擁有珍貴嘅冰河地形、奇特嘅火山景觀和豐富嘅高原生態。以前因為山勢險峻難以親近，只有專家先可以登頂，所以素有「日本最後秘境」之稱。 直到二戰之後，為咗修建黑部水庫開通咗由鐵路運輸、纜索鐵路、公共汽車、無軌電車和索道等，多種交通工具串連而成嘅立山黑部「阿爾卑斯山脈路線」，並喺水庫建造完成後對大眾開放，大家終於有機會可以一窺神秘雄壯嘅北阿爾卑斯四季之美。 （立山黑部交通工具可參考：立山黑部「阿爾卑斯山脈路線」優惠套票點揀好？！） 喺富山市住咗一晚，第二日我哋就要出發去立山黑部啦！整個旅程－「立山黑部阿爾卑斯路線」就靠晒呢張pass！ 出發前，有件好重要嘅事一定要做，就係寄運行李喇！ 由於立山黑部「阿爾卑斯山脈路線」規定咗唔可以自己攞行李（不過咁鬼重，應該都唔會有人咁聰明自己攞掛），就連自駕遊嘅朋友都要托運架車，會有專人幫你運送，所以絕大部分人嚟立山黑部玩都係坐立山黑部7種交通工具。 （立山黑部7種交通工具可參考：立山黑部「阿爾卑斯山脈路線」優惠套票點揀好？！） 不過大家一定要留意！記得係喺電鐵富山站內寄運行李，每件行李¥1230。而寄運嘅時間只會去到9:30am，過咗時間我唔知會點，真係幫你唔到喇！行李會送去JR信濃大町站旁邊嘅阿爾卑斯羅曼館或者係送到大町溫泉旅館。 送去JR信濃大町站嘅行李最早要1500、最遲1830攞番，而送去大町溫泉旅館就要1600喇！ 我哋是晚係會住喺大町溫泉鄉，所以行李係會直接送到下榻旅館。記得要講清楚送去邊間旅館，搞錯咗都係唔知點算好！ 有張Pass之外，當你正式遊覽立山黑部，電鐵富山嘅職員亦會令外俾一張乘車整理券。 要到立山黑部首先要由富山搭電鐵去到立山站。 到達電鐵立山站後，要行大概5mins先可以去到搭立山黑部第一種交通工具－立山登山纜車。 喺立山黑部地區隨處可以見到呢d因為開發工程所帶嚟嘅景色。 過去為了興建黑部水壩而開闢嘅阿爾卑斯山脈路線，全線起於富山縣立山站，到終點長野縣扇澤站，總長90公里。 立山駛標高475公尺，係阿爾卑斯山脈路線其中一個入口。 嚟到立山登山纜車站，呢個係站外廣場。 喺立山黑部地區有好多湧水，其中之一係位於立山站外嘅「熊王の水」。 「熊王の水」嘅水質超好，d水超冰涼清甜。大家可以學下日本人，帶個吉樽嚟入水飲。就連附近嘅人都係嚟呢度攞水飲，當日見到有個大叔攞住兩個膠桶特登嚟攞水。就連隔離車站嘅司機都係飲呢d水。 好多人嚟到立山站都會直接去搭登山纜車。而我就選擇先去比較少人去嘅稱名瀑布（称名滝）。 喺立山纜車站外就見到有巴士站去稱名瀑布。通往稱名瀑布車次並唔多，大概一個鐘頭一班車，所以想要去就要好好把握時間。 前往稱名瀑布嘅巴士車費每人單程¥500， Pass係唔包嘅，所以需要另外俾錢。當日無其他人去稱名瀑布玩，於是我哋又包起成架車。 15mins後就嚟到總站－稱名平休憩所嘅停車場。休憩所內有一個小小嘅展覽廳介紹稱名瀑布。 好喇！係時候要從稱名平休憩所出發去稱名瀑布喇！ 係啊！要去稱名瀑布係要行㗎！不過唔使行30mins，我哋大概行咗20mins就到。 行咗一半，就會嚟到行人專用道路。繼續向上行就啱㗎喇！ 行行下就見到有老師帶住班鴨仔團，啱啱去完稱名瀑布。 雖然係上山路，但唔斜嘅，好易行。再加上立山好涼爽，唔怕行到一身汗。 行到嚟呢度開始感覺到瀑布嘅水氣！係真㗎！雖然喺千米之外，但四周圍都俾水霧包圍，可以想像到瀑布嘅水勢幾勁、水量幾多～ 已經見到喺遠處嘅稱名橋喇！ 