地點:鹿兒島@九州 桜島(さくらじま)__*鹿児島市 ♬ 鹿兒島既象徵，第一站就出發去櫻島火山~.....>>遠眺 就係咁樣對岸遠眺一下，比30分鐘自由時間你周圍影下! 點擊圖片放大 +3 都岩既，櫻島到而家都仲係一座活火山，火山活動依然十分活躍! 但係點解下午去既阿蘇火山又唔規限既? 上圖係曾經既火山灰~諗諗下應該慶幸個團唔駛上山~點解?? 因為對上爆發係2013年8月(至今半年多少少喳..")， 嚇鬼下大家先=p ....... .............. 根據報導指，爆發事件係上年13年既8月18日，櫻島既昭和火山口， 就係響當地時間下午4時31分發生噴發現象，噴出黎既煙柱達5000公尺之高， 仲創下左觀測火山活動以來既最高紀錄!見到張圖都驚!真係新聞網Link過黎架! ......... .................. btw，忘記不愉快不安事情吧~入返團繼續未完既行程! 咁大家眺完影完相，就又落去土產店閒逛下掃下貨~ 鏡頭一轉，我地睇返日本大根=] 呢碌蘿蔔真係食一年都食唔完! 個士多店老闆娘就Hard-sell話係大根旁邊既種籽種出來! 點擊圖片放大 桜島輪渡__*錦江灣(きんこうわん) 出發去搭咩錦江船，話可以欣賞下呢個櫻島同鹿兒島既景色 事實上根本係橫水渡模式既停車場(連人帶旅遊巴一齊座過海) 只係偶然比D時間我地落車去下廁所，順便可以吹吹海風! 船頂凍到面癱....個個團友無此一著，Pann媽旁邊位置都係得小貓一隻 因為無人敢走出室外範圍，遑論仲要吹海風呢...然而，10分鐘就渡左對岸啦噃兄台.. 導遊哥哥喳喳臨，響旅遊巴度Hard-sell團友們護膚品同零食賺外快 然後帶我地去食Lunch!!有得食返第一日導遊哥哥幫團友們訂既海鮮刺身等等啦~~ ふぁみり庵 別亭__*鹿児島 點擊圖片放大 +3 我們這一家係咁易平平地訂左:馬臭刺身、牡丹蝦、葡萄蝦，過下口癮! 點擊圖片放大 +2 隻葡萄蝦無錯係有好多籽....但係呢D綠色既蝦籽一啲都唔好食... 食一啖都覺得自己似山番蠻夷咩都活生生食...感覺好唔妥當... 不過舊蝦肉就真係無得頂喇~~~(Show off) 食飽飯後出發去阿蘇火山探險，道聽途說阿蘇山唔係次次都撞岩咁好彩比你上去架 經常要封閉唔比旅客上，好多時圑友都要摸門釘或者被押後時間， 因為上面依舊經常有頻繁既火山活動，無錯!阿蘇至今依然係一座活火山， 所以對於今朝只能遠眺櫻島火山既行程，有點百思不得其解(??) 不過事實上阿蘇山排名，只係僅次於霧島山(九州計櫻島>霧島山>阿蘇山)♪ 相比下點都係最安全....既~(安全個鬼啊，而家就口響...即刻就出事) 阿蘇山西駅__*阿蘇山 去到阿蘇山纜車站，望見出面尚算陽光普照依舊風和日麗，旅遊巴車門一打開 眼見團友一個一個咁行落車時，一行到地面，突然個個都攬到自己實一實飛奔入纜車站 老老嫩嫩不算良於行都咁樣跑，韓國之旅既彈跳模式又重現，有唔妥=\ 果然一行落地面，好凍!!超凍!!超級凍!!氣溫顯示負二度， 加上方圓百里無遮無擋，就得個無敵景觀加埋山上獨有既懍然強風 一落車，全身都彊硬左，四肢係凍得疼痛想裂開個隻，都係對耳仔... 我Feel唔到隻耳仔啊!!好驚啊!!耳仔凍到紅晒要甩落黎啊!!好痛好痛!!我唔想睇火山啦! 原定我地行程指定係搭阿蘇纜車上阿蘇火山口，突然導遊哥哥同職員交涉左好耐 "取消，上山纜車取消" 嗄!!點解取消??點解??導遊哥哥話，職員認為今日搭纜車上去似乎有點不便 又點解??