十年前，我仲喺機場返緊一份需要輪班既工，某一日因為心血來潮，收工後去咗游水。當時距離上次游水，應該都有十年。可能好似好﹝行﹞咁，但當我一落到水，以前曾經喺泳池入面感受過既所有快樂，都一一出現返﹐有種「回家」既感覺。之後我就開始日日游水，無論返咩更份，我都會抽兩個鐘時間去游水。呢個習慣，維持咗一年。游水係我唯一一個比較有自信既項目，其他運動我都好弱，所以我點都諗唔到，有一日我竟然會去跑步…離開咗機場份工之後，唔肯定出於咩原因，令我喺3個月入面，肥咗足足5x磅。由10x去到依家16x磅，真係一個好誇張既數字。然後直到1月17號既夜晚，接近11點嗰晚有啲涼，我坐喺梳化度掙扎緊，究竟去放多次狗好哎、定係沖涼上床訓呢？跑步 - 呢個念頭突然出現喺我腦海入面。於是當晚我就去咗跑步！唔計中學時期，學校規定要跑嗰2km，運動會全班一齊跑既2km，我真係無乜跑過步，加上依家個體重令我更加卻步，所以我相信我既起點比好多初學者黎講係更加低，所以好想喺度同大家分享下，呢接近兩個月既訓練成果。我第一次跑就揀咗條斜路，諗住短短哋，又唔多人，啱晒我呢啲社恐。但我跑完真係覺得好辛苦，先用google map去睇，發現原來條路都有2km我諗：唔怪得我禁辛苦啦！但辛苦係會有回報既，當我連續兩日跑呢段斜路之後，第三日我選擇跑返大街，喺唔經唔覺既情況下以無比輕鬆既狀態跑咗3km當時真係覺得自己好叻，仲忍唔住喊咗出黎。到第4日，我終於都裝apps跑，我配速10'30係好慢好慢，可能仲慢過某部份人行路速度，但見證住不停進步既自己，真係覺得好感動。到咗依家，3月3日我配速係08'49，PB 08'30暫時最遠距離係11.8km跑步的確係好辛苦，頭2k身體未適應到既時候真係每一步都想放棄，但捱過就會好。呢一個月既時間裡面，我開始搵到跑步既樂趣，係不斷進步既自己。初初跑嗰一個禮拜入面，我同自己講，目標係2025年渣打10k，但我依家改咗了。我目標係2025年渣打半馬、名古屋女子馬拉松。我希望到時可以話俾大家知，我做到，你哋都做到。