終於嚟到日本第一落差嘅稱名瀑布！ 稱名橋下嘅稱名川 稱名瀑布（称名滝）係一個由四個階段所構成日本第一落差瀑布（第1段70m、第2段58m、第3段96m、及第4段126m），高低落差達到 350 米，係日本其中一個天然之成嘅巨型藝術傑作，榮獲日本國家名勝，被指定為日本天然紀念物，雄踞日本國內眾多瀑布嘅第一位。雄偉壯麗嘅景色，令稱名瀑布入選成為日本百大名瀑之一。 稱名瀑布嘅水源源自立山主峰－雄山，近距離企喺日本第一落差嘅稱名瀑布下面，先可以體會到瀑布磅礡嘅氣勢。 每年4月至6月期間，春季嘅立山連峰積雪融化成水，經過弥陀ヶ原流落嚟，稱名瀑布右邊會出現另一個落差高達 500 米的夢幻瀑布－榛木瀑布（ネハンの滝）。由於榛木瀑布係期間限定，所以唔可以計入落差最高嘅排行榜。 當天氣回暖，融雪令水量更進一步增加時，喺榛木瀑布右邊更加會出現多一條瀑布添，咁就會遇見3個瀑布並排出現嘅稀奇情景。 我嚟到時，榛木瀑布已經水量唔多，不過好彩依然可以清楚見到，遲D就真係睇唔到。 稱名瀑布展望台隔離仲有殘留巨型冰塊。 從展望台望落稱名橋與稱名川～又見到好靚嘅Tiffany Blue川流 臨離開稱名瀑布時竟然俾我見到彩虹！唔知大家有冇我咁眼利見到Tiffany Blue流水上嘅彩虹呢？！真係好靚啊～ 跟住我哋行番落稱名平搭車返番立山站，再次包車。 由立山站搭登山纜車去美女平。 從立山站乘坐纜車前往美女平，從車窗相外望，可以眺望立山主峰雄山，北阿爾卑斯山嘅美景一一呈現眼前。 抵達美女平站，然後就轉乘立山高原巴士到大家想去嘅地點。好似我哋會去弥陀ヶ原，就去排嗰條隊上巴士。記得去返啱嘅站牌上車！！！ 美女平之名嚟自傳說中矗立超過千年嘅神木-美女杉。1300年前一個美麗少女定許終身嘅情人係開拓立山嘅一員，少女為見情郎而登山， 卻因女性禁止入山嘅禁忌被迫落山。落山途中少女向一棵杉樹許願，最後少女如願與情人結為連理。從此嗰棵杉樹被稱為「美女杉」，嗰個地方就被稱為「美女平」。 美女平入選日本全國森林浴百選，喺呢片廣大原生森林隨處可見唔同嘅山野草、櫸木、樺樹、大杉等日本原生植物。 車上途經會有廣播介紹，司機亦會慢駛配合，等大家可以影下相。 巴士一直沿著美女平天空ロード（天空道）嚟到滝見台。 滝見台係睇咩？咪就係從高處睇稱名瀑布（称名滝）囉！又係另一種感覺！強烈建議大家先喺下面睇完，再上嚟睇。 建議大家上車最好揀右邊較前嘅座位，景色集中喺嗰邊，想影靚相都容易D～ 終於嚟到弥陀ヶ原。弥陀ヶ原車站就係喺弥陀ヶ原ホテル（彌陀原旅館）外面。落車時就會有車站職員會問你之後想搭邊一班高原巴士去室堂，佢會幫手預約你想搭嗰班往室堂嘅巴士，所以要先估計一下會喺彌陀原停留嘅時間。 已經到咗lunch time，梗係要食番d好嘢啦！由於室堂嘅餐廳唔多吸引，所以揀咗喺彌陀原食。 喺彌陀原旅館一樓嘅日式餐廳「大日」食lunch，竟然意外地又俾我哋包場，可以喺一個咁安靜又舒服嘅環境好好享受食物真係好。 我哋叫咗兩款餐廳最出名嘅定食試下。 彌陀原高原燒肉定食－鐵板燒富山縣產牛肉，加上雜菌，再配上濃郁醬汁，啱晒我呢個重口味嘅牛魔王。 酥炸白蝦定食－富山灣其中一種名物就係白蝦，將白蝦配上當地產嘅魚漿再炸成魚餅，可以食到魚同蝦嘅鮮甜味，口味比較清淡。 餐廳外就係一整片高原濕地－彌陀原。食完飯最好就係去散散步，消化一下！
