2017年5月10日國際新聞 布吉市近郊區Big C被恐襲 2017年5月10日國際新聞 布吉市近郊區Big C被恐襲 瞓到迷迷糊糊之際，楊生輕描淡寫咁同我講:Big C爆炸噃。(´･_･`)小妹聽罷嚇到彈起醒晒，呢啲人肉鬧鐘真係可一不可再，雖然唔係曼谷市內，不過真係幾驚，爆炸發生響布吉市近郊區，原定今日出Big C掃貨都想喊停唔去... 一隻手都拎唔晒嘅椰皇~ 照原定計劃出發去Sala Daeng嘅早餐街食早餐～落船見到碼頭有擺賣椰皇就買嚟試試，好飲係好飲，不過唔凍嘅、仲要無羹比，眼白白睇住入面一層層好厚好厚椰子肉但係唔食得就好嬲...剩係食到椰蓋底嗰塊，都已經覺得又甜又好味！有衝動問個老闆可唔可以幫幫忙劈多幾刀... Silom站Body Tune，出閘左邊就見 飽肚唔可以揼骨～唯有空肚去咗揼骨先～有椰皇打底嘛～60分鐘450Baht，呢間環境靚、冷氣夠大、床墊又舒服、技師個個都好到位～楊生揼完就已經諗定下次就要玩推油(╯✧∇✧)╯就響Sala Daeng站近tailor made左邊出口，出閘已經望到個醒目招牌閃閃發光～ Samai Seik Chicken Rice Samai Seik Chicken Rice 就響Sala Daeng站另一邊出口，連住Silom Complex嗰邊出口落電梯就喺Silom早餐街，沿住方向直走就響橋底，就有一間當地人無論早餐午飯夜市都鍾意去食嘅海南雞飯舖頭～唔響舖頭食都會打包返屋企食！個鋪頭名係泰文來，我都係認住個可口可樂招牌先識行入去喳，網上都有介紹叫做Samai Seik Chicken Rice。 Samai Seik Chicken Rice 雞飯同河粉都一樣售50Baht，無餐牌要直接叫，所以兩個一搭檯坐低就叫咗兩客”界”先 ⁄(⁄ ⁄•⁄ω⁄•⁄ ⁄)⁄～份量啱啱好，係一隻飯碗倒出嚟唔會飽嘅份量(°ཀ°)，同楊生兩個肆無忌憚咁將旁邊隻隻醬料都落齊晒～唔係亂倒㗎！當地人食咩都係每隻料都落幾大羹落去好重口味～而且個醬汁真係好惹味不能自拔～再飲埋碗雞湯～正！ 曼谷指定:香蕉朱古力煎蛋餅 繼續沿路直走，就響RHB Bank Liberty Square拐彎再直入，除咗依然係滿滿嘅街頭熟食檔口同餐廳之外～居然巧遇呢款嚟泰國必吃嘅街頭小食！由於Menu又係只有泰文～所以指住條蕉話要”芭啦啦Chu cool la”就得嘞 ⁄(⁄ ⁄•⁄ω⁄•⁄ ⁄)⁄ 曼谷指定:香蕉朱古力煎蛋餅 呢款類似西多士物體～下面嗰塊係蛋汁煎出嚟類似嘅薄罉，將條蕉切件掟晒落去包住，再猛唧朱古力漿狂斬幾刀就完成嚕～熱辣辣脆卜卜好香口好好味吖真係～原先諗住兩個抦埋馬路邊一人一啖拿臨食晒去，然而檔主嬸嬸好體貼咁搬咗兩張膠櫈比我哋座低慢慢食～食完仲好窩心咁幫我哋扔咗包垃圾～旁邊7仔啱啱好買支水就繼續出發！ St. Joseph's Convent School就響屋企附近 原先諗住帶楊生去食老家後面，我同兩個家姐都好鍾意食嘅鴨肉河車仔檔，鴨雜同鴨紅都好好食一鴨幾味！！同樣都係細份量幾啖就無，但係楊生聽見已經投降話食唔落(|||ﾟдﾟ)...咁...所以就轉彎返咗姨丈姨媽屋企度探佢哋，順便睇吓Ople響唔響屋企～咁啱原來佢都放假正安坐家中睇電視～同堆親朋戚友寒喧咗幾句逗留五分鐘左右～就同楊生繼續去”拜挑”～(譯:行街) 除咗幾粒Nami朱古力之外，Out 朱古力刨冰，Out 賣點只有露天雪糕座 一來一回行返BTS站都有半粒幾鐘暴曬陽光底下，不過猶幸呢兩日都天陰陰無落大雨仲偶有涼風～所以都唔算辛苦～原定嘅鴨肉河同Pizza Company都食唔番(◞‸◟)唯有寄望下次喇。