富山海王丸公園 富山海王丸公園 平成28年11月13日 日曜日 富山第一酒店 > 富山海王丸公園 海王丸號日久失修囉!!定抑或定期維修囉! 去到居然摸門釘,諾大嘅公園, 叫我哋入響外圍影相拍照留念..... 仲要自己想辦法逗留45分鐘..... 成個公園一眼睇晒,點收科? 沿圖片逐張凳坐都坐唔到45分鐘, 喔!突然公園大鐘播音樂, 音樂出乎意料咁好聽噃! 呢~~右邊有支寧寧舍舍咚冬撐起嚟嗰支嘢呢~ 鐘嚟架~~ 富山名物鱒魚壽司DIY製作體驗 富山海王丸公園 > 富山城漁市場 呢盒嘢就巴閉喏.... 成班團友都想辦法要甩手處理咗去, 裡面成餅白飯已經夠正常人一星期所需要食嘅份量, 佢仲要DOUBLE比夠兩層你,每個團友一人一盒, 中間嗰層夾心鱒魚呢...無錯呀都係一餅嘢過你嘆, 一整個鱒魚白飯蛋糕仲要切開一件件嚟食先得, 如果唔係鱒魚太難食,就一定係富山最濟銷產物, 一種鬼都唔食嘅厭惡性產物, 導遊話:鱒魚係咸架,就等同煙三文魚壽司, 呢個時候整團一行大約30人既團友, 瞪時矛頭同一時間指向我哋司機Yama shita san, 無辜嘅司機就咁無啦啦硬收咗18個鱒魚蛋糕...了... 富山城漁市場 : 燒帶子 富山城漁市場 : 燒帶子 食過一粒會再想食第2粒~ 食完1隻會買第2隻嚟食~ 白蝦雪糕 富山城漁市場 : 白蝦雪糕 仲試咗有名嘅白蝦雪糕~ 真係每杯雪糕拮隻白蝦上去~ 味道就.....好似同鬱金香雪糕一樣, 食唔出啲咩味... 蝦有蝦食,雪糕有雪糕食... 白川郷ホワイトロード 獨市飛騨牛漢堡同飛騨牛肉串,好似係 富山城漁市場 > 白川郷ホワイトロード 終於等到嚟白川鄉喇! 一落車梗係要食返個有名飛騨牛漢堡 同飛騨牛肉串啦~好惹味好Juicy!! 飛騨牛漢堡 食完咁Juicy嘅牛牛攝一攝牙縫~ 係時候出發去打卡影影影啦當然!! 白川郷吉祥物 - 紅面馬騮乙隻 白川郷最有名嘅代表物, 居然就係呢隻紅面馬騮, 無錯呢隻係馬騮,雖然無五官睇唔出 Paul話係馬騮就馬騮啦~ 白川郷ホワイトロード 白川郷ホワイトロード 白川郷ホワイトロード 原先一行四人齊齊走, 行行下小妹比間手信店吸咗入去~出返嚟已經同媽媽大姊失散咗, 沿路上卻一直撞唔返媽媽同大姊, 我倆都係行晒成條合掌村並無上山甚麼的, 主要都係逛手信鋪有咩白川鄉限定物~ 仲比我發現到條超可愛限定口水肩比我寶貝契女~ 本來仲想揀件限定Tee比寶貝契仔, 點知made in china...噃... 白川郷ホワイトロード 行到差唔多集合時間,倆人都行到疲喏! 所以就去咗村口個溪澗~ 拍吓拖Sweet Sweet浪漫一下耍下花窗~ 到咗集合時間準備行返旅遊巴時, 終於都發現到大姊同媽媽嘅縱影! 不過似乎出了點小意外兩個都鬧脾氣.... 白川郷 天守閣展望台 白川郷ホワイトロード > 白川郷 天守閣展望台 逛完白川鄉內部,就搭車上嚟呢個展望台, 睇白川鄉全景兼影靚相~~ 證明一行四人曾經來白川鄉打過卡到此一遊~~~ 始終好似都係白川鄉雪景會吸引得多~~ 而且阿主人居然第一次主動喊小妹跟他影相! 實在太有紀念價值嘅一張超唯美相! 要鑲起來珍藏才對~ ホテル郡上八幡溫泉御膳 馬糞海膽+拖羅 白川郷 天守閣展望台 > ホテル郡上八幡 返到溫泉旅館,先落樓下大廳食最後一餐溫泉御膳! 今晚呢餐最豐富!! 有比錢加料啲毛蟹同馬糞海膽+拖羅!! 好鮮甜好好味啊!!! 毛蟹略嫌麻煩,舔蟹毛多過食蟹肉... 阿主人直程食殘廢餐掂都唔掂下....一.一 周身都係尖刺嘅毛蟹...食都好麻煩...毛蟹唔好有take2 隻毛蟹身上啲刺刺真係拮死人..... 拆佢唔用嘢包實都唔得... 媽媽赤手搣到手指頭都紅晒... 咁愛蟹之人嘅蟹媽都耍手擰頭, 唔好再有下一次..... ホテル郡上八幡 而最後一晚溫泉酒店~ 可惜小妹都係要一個人的孤獨風呂....主人醫好肚休息下之後, 已經急不及待跑落去浸溫泉, 竟然咁忍心丟低我一個響房... 足足捨我而去粒幾鐘頭嘆完先返嚟, 返到嚟一推開門仲要一臉紅卜卜的炫耀我, 話浸溫泉原來真係好舒服好舒服嗄.......仲要渾身散發住我最喜愛嘅馬油洗髮水+沐浴露香味, 給我無聲示威...壞人!! 最後一晚~一行四人響咁靚嘅房外面影多幾張浴衣照作完美總結~