下一站→Blue Mountain__* 一大清早廚房已經七國咁亂，Uncle Kenneth正響度忙住整一個有成呎長既蛋糕(佢做甜品師傅的)，原來話夜晚有Order要送去教會，就係咁緊係唔好放過咁大好機會，跟阿甜品師傅學野兼拍片啦!! 拍完片既同時，Auntie Elva都話食得早餐啦叫我地出Backyard食，早餐係非常之營養健康既餐肉蛋麥包+無糖有機豆漿，Uncle Kennneth一家都係頗注意營養健康的， 一踏出Backyard柵欄準備食早餐，天啊~點解可以可愛成咁~~~我終於見到琴晚扮鬼嚇我個兩姊弟喇~~ 細佬叫Jayden(2個月大)、家姐Hannah(4歲)、仲有寵物雞....阿菲(年齡不詳)=]呢個Hannah完全阿崩叫狗愈叫愈走，呢張係唯一一張可以座定定影到佢既相!無錯係唯一...食完早餐就出發去Blue Mountain探Three sisters三姊妹嚕 ♪ 點擊圖片放大 藍山特別之處係，眼前一覽無遺既樹林入面，每棵樹既樹葉都會釋放出一層，只有樹熊先至會被吸引到會愛不釋手既不明氣體，從而形成出一層藍色既薄霧Blue Mountain個名就係有個咁既由來!至弊我任何角度睇都剩係覺得係綠色...我都係無呢個藝術觸覺的了..............;( 落呢條咁斜既山路時候真係好驚，呢條近乎成直角似既樓梯，最奇怪係愈接近Three sisters所在位置，風勢就會無因由咁不停每況加強，我係必須要用到>>颶風呢個極端字眼去形容當時身處位置既風勢，眼前個條明明非常牢固既木吊橋，人人係可以完全企唔穩，要手拉手抓實扶手行先行得過，每踏出一步都覺得就快要吹落Blue Mountain底部去陪呢三姊妹真係.........最後三姊妹姑且肯放過我地，只係沒收左我頂帽吹左落山陪葬。 之後響附近一個市集閒逛~居然咁岩撞正有跳蚤市場開放!!正啊!!! 同Elita再另外去左夾少少糖做乾糧,搭車出發上Scenic world搭下呢個有名Railway & skyway， 點擊圖片放大 +2 本來Elita仲興致勃勃自動請纓話可以自己帶我去座呢個Railway的，意思就是要脫離Uncle Kenneth同Auntie Elva喏~因為兩公婆真係唔多敢玩呢個傾斜角度呈52度既峭壁列車Railway，所以話咁響高空餐廳食住野等我地喏!就響大家都雀躍不已既情況下終於座左Railway落山參觀一下，無奈回程時遊客真係實在太多，座車落左去就上唔返黎XDDD，意思係，等候時間非常非常耐， Elita看似一直都好獨立，就響踏入等候中既1個半小時後，Elita終於突然悄然落淚嚇到我震，前面個鬼佬同佢老婆都非常懷疑咁望住我，我幾時變左拐子婆????「做...做咩事Elita!!」「我好掛住爹地媽咪...我好驚...」「驚咩呀???」「等左好耐仲未見到媽咪...我好驚見唔到....」「唔...唔會見唔到啦當然!!只係排隊排得太耐太多人!好快見到媽咪!!」「就離2個鐘都仲未上到車又無郁過...會唔會見唔到...我未試過離開爹地媽咪身邊咁耐...聲又聽唔到...好驚...」個剎那我真係巴不得衝去頭位插隊，我仲驚過你....完全手足無措好似愈講只會愈令佢不安，只好不停哄佢又影下相咁等佢暫時唔好諗排隊問題...只見張張相好似被捕兒童咁痛苦表情T_T 終於上到車返到去餐廳.............Uncle Kenneth同Auntie Elva仲恩恩愛愛撐緊檯腳食tea，不過Auntie Elva明顯都感到剛剛既完全失聯有點放不下心，果然，Elita見返爸爸媽媽既時候，嘩!!!!!!!!!喊到收唔到聲攬實Auntie Elva!!Auntie Elva瞪時嚇一大跳望住我問係咪Miu姐姐蝦佢做咩喊.......Elita喊飽先咽住喉解釋話等車太耐好掛住佢地所以喊....我嫌疑先至被洗脫.......喊飽當然開心返胃口都大增返，當小妹妹真好....我也想哭...然後就座Skyway落山，準備出發去我期待已久既海鮮市場Fish Market食夜晚個餐~~ 點擊圖片放大 無啦啦天黑黑落大雨.......去唔成Fish market所以Auntie Elva話既然係咁佢有好介紹!同我去屋企附近佢地食開既一間海鮮凍肉鋪，話個度既三文魚刺身都好好食又好平~蠔都好新鮮好好食添~就係咁齊齊去左唐人街買夜晚既海鮮刺身大餐既食材了~ 仲食左個超好味Auntie Elva讚不絕口既一個越南法包!!睇佢外表平平無奇，點知一咬落口就停唔到口仲要搶食!!好好味~「好____嘞♪臨食呢個豐富海鮮大餐之前呢~~有個非常重要既地方一定要去左先~作為今日全日壓軸既重頭節目~~」「咁我地要快啲去左先啊媽咪!!唔好再講啦快d出發啦我地!!好期待啊!!個度真係好開心好好玩!!」嘩嘩嘩~~帶我去一個充滿歡樂同喜悅既溫暖地方，話仲可以識到好多人大家齊齊玩好開心，瞪時搞到人地鬼死咁興奮開心又期待，臨出發之前仲要去埋Coles大型超市買左一大堆乾糧先??咁特別!!終於，都到左呢個充滿神秘感既地方，從外牆睇落去就係一座非常古老既紅色磚牆建築，正要拎起相機之際Auntie Elva已經急不及待拉左我入去呢個充滿溫暖既地方 ............. .......................... 「而家，就請在座各位弟兄姊妹，為我地在場既每一位弟兄去禱告及祝福，我地齊齊閉上眼唸主禱文」係一個完全零概念既無神論者面前，一合埋眼已經恰著，一合就恰....我都唔想架...我真係不停搣大肶迫自己提起精神醒定d，但真係不由自主就恰著左，一合埋眼就訓著.............終於成功幫呢15位弟兄姊妹輪住冥想祝福，就開始食一個非常似曾相識既蛋糕...........對，就係今朝我拍低左成段片，異常興奮的那個教會蛋糕，今朝仲好恨食......突然之間個蛋糕已經完全提不起我既興趣...........最後教會方面都送左兩個透明膠水樽比我呢位新弟兄話係迎新禮物，我只好轉贈比Hannah同Elita。 回到家終於有一餐非常豐富既海鮮刺身大餐，幾驚Auntie Elva懲罰我祈禱15次訓足12次而唔比我食.....食飽飽就齊齊玩Uno同Wil喏~