然而響Silom Complex商場入口，就有間叫Parferio嘅露天雅座可以食雪糕嘆吓冷氣～ Central world門外新開嘅大型小食露天市集 去到Chit Lom站無視地穿過中產至愛嘅Central world，準備走過對面Big C途中，居然新開咗一大堆小食露天市集！一行埋去已經香到離譜，檔檔都好香...好香...好想食...(°ཀ°)但不時有烏蠅飛過，楊生瞪時已經不屑多看，幾香都罷喇 ┐(´д`)┌ Chit Lom站有兩層高嘅Big C 響Big C同樣指定動作走吓粉，買咗堆紫菜同即食麵喳～都無咩特別嘢想買或者想食，又重，擺得多響屋企，又棧係等過期嚟扔，所以買埋朋友托買嘅，逗留無耐就走咗嚕！同埋始終身處Chit Lom站核心觀光點地帶，以前已經炸過Central World重建，Big C印象中都領過嘢中過招，四面佛更加鬧得熱烘烘，全部都圍繞Chit Lom站，點都不安中。 真皮鞋仔～超可愛好靚呀！ 顏色同款色更加花多眼亂～～～ 買完準備離開時途經地下大賣場攤位，就比呢檔皮革鞋仔吸引住！好靚好可愛！最緊要又唔貴添噃，圍返港紙都係100蚊有找！由零歲到五歲都有Size之分，第一時間Whatsapp薑媽又視像電話，諗住睇吓肥詩同浩麟啱唔啱～可惜薑媽幫肥詩沖緊涼聽唔到電話...我又唔知小朋友啲腳幾大隻噃，我見行多幾圈都未有消息就走咗嘞！唯有下次有機會先買啦～ Kiwi果汁 & 椰皇 蠔餅，新鮮好味，75Baht，係七十五Baht噃 我最愛嘅"印DA科"～( *¯ ³¯*)♡ㄘゅ 450Baht 好好好正嘅泰式炒BB軟殼蟹！700 Baht！ 嗄～～一碟有咁多隻嘅燒巨頭蝦～都係先900Baht～已經食咗兩隻 Lek Seafood，BTS Chong nonsi站3號出口 Lek Seafood，BTS Chong nonsi站3號出口，後門 又到食飯時間！今晚一定要去Lek Seafood！！BTS Chong nonsi站3號出口，出閘一落電梯直行就見，今次決定走後門靜悄悄打卡做神秘顧客，怕最後演變成Welcome party就尷尬，可以安安樂樂食餐飽飯就心滿意足，坐低點晒我至愛嘅Must Eat Item，就只係因為，因為我想要支羹刮個椰皇肉嚟食喳(又刮 -_-)！點知伙計一埋嚟比羹我嘅，正正踫著我個帥哥表姨甥仔阿Tunn，刮咩肉丫刮！刮出個大頭佛喏 (´;;◉;⊖;◉;;｀) 由於屋企距離餐廳只係10分鐘左右路程轉個彎就到，所以15分鐘左右大哥大姐姨甥女已經走晒嚟搭檯找我，表哥表嬸都出現埋，啱啱好夠腳打兩檯！我怕見嘅困難係因為......小妹泰文真係好好好有限公司，我聽得明唔代表我識答...我講得出又唔代表適用，連潮洲話都格硬唧得出兩隻字。而楊生瞪時連叉都唔敢拎起、手都唔敢遞高，石化咗近乎半粒鐘變男模(´⊙ω⊙`) Asiatique 摩天輪 Asiatique 風火輪內部 拿臨啜多幾啖大蝦頭就捉住楊生”夾撓”(譯:走先)，我哋呢餐慳咗成2000銖，極唔好意思...其實我仲想加個芒果糯米飯இдஇ無奈...然而今晚Last Day所以食飽飯最後衝刺Asiatique，兩小口都無咩點浪漫吓，小妹就提議上摩天輪走一轉，明明就係風火輪(☉д⊙)不過湄公河畔四周圍景觀都真係幾靚～一下子都已經忘卻咗，我倆正處於倉鼠跑輪mode，正半空翻騰咗唔知幾多周半。 椰青雪糕都係40Baht超好食(*´д`)~♥ 我最愛大哥牌花生雪糕，好花生嗄真係(*´д`)~♥ 椰青雪糕好好味(๑´ڡ`๑)大哥牌花生雪糕都一級棒(๑´ㅂ`๑)不過今日真係飽到插針都插唔入好浪費，今日真係玩到好盡non-stop咗9個幾鐘無停過，返到旅館完全瞓到攤屍一樣。