因為好似阿蘇山有點鬧別扭(唔知點譯個意思好...明就得啦) 風勢又似乎好似有點不妥當，所以安全d還是暫時封閉 但依然可以搭阿蘇既Shuttle Bus上去，阿蘇山還是安全的，放心啦=p............... .......... ................. 點擊圖片放大 阿蘇山（あそさん）__*熊本県 ♬ 熊本縣既象徵~係啦?點解??點解呢?岩岩Post返d相上黎睇， 第2張相明明左手邊都已經拍到起緊煙，無人會覺得有d唔妥當既眉目?? 莫非每個火山特徵都係咁噴煙(溫泉間歇泉都係咁啦係咪先)， 所以被所有人都忽略??說時遲那時快，人人都爭住跑上去影火山口， 走到指定最佳拍攝位置影張到此一遊相之際， 係人都發覺周圍環境點解會愈來愈暗同黑，咩事 (至少我雷達一直打開左，唔係邊黎拍得D煙霧咁有鋪排) "火山灰可輕易便遮住陽光，導致氣溫下降，且伴隨著有毒氣體， 對人體有很強既刺激性，會對肺部產生傷害， 特別是老人家，兒童和有呼吸道疾病的人" 突然鄧Sir上地理堂教過既有關火山與板塊運動返晒黎， 呢個Moment我痛恨(定慶幸?)自己原來有聽書，會考個陣唔見我記得? 我要拍低成個過程，TW有咩事，執到部相機都知呢日發生嘜野事， 個陣個腦剩係諗到呢樣........ ................... 原來我遇上，阿蘇活火山偶然一年都會有幾百次，既頻繁火山活動了=] (註:火山運動絕對唔等於火山爆發，係既話，我而家應該唔可以，食住燒味飯打Blog=p) 點擊圖片放大 阿蘇火山口突然大幅度煙霧瀰漫，完全零視野仲好臭好臭好刺鼻!! 大家一頭霧水之際，剩係見到明明一直搶住響火山口影相賴死唔走唔讓路， 要擺齊港女十式先肯走既個班自由人，突然通通雞飛狗走跑離開火山口仲v嘩鬼叫， 有D遊客就衝入俗稱"蘑菇亭"既緊急避難所 導遊唔知掟咁仲帶住我地團友逆流而上，大喊住「同志們!!我們衝上去!!」(你傻架???)， 話而家d人群散晒係好機會，叫同志們拿臨衝上去火山口影張相即刻走!(What???) 睇住個導遊衝到一半，先發現勢色不對，急急剎停班團友叫快D調頭走， 點擊圖片放大 往返阿蘇火山口同西駅既Shuttle Bus瞪時供不應求， 睇住d工作人員通通戴晒罩，一直仍緊守住崗位指揮大家同d Shuttle Bus 另邊廂響火山口食風等救援既我地呢一群，一直就咁聽住個中央廣播， 一直多國語言咁重覆宣佈: 「硫磺乃有毒氣體，請大家掩住口鼻避免吸入，並等待救援馬上離開。」 聽到段咁既野，個個唔爭車上....就奇喇!!!有d人唔夠位都格硬塞上去車門 原來係風勢突然轉向，將火山灰噴出黎既硫磺全部吹晒黎， 根據阿蘇火山觀光提示: 火山煙霧含有害人體的二氧化硫，若二氧化硫含量過高、 並且風向正朝著觀光區域，對人體會造成危險。 另外二氧化硫溶於水係會形成亞硫酸(酸雨既主要成分)， 好彩無撞埋落雨!!!唔係就真係大鑊了! /////////////////////////////////////////////////////////////////////////// 被困火山有感而發(不喜勿看): 當然無咁嚴重，只係普遍會發生既火山活動， 但反而留響原地等待救援個段時間，先突然開竅，人命原來真係咁渺小同脆弱， 個陣諗，若然我處境真係被困山上、機上、海中心...etc 而身陷不能自由逃生既處境入面，就真係得等死既份兒，分別只在於主動同被動; ------------- 然而，最教我大開眼界既，係等Shuttle Bus來回救援期間，所見識到既醜態 個班有幸擠到上車既乘客，知道自己得到救援之後， 自不然好慶幸咁鬆一口氣拍拍心口，然後冷眼望住地上面車外面， 仲等待緊救援，已經非常不安憂慮既其他人，會心一笑; 好幾個，對地面既我地呢群人，竟然列齒揮手講Bye Bye， 最後，仲有好幾個乘客，都對住我地...