地點:仁川綜合魚市場＿*東仁川 七點鐘準時起身，親身體驗左成粒鐘韓國上班族既生活__*迫地鐵， 上圖中間位置打紅星的，係出發點，左下角紅星的，係目的地東仁川 唔經唔覺車廂入面既乘客每況遞減本以為正常 邊得黎咁多傻既，會晨雞咁早跑入漁市場食海鮮做早餐? 最後連僅餘既三兩個都落埋車，名副其實的真係一個人都無... 薑薑聞到唔對路之際，突然車門已經「嘭」一聲......遲一步已經入車廠了 只好等第二班列車，原先下一站會到既車站， 突然走馬看花咁響我地兩個眼前光速閃擦過........... 最後我地就響驛谷跳車....已經唔知睇左第幾多n次路線圖 原來首爾既地鐵，唔站站停不特止，仲係會梅花間竹咁停車 呢個時候有個中氣十足既阿則司，向我地咆吼問東仁川點去，韓國D阿則司好凶惡 ;( 實情我地手上都拎住旅遊書同地圖，卻被誤會是韓國文青了(真爽) 佢以為我地聽唔到，再次咆哮咁聲重覆問左3次...[開車啦仲問...] 「一出東仁川站門口就見到巴士同的士站」以後唔好買個本個本旅遊書 見地盤隔離企住左兩位，著住黃色制服非常醒目既阿珠媽， 我指住韓文地址加埋漁市場圖片問，結果幾十隻小雲烏鴉飛過我頭頂， 就響呢個時候，阿珠媽突然非常熱情咁，將我手臂卡落佢格甩底下面， 以拖行形式拉住我，轉個大彎走過大斜坡，終於遠遠見到個的士站， 而阿珠媽都指住個的士站過我睇，趁我仲未黎得切反應時(神經有點遲鈍的說) 誰叫小妹太教人愛不釋手=p，阿珠媽太唔捨得我， 只係拉住我一直往相反方向遠遠遠遠道咁離開， 原來，岩岩只係介紹「東仁川的士站」呢個景點比我地 唔係講笑，阿珠媽真係超大力完全好似同我打摔角咁款 我膊頭都比佢一拼卡埋落佢格甩底下面一直拖住行， 都拖行左20分鐘有多，阿珠媽全程一直雞啄唔斷同我傾計細聲講大聲笑， 我都好(醒目?)咁每句係唔係都NeNeNe笑住點頭(呢句韓文果然萬能key) 「Ne?(高音)」 「Ne~(低音)」 就這樣成功響20分鐘內，憑住只係呢一隻單字，跟阿珠媽聊左個愉快既早上=] 同薑薑照阿珠媽指示搭巴士到了，行下行下睇下金魚搵下餐廳時， 邂逅左一個講國語既阿珠媽，帶我地響漁市場周圍揀食材嘞! 呢張係我自製既皇帝蟹閃卡，阿珠媽睇完之後， 就一個箭步帶住我地去左一檔，有好多好多得我地手心咁大隻既花蟹， 同我地講，呢d，咪就係皇帝蟹囉! 「煮熟左就係紅色，同呢張相一樣」 點擊圖片放大 煮熟左既花蟹會進化成皇帝蟹，Totally係過程中出現基因突變吧？ 平滑既甲殼受熱過後，會即刻生出皇帝蟹身上既刺刺黎， 個八隻明明短小而扁平既腳，都會瞪時被拉長成肉腿，修長到要屈起身先得， 唔怪得之韓國d女仔個個對腳都咁鬼修長啦，日日沖涼都浸住熱水， 對腳唔長就怪啦，我識條鐵咩............(哭) 就係咁我響漁市場度，上左堂非常寶貴既進化論Evolution，果然活到老學到老， 只可惜我驚上碟之後，蟹哥d手手腳腳突然之間又萎縮左， 連d蟹羔都收縮埋一注，變成左今時今日既海膽， 就真係唔抵食啦，都係唔食啦，安全啲好;( 響阿珠媽準備要撓起呢堆 生化皇帝蟹 之際我制止左， 只係拉住薑薑行返去另一檔，岩岩曾經見過一眼既海鮮檔， 入面有平民皇帝蟹選擇，終於可以放心進食。 可能時間太早大家都捉唔切，所以開既價錢係數倍， 再者成個漁市場得佢地唯一一檔有皇帝蟹食 雖然黎漁市場早就作好被劏既準備，但從來就無放血既打算...囉... 只好改食長腳蟹，然後再Order左份海腸，突然阿珠媽語重心長咁提問: 「你地...真係要食海腸?....」 當然!!有咩問題??點解??莫非又係生化海腸乎??今次又會變d咩?? 親眼目睹海腸既剖腹過程後，我同薑薑都後悔到極 薑薑仲自此留有永不磨滅對海腸既陰影，連去韓國都有陰影了.... 點擊圖片放大 霸氣海鮮Brunch: 長腳蟹、左口魚、右口魚、八爪魚、海腸 結數後食材連加工費總共73000w，總價錢大慨HKD 500左右 D生八爪魚一時無為意揀左大隻既，所以一D都唔啜口 再者，呢碟生八爪魚同海腸真係令到薑薑淪陷崩潰唔敢放落口... 飲個蟹蓋湯暖暖胃再繼續拉鋸戰=] 而我同堆海腸都駁鬥對恃左近一小時， 果然係好頑強既生化海腸，死唔去 去左明洞站搵呢間匯率最高既找換店換錢， 又食左超好味既Issac三文治做Tea，時間剛剛好， 準備出發上山去南山N Tower睇日落~睇有名既愛情鎖浪漫下先♡ 本來齊齊搵纜車搭，結果搵搵下已經行左上南山塔............ 點擊圖片放大 搭完纜車仲要行一大段路，反反覆覆先到roof terrace睇愛情鎖 點擊圖片放大 好可愛耶個a-ga-si~♡ 唔知幾時到我有得同我條佬整埋一份~嘿嘿嘿!!♬ ♪ 浪漫完之後，薑薑提意上南山塔個觀景台參觀下~ 不過貴得離譜又多人，最後選擇附近走走就可以了~ 仲食到薑薑誠意推薦畢生難忘既雪糕油炸鬼♡ 落左Trick Eyes既3D館分區玩到顛狂， 臨走仲有幸見到呢個咁靚既紅夕陽! 返賓館放低晒D野之後真係大覺訓，到夜晚9點左右， 先至出發鐘閣站搵出名既鰻魚飯食~四周圍都得D酒氣紛紛既「阿則司」 而家先知~原來韓國9點打後，好少女生會走出街， 因為夜晚先係「阿則司」既天堂，我同薑薑真係大冒險耶~ 難怪入去開飯時，「阿則司」都投以奇怪目光，兩個咁唔正經架XDDD 兩個干物女終於一試韓國有名既馬格利酒，味道好似梳打水咁 不過天氣凍可以暖一暖胃～嘿嘿!! d鰻魚的確唔錯既~不過我始終比較岩淋身鰻魚，多過彈牙既鰻魚 仲叫左呢個鰻魚石頭鍋飯！打破左我一直對石頭鍋飯既焦慮不安 因為我響紅磡新都會個Food court曾經食過一次，亦都係我唯一一次既石頭鍋飯 個次差ｄ要入醫院，真係好恐怖，自此我連Food court都唔敢再去 今次如果唔係薑薑堅持話，韓國既石頭鍋飯真係超好食，一定唔會食～ 食飽晒散步一下~一抬起頭就係滿空靚靚既夜櫻呢♡
