「有心無力運動人」 第二集 斷氣都要跑埋去 好明顯，我係一個好食懶非既港女。懶到一個點係個個朋友都唔再叫我JOLLY，而係JELLY，成舊啫喱甘，一pak野。我平時無咩運動叻，跑步一開頭目的都係減肥（拿，減肥同keep fit係兩回事），第一次比賽係上年屎忽痕，放假無野做，做人無咩目標所以參加。（Limit challenge 2015) 第二個比賽就係今個月，上個星期五跑既第一集（Kiehl’s 5K couple run）。今次第二集，又係五公里，唔知情況又點呢？ 今個月第二個5公里比賽，同上次唔同既係今次得我自己參賽，無人陪。 點知我個傻瓜老豆話黎影相 實質陪佢個寶貝女，我。 今次順利好多，望住個海，好好好舒服，有種一生何求既諗法係咁係我個腦到漂出黎。 「第時老左都仲有時間有精力好似宜家咁跑，一生何求呢～」 今次醒啦，唔著咁多野，就咁手拎住個電話就走。（上次又衫又風褸、仲要袋紙巾電話咁，重到媽叉） 聽住歌，計住時係必須的。我聽既係Big Bang (唔是粉絲) 因為佢音樂夠嘈，夠節奏感重，我無力個時就會跟住個beat跑。 「打死唔行，一步都唔可以」 （白色衫 右邊 格離 個粒鼻屎 就係小妹） 與自己對話 每次跑我都一直同自己講野，因為同緊自己比賽(仲因為真係得我一個跑丫麻大佬) 我會講「你得架，無人話你唔掂，去啦，衝啦」、「繼續啊，我老豆係終點等緊我架，快d去搵佢啦」 反思 其實今次學到最大得著係：留意自己呼吸。上次我見人快，我又想過佢頭，令到自己3公里已經頂唔緊。我會一直用鼻呼同吸（利申無系統訓練過，帶定帽先）直到4公里，我已經斷斷地氣，我就自然用左嘴呼，搞到之後幾百米個口乾到好辛苦。聽講，用鼻呼吸係練氣、用嘴呼鼻吸係爆炸力。所以下次應該最後700,800米就用返嘴呼，一氣爆上去。（應該） 重點分析: 跑道：8/10分 今次跑海旁，跑道明顯比上次舒服好多 起碼咁多人一齊開跑都唔逼先啦，上次真係整弎文治咁，明明一樣係科學園區..... 環境氣氛：6/10分 明顯無上次咁好氣氛架喇就，無人「奇裝異服」拎服飾獎。 但工作人員都係一直係道路邊加油打氣，都值得感激。 難度：5/10分 就唔太難，因為係大直徑，無咁多彎位、上落斜咁。所以練開緩跑徑既我都覺得唔難。 有好多高手高高手，唔知係咪飲左red blue 好似有對翼飛咁，快到係我兩三公里時已經有人跑緊回頭。 整體感覺: 8/10分 好舒服既一次跑，吹住海風、望住個大海，對手就得自己，一直堅持就成功，媽，我得左喇！ 相中個選手第一名，係我第三公里個時，佢已經跑緊回頭路係我格離。 多謝我老豆，7點起身出去，拿拿聲食早餐，撘的士驚遲到，就係為左個傻瓜女兒。我一跑寶成身大汗到自己都覺海膽味十足，佢竟然無謂世事變改，愈難愈愛咁抱我。佢一句「呀女你好掂呀！」我已經開心過衝線，所以地上最強，非佢莫屬！我既傻瓜老爸！ 今次比賽就咁結束，希望第時有時間有力參加多點活動啦，我要練跑啊！
