《龍泉VS榮哥》私房菜評比結果請拉到最底 ☟☟☟☟☟ 「聽晚一齊食飯囉?」 「好啊! 想食咩? 日?韓?泰?西?邊爐?」 連印度菜都就黎UP出黎,都冇人話要食中菜。 就算係中菜,都可能係潮州打冷、四川擔擔麵、台灣料理或者其他中式野, 絕對唔會係廣東菜囉!家陣同親戚去酒樓食飯蒸條魚咩?幾丁友食得幾多 重點:廣東菜咪即係你同我老豆老母煮個啲囉 (冇錯,係屋企食度點解要出去洗錢食呢?) 不過犀犀牛話你知,食材係似曾相識,但你係度食到嘅,絕對係你係屋企食唔到嘅! 點解?!?!因為佢嘅烹調手法和醬汁囉蠢 平日食其他野食到悶悶地,就同朋友去榮哥度食,可以叫套餐,人頭計,少人食都上足咁多道菜,只係份量多少問題,所以幾多幾少人去食都冇問題 (啱哂你地...Sorry, 係我地呢啲冇朋友嘅毒友) ****記得訂枱 + 提前兩日Confirm Menu(上FB睇Menu) **From 榮哥廚房私房菜 Facebook Page 因為想試下佢地所有特色野,所以我地散叫,冇跟餐,可以試出佢地真材實料 坐低會見到你嘅Menu印咗你嘅名同你嘅菜式,賣Tailor-made,唔錯唔錯 ;) 等上菜個時,臨時叫左個辣香凍花螺 $78 ☞ 睇花螺個硬樣都知,要整得入味係唔易嘅。但係呢方面榮哥做得唔錯,鮮甜得黎好清香,係嫌佢辣得唔夠過癮 (唔好辣朋友表示剛剛好 -_-) Menu中首先黎嘅係慢煮冰鎮爽口清酒南非鮑魚 $128/2隻 (套餐價$88/2隻) ☞ 聽個名都已經覺得佢犀飛利啦,唔好食要打!鮑魚有大半手掌咁大(當然係睇埋個殼啦傻豬),Not Bad Not Bad,而且同佢個名一樣,冰爽爽好濃酒味,絕對值得一試。 跟手上埋茶燻流心蛋伴黑魚子醬配厚切茄子 ☞ 個個套餐都有就知呢個係招牌吸客菜啦。首先食蛋,好食嘅但冇乜驚喜,咪好食嘅溏心茶葉蛋囉。沙律菜,Same Same啦。但個茄子真係哇到我喎!出面脆脆地入面好香好軟,個Sauce梗係畫龍點精,甜甜香香好特別。嗱!呢個真心surprise到我同我阿媽啊 (因為我估阿媽到呢一刻終於會話佢整唔到喎真係) 因為想補補身同個胃,之前order左個花膠猴頭菇黑毛豚肉湯 (跟餐嘅話轉飲要每位加$42) ☞ 飲開住家靚湯嘅話,呢個湯不足為奇,但如果係無飯家庭,就真係要飲啦,補補身暖暖胃。宜家好少中式湯唔係味精例水嫁啦.....(T.T) 金銀蒜香開邊蒸花龍蝦仔$208/隻(約6-8兩) ☞ 龍蝦新鮮嘅,點整都好味,仲要加蒜就無得輸。鮮味十足,肉質爽甜,如果多啲啲蒜嘅話我實比滿分你 §§犀犀利推介§§ 茶王燻雞 ☞ 招牌菜,用本地活鮮雞。我想講......勁好食囉咩事!)0( 雞有雞味!宜家唔係講廢話啊,食過又老又瘦冰鮮雞嘅大家就知。呢隻雞本身好黃油雞,嫩口得黎又唔肥膩多膏。重點係佢真心皮脆肉滑,唔係炸都可以好香口,仲好香茶葉味添。我地兩個人就咁食哂一隻雞,飽得好滿足。 之後我地叫多左個時蔬,加埋一枝1664啤酒埋單大約$1200。係唔算平啊!不過因為我地冇叫套餐食啫,同埋話哂同朋友慶生咪食豪啲囉。 味道:★★★★✰(4/5) ☞ 有幾道菜的確令我哇哇聲,好味得黎有驚喜 外表:★★★★✰(4/5) ☞ 唔需要相機食先嘅,但佢擺盤係唔錯 環境:★★★★✰(4/5) ☞ 中餐咁囉,唔算迫唔算多位,有房,sell家庭式 價錢:★★★✰✰(3/5) ☞ 我地食人頭$600...但係set嘅最平$338 服務:★★★★✰(4/5) ☞ 因為唔算太大太多客,所以啲員工都幾Attentive 廁所:★★✰✰✰(2/5) ☞ 冇自己廁所,要用工廈公廁......呃...... 總分:★★★★✰(4/5) ☞ 會返去再試佢其他菜,帶屋企人應該會好啱食 榮哥廚房私房菜 地址:觀塘道436-484號官塘工業中心3期4樓L室 電話:2345 6389 營業時間:星期一至日 11:30 - 23:30 付款方式:Visa, Master, UnionPay, AE, 現金 (比現金免每位$12茶芥啊!) 《龍泉VS榮哥》私房菜評比 龍泉 榮哥 菜色 普通廣東家常菜 特色廣東菜,較多選擇 味道 偏中上,媽媽做到 好味! 有驚喜,媽咪未必得 環境 開揚,靚裝潢,有面子啊 冇咁寬敞,較傳統感覺 服務 上菜慢,員工冇乜笑容 上菜快,多新手但態度好 便利 地鐵行過去比較遠同好多人 地鐵行過去好快啫 價錢 一個字:抵! 價錢合理,但唔算平 დდ 最後感想 დდ 如果帶朋友第一次食私房菜,會去龍泉,因為抵食而且菜色大眾化 ☞☞ 好食又抵食嘅家常海鮮餐 但如果同幾個好朋友或者家人慶祝食飯,會揀榮哥,因為食物夠特別而且好味,食好西好去處 ☞☞ 菜色同味道都有驚喜同特別嘅廣東菜 我下個星期屋企人慶生都打算去榮哥!一黎可以同家人分享美食,二黎佢都好吸引我再返去試下佢其他餸菜。 【中菜@HK】龍泉私房菜 ☞ 抵食家常海鮮餐 (私房菜評比!!) ☟ ☟ ☟ https://blog.ulifestyle.com.hk/blogger/journey2west/2017/07/龍泉私房菜/ Facebook: @EatingJournet2West 雜食犀牛記 https://www.facebook.com/EatingJourney2West/