闖進日本秘境百選之一－黑部峽谷＋宇奈月溫泉 好多香港人都知道立山黑部，但對於黑部峽谷就比較陌生。因為遊立山黑部係唔會經過黑部峽谷，所以好多朋友未必會特登去玩。 黑部峽谷自古以嚟就以人跡罕至嘅秘境而廣為人知。喺江戶時代亦因加賀藩國境警備同森林管理而禁止進入，僅黑部奧山廻御用役人在此巡邏。明治時代以後對外開放，成為許多登山家的目標。從戰前開始，因煉鋁需要大量電力而進行電源開發。其中，日本國內最大嘅水庫－黑部水庫，當時嘅工事用通路在之後對外開放，開發為立山黑部阿爾卑斯路線嘅觀光路線。此外，還有宇奈月溫泉、黑薙溫泉、鐘釣溫泉等溫泉地，以及連接各溫泉地嘅黑部峽谷鐵道。 如果要去黑部峽谷，就要先到宇奈月溫泉。 我哋從富山出發，乘搭電鐵富山出發。電鐵富山站就喺JR富山站隔離，只要一出站JR富山站，向左行一分鐘就到。 遊覽黑部峽谷同宇奈月溫泉嘅車程係要另外買飛，因為遊立山黑部嘅pass係唔包㗎！ 由富山到宇奈月溫泉大概1.5hrs～ 黑部市位於日本北陸地區，富山縣嘅東部，貫通海拔3000米。地區入面有齊山・峽谷・平原・海洋，四季變化明顯，喺每個季節中都可以欣賞到唔同嘅自然風景。 宇奈月温泉好出名，就連日皇都嚟過浸溫泉度假。 宇奈月温泉係日本富山縣主要嘅溫泉鄉，位處立山地區主要旅遊景點－黑部峽谷嘅入口，就以宇奈月温泉為出發站。 一出宇奈月温泉站就已經有一個噴水池，噴泉噴出嚟嘅就已經係溫泉。 整個宇奈月温泉並唔大，站外已經係溫泉老街。成條老街完全冇人，非常安靜，真係好適合度假。 我哋走咗入一間cafe食個tea～cafe以莫扎特作為店名 Cafe已經係最多人嘅地方。店內仲有好多懷舊小食賣。 老闆對咖啡好有研究，沖嘅咖啡超正，可以喺咁舒服嘅環境食tea真係享受～ 食完tea，我哋出發前往黑部峽谷鐵路嘅宇奈月站。宇奈月站位於宇奈月溫泉站後面，步行大概5分鐘就到。 大家嚟宇奈月溫泉除咗浸溫泉外，就係為咗乘坐黑部峽谷鐵道「トロッコ電車」遊覽黑部峽谷。 黑部峽谷（日語：形／くろべきょうこく）係富山縣黑部市、黑部川中游至上游嘅V形峽谷，將飛驒山脈分斷成立山連峰同後立山連峰。黑部峽谷已經被指定為國之特別天然記念物（天然保護區域）及特別名勝。黑部峽谷位於中部山岳國立公園之內，與清津溪谷、大杉谷同為日本三大溪谷、日本秘境百選之一。 整條黑部峽谷鐵路一共四個站，包括宇奈月、黑薙、鐘釣、櫸平。單程需時1小時20分鐘。鐵路全長 20.1 公里，路途上會經過 41 條隧道同22座橋樑。 沿線分佈著爲宇奈月溫泉提供熱泉嘅黑薙溫泉、鍾釣溫泉、名劍溫泉等溫泉，大家可以中途下車享受溫泉浴。鍾釣溫泉好出名，因爲黑部川河灘任何一個地方都可挖出溫泉，所以黑部呢度亦有好多秘湯溫泉。 黑部峽谷並排架設嘅2座紅色拱形結構橋就係宜家小火車駛經嘅「新山彥橋」（右邊）同曾經嘅鐵道「舊山彥橋」（中間）。「舊山彥橋」宜家已經改為行人專用，橋上係見到黑部峽谷小火車經過「新山彥橋」嘅最好場所！