築地市場年底搬遷資訊＋波除稻荷神社「築地獅子祭」＋築地本願寺 自從舊年知道築地嘅場內市場落實咗會喺2016年11月搬到豐洲新市場後，我就同自己講：即使對東京興趣不大，但點都要去一次擁有「東京廚房」美譽嘅築地市場，同屹立咗80年嘅築地say hi同say bye bye！ 嗰日我哋搭日比谷線嚟到「築地站」，即刻就見到築地本願寺。第一眼望到完全冇認知中日本神社嗰種禪味嘅本願寺，我仲好懷疑點解有間錫克廟喺築地嘅？（真係無知到爆！）於是就去參觀一下！ 築地本願寺（つきじほんがんじ）是位在日本東京都中央區的淨土真宗本願寺派寺院。本尊阿彌陀如來、開基（創立者）為准如。東京都內代表嘅寺院之一，京都市西本願寺之別院。正式名稱淨土真宗本願寺派 本願寺築地別院，更出名係俗稱築地本願寺。築地本願寺亦擔負著首都圈開教活動嘅關東最大念佛道場。 本願寺可以提供場地舉辦追思會、葬禮、婚禮，幾乎都係東日本嘅達官貴人先有辦法喺呢度舉行儀式。當時３１１地震追思會日本政府就選擇咗喺本願寺舉辦。 公元1617年，本願寺前身位於淺草御門南の横山町（宜家日本橋横山町 、 東日本橋 ）。1657年。當時嘅江戶（宜家嘅東京）發生大火付之一炬，之後喺現址重建（當時係垃圾填埋場）。關東大地震後倒塌，寺廟毀於一旦，由東京帝國大學工學部教授、建築歷史學家－伊東忠太設計目前所見嘅古代印度様式（天竺様式）建築。 1934年，築地本願寺再次落成。重建後嘅本願寺，以石材建造嘅外觀依照古印度式樣所設計，同時融合佛教、印度教、伊斯蘭教嘅建築特色，除咗建築兩邊有印度式嘅佛塔，寺廟寬闊嘅廣場、寺廟正門嘅石板階梯，仲有圓形石柱帶有希臘、羅馬建築風格，令我哋眼前所見本願寺呈現出一種別樹一格嘅形象，亦成為昔日異國風嘅築地，唯一保存落嚟嘅一個見證。 寺廟正門石階前，兩尊擁有雙翼嘅獅子守護住本願寺。（唔知點解雙翼獅子俾我嘅感覺好似《百變小櫻》裏面嘅基路比羅斯（即係基路仔大隻版。）另外，寺廟嘅設計亦加入咗動物元素，包括牛、馬、象、猿、獅子、雀鳥等，解說牌上標示住「妖怪趣味」、造型奇特嘅動物雕塑。 寺內內部結構亦都非常靚，莊重、古典，而且非常特別。講堂內仲有喺德國製造嘅管風琴。因為我係從來唔影寺廟內部，所以冇相睇。個人覺得築地本願寺好值得參觀。 「東京廚房」－築地市場 每天都有好多遊客去築地市場觀光。市場分為場內及場外兩個不同區域。（其實大家可能比我更清楚！hahaha～）「場內市場」即是專業採購人員採買嘅場所。而「場外市場」，一般人都可以自由採買！ 喺東京11座中央批發市場中，築地市場係經手海產、蔬果農產品，且擁有最悠久歷史嘅綜合市場。其中海產則為世界最大量嘅處理規模。場內主要進行競標及批發用生鮮食品等物嘅販售。競標中，賣方（批發業者）會將海中捕獲嘅魚類等販賣予買方（批發仲介業者等）。 另外，朝早嘅吞拿魚競標任何人都能前往參觀其過程。集合地點係喺魚類普及中心（おさかな普及センター）(東京都中央區築地6-20-5)。但呢項「築地體驗」係限額參加，每日120人，分成兩組參觀，每組參觀時間係25mins！仲有就係，一定要跟足注意事項，遵守規矩！ 場內有個被稱為魚がし横町嘅區域。喺築地市場工作嘅人會喺度買材料、吃飯，一般人亦都可以喺呢度購物飲食。魚がし横町有壽司店、海鮮丼等食店、販售專業菜刀嘅刀具店、海苔店等商家。但大部份食店店內空間狹小，所以座席數量偏少。 從壽司大、大和、小田保...等等，出面都排住隊，喺呢度可以見到非常多遊客，絕少有當地人會排隊。有很多人仲係拉住行李排隊！真係好得人驚！對於我呢種最憎排隊嘅人，加埋落勁大雨，梗係唔會排埋一份，傻的嗎？ 再加上，我一早已經揀咗間係築地附近嘅居民同喺附近返工嘅人先識去幫襯嘅手握壽司店食壽司，有點會喺度排啊？ 我個人覺得，一間食店再好食，人手始終係有限，加上喺咁多人排隊嘅情況下，如果要做晒大家生意，想食物質素同服務質素都做好係一定冇可能。 有時候，大家真係唔使太執著，覺得一定要食呢間，其實有D店舖係俾遊客炒熱，未必真係一定要吃，覺得冇食吃就白嚟一趟。講真呢度係海鮮最新鮮嘅市場，每間食店都有一定水準。 場外市場係一般人都可以購物飲食。同場內市場相比，可以見到數量更多嘅店鋪，以及更多空間嘅食店。 