下一站→淘金鎮Sovereign Hill__* 今日似乎係團友們最為雀躍興奮不已既一日行程，去淘金場參觀兼且遊覽旁邊既黃金博物館！ 點擊圖片放大 +2 睇黎富貴於我如浮雲，又或者富貴對我黎講實在係遙遙無期？響黃金博物館裡面睇過欣賞過Ｄ咩，小女完全丁點兒印象都無，如果唔係當時響入面影左一大堆蠢照，都唔記得自己去過黃金博物館，大媽們真係當人地黃金博物館係ｘ大福定周ｘｘ，佢地響盡頭既賣金處真係幫襯博物館買金粒金箔..." 點擊圖片放大 +2 終於出發入去淘金場參觀，成個淘金鎮滿街大巷都係超特色建築~~連入面撞口撞面既工作人員都係著晒中古時代既服裝超有FU~好優哉悠哉咁Q住身邊人閒逛大街小巷對遊客Say Hello隨便合照皆可~ 不過未到自由Hea時間，因為第一站係要去左地下模擬既礦場度體驗咸豐年前既礦工生活同模式係點樣!有得座礦車落去玩!完全伸手不見五指，刺激緊張又興奮@.@ 點擊圖片放大 落到地底感覺真係落左地獄咁款....又濕又凍冰冰又漆黑一片...剩係靠個幾盞微弱壁燈一直上路去盡頭完全唔知係咩既地方...導遊大叔又講恐怖野...「跟實d前面千其唔好亂咁行，大家都眼見呢度四通八達全部都係分岔口無盡頭，走失左搵返算你好彩，搵唔返就真係上唔返去(人間)」。 終於到盡頭啦!呢個模擬礦場既最終目的地，就係要大家搵到呢條金脈!!嘩~我採到金礦啦!!! 上返地面之後，我地就跟住呢個紅衣大嬸去淘金河度齊齊試手氣玩淘金!不過淘金前一定要聽大嬸講解15分鐘淘金過程同注意地方先比你落手...小女聽唔得耐捱唔到2分鐘，唔係貪金，係大嬸似乎無刷牙，極度強烈菜渣味濃郁不已既口氣，真係見暈唔係講笑!!個陣酸腐餿臭味教我揮之不去到而家都， 小妹都係過下手癮撈5分鐘算了，我唔敢用泥水浸住對手太耐因為真係見痕會紅左一撻撻，為左只有千分之一機會去淘一粒唔一定會有既金塵，用僅有既一個半鐘自由時間去換，計條數完全唔Balance，我會選擇閒逛感受下呢個特色淘金鎮特色店鋪! 每一間鋪頭都好有特色一定要入齊晒去先會有所新發現~最意外居然找到一家賣糖果小店~好復古呀~~ 實在太多特色店鋪花多眼亂，又入唔晒咁多間!買左遮糖，雲尼拿籽蜜糖，維尼攪攪棒~仲去左呢間好特色既舊式麵包度買批食~ 眨下眼已經個半鐘完左!都未行得到大半仲遲到上車添....第一次要全車團友等....回程時大家Share自己既收鑊係「撈極都撈唔到一粒!」「我都無啊，好難撈!」大姐們......比你撈到真係比你無條件免費拎走噃....有無咁易一人一粒做手信....果然有個大媽呢個時候展示佢手上個吉樽，「嘿!!我就撈到呢你地睇下!要好似我咁撈足咁耐先得架嘛!!~有技巧既!!首先要...(下刪)」大家都哄個頭埋去，要用兩指掙開眼皮先睇到呢粒金塵。 出發The Twelve Apostles 12門徒石，景觀不錯但略遜海獅島!平凡人如我所見的，只係幾舊大石豎立海平面上面之外就無咩特別，唔叫12門徒叫12生肖又得、12星座都得！我比較印象深刻的還是那時在海獅島的溫暖陽光和碧海藍天=] 影完相回程時又有自由Hea搵食時間~隨意入左間pizza hut~居然意外食到個羊仔Ribs，超正!!!好食!!超好食!!Pizza既芝士多到漏好似食心太軟咁~~食飽去散步一下，點知愈行兩隻大脾就愈痛，先發覺肥得濟加上天氣真係好乾好乾，大脾磨到甩晒皮損晒，仲一粒粒痛到行唔郁！拿臨要去便利店買支曼秀雷敦搽搽搽，瞪時痛到飛起眼水直標!!T_T 點擊圖片放大 晚飯諗住親切D去唐人街幫襯下，去左食唐人主理日本菜，有鰻魚飯、日式炒飯、帶子刺身、天婦羅，響外國真係千其唔好食西餐以外既野，未食過咁難食既日本菜，刺身係熱既(暖都唔係)，炒飯可以完全炒到飯蛋分離，等同一碟只有鹽味既白飯，天婦羅只有滿口炸粉漿味咬唔到有蝦肉，師傅實在係神乎奇技小妹佩服得五體投地。 今晚最後一日留響Melbourne，聽朝又要一大早起身，準備再一次既868公里大巴長征了，閒逛時的小發現，原來Melbourne既交通燈過馬路時，紅燈係會好似巴斯光年出動咁會真係”蕉一一一一”一聲好搞笑仲好大聲~~~哈哈~