影相 以上既，無親眼見，係唔會相信，呢班半點惻隱之心都欠奉既_「人」 我身旁企住眼見既，只係幾個著緊自己小朋友會吸入過多而憂心不已 攬到自己小朋友實一實，響呢個負二度既低溫下，仲除埋自己身上件外套， 套實比自己小朋友驚佢地凍怕佢地吸太多入身體，靜靜咁等待下一架救援車 而你地當馬騮戲咁睇咁笑係咁影??你架車安全落左山啦咩而家???disgusting 唔係奢望你地做d咩，大家都只係普通人，只不過唔好幸災樂禍，已經夠 \\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\ 終於逃出活火山，剛好黃昏時間， 個夕陽光真係好似耶穌光，我地安全離開保了小命 落山之前有段自由時間比大家響阿蘇土產店逛逛， 愛姊們同娘親一人一支雪糕定定驚~好味啊!!(聽講) 仲比我見到馬油!!但要成5xx港紙都要??好貴啊!而且個Gip都唔知放唔放得落... 點擊圖片放大 +2 然後出發去草千里♪~係一個可以清楚睇到阿蘇火山口既一個大草原 點擊圖片放大 +3 草千里(くさせんり)__*阿蘇山中草原 肉眼所見阿蘇山都仲噴緊煙何其壯觀耀眼，卻半點仍High不出來， 感覺上依然挺感慨很無感的說，個班人依然瀝瀝在目，極度嘔心， 或者係我吸入過多二氧化硫，所以感到頭眩呼吸困難兼噁心啦 烏帽子岳(左) & 杵島岳(右)___*米塚下園地 返酒店既行車途中，經導遊哥哥脫口而出，而我來得及影既一張相~ 本來係想影米塚~一個又稱之為 布丁山 既一座山， 因為外形就真係好似倒放左既布丁一樣 好可愛~可惜影唔切~唔夠導遊哥哥把口快!=p 要返酒店喇~今晚住蒙古包酒店~好可愛好可愛❤ 點擊圖片放大 +4 阿蘇ファームランド___*阿蘇 呢度依然屬於阿蘇範圍，所以溫度依然Keep住得幾度， 加上近乎萬里無雲無遮無擋既環境下，咁就更加之咁冷凍=] 入到蒙古包居然意料之外既非常非常咁溫暖熱烘烘 ♪ 點擊圖片放大 +2 ♫舒服溫暖到唔想郁~唔想行唔想走喇~ 仲聽講呢度有好多款好大型好多款色既溫泉浸~ 有紅酒喇、牛奶喇、人蔘喇、山藥喇、玫瑰花喇....etc 抱歉的是沒我的份兒...只有牙痕個份，兩位愛姊仲要幸災樂禍我有得恨無得浸 我從來都相信呢個因果=]，現眼報了 當又試剩返我一個人留響蒙古包沖滾水涼當浸溫泉既時候， 雖然孤零零冷清清，不過間房真係超暖耶~好舒服~~床鋪又軟林林暖笠笠~~ 頭頂仲有個觀星既玻璃窿~好鍾意❤♥偷偷地出去快拍再逃返入房~ 點知無幾耐娘親愛姊佢地三個轉頭就返左黎，兼且仲要一肚氣面臭臭，咩事 「唔浸好過浸!!未見過咁垃圾咁差既溫泉架!!」 咁激動?咩事??A泉唔得咪B泉、B泉都唔得，咪CDEFG泉， 反正有近百個任你地浸...(不屑)原來係阿珠媽事件簿， 話阿珠媽侵占左整個溫泉區(就話左日本同韓國等同香港過澳門，好近) 成噸既阿珠媽(要數以噸計XDD)每個都逐個泉去.... 搲腳皮、擦老泥、洗頭髮、留低佢地既足跡同腳毛~ 開頭以為佢地吹水~果然事後聽講其他團友一致個個鬧爆話要投訴， 來得真是時候 ♪ 因~果~~ =p 後話:個個就係為左影下面呢一張相，差D落都落唔返黎，呢張相真係唔易影