前往場外市場時，「門跡通（もんぜき通り）」係入口嘅參考地標。從日比谷線築地站1號出口往左通過築地本願寺再穿過馬路後就會見到。 場外除咗普通人容易順道參觀外，業者或壽司店等業務之用採買嘅人亦會喺度選購材料。專業買家為之信賴嘅高品質商品一般人都可以輕鬆購入，正正就係呢度嘅吸引力。 仲有好多美味嘅小吃和手信，可以來場外市場嘅巷弄穿梭尋寶，體驗當地人一樣去街市買餸嘅感覺。 提到築地市場，遊客多數都係嚟食，好少有人會去築地波除稻荷神社。其實神社距今已經有300多年歷史，左右神殿供奉一紅一黑的超大獅子，甚至...波除神社仲有すし塚、鮟鱇塚、活魚塚、玉子塚、海老塚，すし塚是為咗祭拜日本壽司文化，亦即係手握壽司上嘅魚類海鮮。堪稱是日本最特別嘅一間神社。 波除稻荷神社緊鄰築地市場，也與築地歷史息息相關，相傳當初喺度填海造地，德川將軍築堤抵抗海浪，但總係被海浪沖毀，令填海造地功虧一簣。後來海上飄來一尊稻荷神像，於是當地人在此蓋起波除神社祭拜，自此之後填海造地順利完工，先有今日嘅築地市場。波除稻荷神社保佑住築地嘅安全繁榮、漁獲豐收！ 波除神社左右兩側各供奉一尊獅子，左邊嘅弁神天社，裏面係紅身金眉黑齒嘅母獅 （お歯黒：明治時期(1868年～1912年)嘅已婚女子會將牙齒染黑嘅一種化妝方式）。而神社右邊係獅子殿，供奉金眉金牙黑獅「厄除天井大獅子」。呢兩大神獸，被稱為騰雲之龍、駕風之虎，保佑大家海上作業可以天氣晴朗、風平浪靜、順風順水、安安全全。所以嚟到築地市場唔好淨係掛住食同買，記得嚟睇下波除獅子神獸、買番個超得意開運鯛魚御守同木獅子御守！ 能夠引導人走向幸運嘅御守「目出鯛(めでたい)」。「めでたい」喺日文中表示值得歡喜、慶祝嘅意思。呢款御守就係藉「鯛(たい)」嘅諧音而嚟。 波除神社同獅子淵源甚深，在每年6月10日嗰個星期五至星期日都會舉行「築地獅子祭」。祭典時扛著0.7噸嘅母獅「黑齒獅子」和1噸嘅雄獅「厄除天井大獅子」喺街上遊行。周邊會有好多露天攤販，係築地嘅一項大活動。 神獸神轎遊行祭典，也被稱為「渡街祭典」，三座神轎一同出沒喺築地市場，場面非常盛大。 行完築地市場，我哋去咗附近一間手握壽司店食壽司，下一篇會講下～ 築地市場2016年底搬遷資訊： 根據日媒報導，築地市場內嘅場內市場將會喺2016年11月3日到6日進行場域轉移至「豐洲市場」預定地，並會喺11月7日正式對外營運，除咗蔬果等攤販外，受國外旅客喜愛的「壽司大」等商家亦會跟著轉移至豐洲市場，當然有D係唔會嘅。場外市場攤販變動不大，主要係場內魚貨批發嗰一類會搬遷過去。 豐州宜家主要係民居，並唔係熱門旅遊區，而近年有開始優化交通網絡同商業設施，宜家最多遊人去豐州嘅景點就係 LaLaport Outlet喇！ 其實豐洲距離宜家築地市場唔算好遠。離新址最近嘅車站係東京臨海線（ゆりかもめ）市場前站，大家喺未來想睇新鮮嘅漁獲叫賣就要去豐洲市場啦！ 景點資訊： │名 稱│築地市場Tsukiji Market (分場內外市場) │地 址│日本〒104-0045 Tokyo, Chuo, Tsukiji, 5−2−1 │電 話│+81 3-3542-1111 (http://www.tsukiji-market.or.jp/pdf/toiawase.pdf) │營業時間│營業時間看各店 │官方網站│http://www.tsukiji-market.or.jp/ │交通指引│http://www.tsukiji.or.jp/chinese/accessmap.html 築地本願寺 :〒104-0045 東京都中央区築地3-15-1 東京メトロ日比谷線「築地駅」より徒歩1分 東京メトロ有楽町線「新富町駅」より徒歩5分 都営地下鉄浅草線「東銀座駅」より徒歩5分 都営地下鉄大江戸線「築地市場駅」より徒歩5分 波除神社：東京都中央區築地6-20-37 東京メトロ日比谷線「築地駅」より徒歩8分 都営地下鉄大江戸線「築地市場駅」より徒歩7分 指引：搭乘東京都營大江戶線於築地市場站下車，循著築地市場指引出站後右轉直行，過了一個紅綠燈後右轉直行，會經過場外市場，直行到底就會見到，約7-8分鐘路程。