因列車行駛聲響變成回音傳到溫泉街而起名「山彥橋」。 黑部峽谷藍橋－後曳橋長 55 米，高高架在高 56 米嘅峽谷最深處，嗰度係整段鐵路路程中最具代表性嘅景點。由於身處小火車上係影唔到相，所以車站外有模型俾大家影相留念。 鐵橋、隧道同鋪着舊軌道等係一條隨著四季擁有唔同景致嘅散步路線，有時間可以慢慢行下，好好感覺一下黑部峽谷景色。 夕陽西下，我哋返到宇奈月溫泉老街。 喺宇奈月區內，隨處可見黑部峽谷小火車造型嘅燈柱。 老街上嘅宇奈月溫泉觀光案內所，裏面有無料休息所同足湯。 我哋宇奈月溫泉老街一間好出名，曾經奪得「内閣総理大臣賞」嘅菓子老鋪－福多屋菓子司買手信。 黑部川嘅水係呈現出Tiffany Blue嘅顏色，超級靚！ 遍佈天然溫泉嘅「宇奈月溫泉」，擁有以純凈水涌出嘅「清水的故里」為名。 戶外浸足湯先有feel～一場嚟到宇奈月溫泉，又點可以唔浸下曾經奪得「水之賞」嘅溫泉呢？！ 宇奈月溫泉嘅泉水喺屬於 “美人湯”，浸得多對皮膚好好㗎！ 當然成個足湯俾我哋包場啦～6月中嘅黑部峽谷一D都唔熱，浸足湯真係超正！気持ち～ 宇奈月溫泉嘅食店唔多，但點都有一兩間庶民食堂嘅！ 好友叫咗鍋燒烏冬，我就叫咗刺身定食。話晒富山對出就係富山灣，富山灣被稱作「天然魚塘」，出名漁獲多，海鮮夠晒新鮮，點都要食下。 富山灣因為擁有獨特地形，沿海驟然變深，令海底有好多錯綜複雜嘅溝谷，亦即係所謂嘅「藍瓮」海底溝谷，最適合成為魚類貝類棲身嘅巢穴。加上從海拔3,000米高嘅立山山脈流淌嘅水帶來豐富養分，養育咗豐滿馥郁嘅海底生物。呢個就係富山海鮮味道鮮美嘅秘密！所以嚟富山一定要食海鮮！ 當然唔少得本人最愛嘅燒雞翼，只要menu有就一定會叫嚟食。即使簡單到只係用鹽燒，都超級好味。 食飽就要搭車返番出富山。原本有plan過喺宇奈月溫泉住一晚，但因為交通時間問題，所以最後作罷。 呢度就係JR富山站同電鐵富山站。 富山嘅公共交通工具就係呢種好似輕鐵咁嘅電車，當然靚好多、型好多啦！ 住係距離車站5分鐘路程嘅APA VILLA HOTEL，超級方便，真心推薦！ 喺網上訂房發現咗一件好搞笑嘅事！話說一間雙人房要＄700，一間單人房就＄350，最正係其實房間size都係咁大，所以我就book咗兩間房啦。 負責收拾房間嘅酒店職員會係card度手寫上自己姓名，令人感覺好窩心、好有人情味。喺浴衣上面仲放咗一隻幸運紙鶴，使人心情變好，唔會覺得自己住咗喺間冷冰冰嘅酒店。 不過住我對面房係一個勁古怪嘅男人。因為我同好友各自一間房，所以大家會過房。每一次我開房門，對面個男人都會開門望住我，搞到我勁唔舒服。如果我不停過房，講嘢好大聲、好鬼嘈就話姐，我又唔係wor！不過本人出名膽生毛，就算係變態，我都未驚過。 最後當然唔少得每晚嘅宵夜＋girls' talk時間啦～喺福多屋菓子司買嘅米餅真係超好味！！！食飽飽，返房瞓番個靚覺（可以自己瞓，唔使搶被，唔使驚俾鼻鼾聲嘈住），第二日出發去立山黑部！
