一月的日本之旅，今年再去東京，因為東京真是太好血拼，另再加上輕井澤，血拼之餘又可以觀光享受溫泉！今次搭HK Express的凌晨機，未夠6點就抵達羽田機場！ 要買JR東京廣域周遊券，但因為羽田的JR服務中心要7:45先開，而市區最早開門的係東京站，不過都要7點半先開，所以就先係機場逗留一會！返香港個程會係成田飛，因此就上離境大堂兜個圈！ 上次回程都係成田飛，所以始終都未有機會睇到營業中的江戶小路！ 等到差唔多時間就搭JR去東京站！每次等車時都必定走去月台盡頭的位置睇下風景！咁當是睇咗日出啦！ JR東京廣域周遊券售價為10,000yen，可連續使用3日不限次數乘坐區域內的新幹線、特快列車，十分適合行程中打算到富士山、輕井澤及東京市區的旅客！以前其實有另一張售價8,300yen，都可以去到輕井澤，但係2015年尾時已停售，取而代之為呢個新的JR東京廣域周遊券，可以去埋GALA湯澤，但如果無計劃滑雪的其實就無分別喇！詳細售票地點、可乘坐咩路線同其他優惠可以去JR官網(http://www.jreast.co.jp/tc/tokyowidepass/index.html)研究！ 去到東京站的JR服務中心未夠7點半已經有約3、4組旅客係度排隊喇，雖然日本人十分準時真是7點半先開門，但佢哋亦十分貼心地早10分鐘左右就出嚟幫排隊的旅客先填form，咁一開門入去比$$就可以！ 買完JR pass，再買埋便當就趕去搭8點的列車喇！ 大約個半鐘就到輕井澤，一踏出車站，發現原來落緊雪！因為之前睇天氣預報無話會落雪，所以加倍興奮！之前假雪就見得多，但現場落落嚟的雪真是頭一次見！ 因為本身都諗住去星野浸溫泉，見網上好多人都推薦，所以就揀咗又經濟又近JR的APA (http://www.apahotel.com.t.ju.hp.transer.com/language/kousinetsu/01_karuizawa-ekimae.html)，只是步行約5分鐘就到，然後過一條隧道就係outlet，都真是又經濟又方便的選擇！呢次係expedia book，個期用恒生/citibank信用卡有9折優惠一晚連稅都是HKD548，仲包埋早餐，又有地方泊車，真是幾抵住！房價參考 (https://www.expedia.com.hk/Karuizawa-Hotels-APA-Hotel-Karuizawa-Ekimae.h3906576.Hotel-Information) + 最好book房前check下有冇做緊咩信用卡優惠，因為要付款前輸入優惠碼，唔是佢是唔識自己幫你扣ga！ 剛係JR沿路行過酒店時見到有幾間租車店，心思思去咗APA對面那家問下價！4,500YEN一日，住APA仲有折，交車前入返滿d油就ok！因為估計幾間應該都差唔多價，所以無再特別格價就決定租喇！ 租好車後，先去outlet兜一圈！ 玩到1點左右就返去拎車！其實考完車之後就無再揸過，本來都十五十六唔知租唔租車好，但嚟到見到唔太多車又唔太多人，同埋日本人較禮讓，考慮到如果慢駛40km應該無問題，所以就展開咗我的第一次「驚心動魄」自駕遊！不過，都是建議返如果係香港比較少揸車而又想自駕遊的，都是出發前去補返幾堂會安心d！ 首站先到舊輕井澤，因為輕井澤係一個避暑的地方，所以嚟到冬天，再嚟到舊輕井澤，真是成條街想搵個人影都無，有d商店仲無開門添，不過都別有一番風味！ 嚟到輕井澤當然唔少得參觀教堂，到此一遊舊輕井澤的其中一個教堂"輕井澤shaw紀念禮拜堂"！ 周圍逛逛後，行到一間叫"川上庵"的餐廳，見佢入面的感覺幾舒服，同係呢個人跡罕至的時候都有幾台食客，所以就入咗去試試！兩個人分別點咗鴨肉冷蕎麥麵同炸蝦天婦羅套餐！ 炸蝦天婦羅套餐，賣相同味道都好好！ 鴨肉冷蕎麥麵，雖然鴨肉份量就唔算好多，但鴨的鮮味都帶到出黎！ 食飽就出發去我哋下一個目的地—白絲之淹！雖然有GPS，但唔知點解仍然都是迷路！又上山又落山，都唔知揸咗幾耐終於行返啱上山條路！之前去旅行如果坐完凌晨機第一日一定無時無刻都想瞓，但今次坐上咗個司機位，再見到呢堆有薄雪的山路，真是成個人腎上腺標升，飲完雞精都無咁精神！ 唔知揸咗幾耐，兜咗唔知幾多個圈，兜到我差d以為自己係拓海龜速版，終於都到咗我哋的目的地—白絲之淹，好彩去到都未天黑！冬天時有一層薄薄的雪，唔知道夏天時又會係點呢？！ 因為景點範圍不大，而且又就快天黑，所以都是逗留咗廿分鐘左右就走！之前提過輕井澤冬天唔係旅行季節，所以d景點巴士的班次亦超疏，呢個亦是我決定自駕遊的主要原因之一！就係我哋嚟到呢個鬼影都唔多隻的白絲之淹時，就見到有個男仔好似龍貓咁自己一個企係個當時應該係零度以下的雪山等車！本身同佢講如果我哋走時佢都未等到車就車埋佢，但到我哋走時佢已經唔見咗...應該是等到巴士吧！ 落山時就真是差唔多黑晒，好彩沿途都無乜車，所以慢慢行都ok！ 驚足半日，晚上去食返餐好！之前見好多人都推介 "ろぐ亭"，所以又兜去試試！ 只是又一次明明有GPS都迷路，經過咗一次望唔到門牌錯過咗，之後上山上到半路，經過埋星野覺得唔對路先返轉頭，幸好最後都搵到！餐廳外感覺很家庭式！ ろぐ亭—輕井澤食燒肉出名的餐廳，有好多唔同選擇，可以叫set又可以揀放題，但因為我哋都食唔多，所以就叫咗個set算！ set meun 單點 點擊圖片放大 滿腹燒肉放題！ shabu shabu 燒肉 我哋叫咗的2人set！佢的和牛真係入口即溶，特別係又凍又驚完大半日後食，特別好味！其實唔太夠喉，但因為之後返東京會食六歌仙，所以到時再食返夠吧！ 仲有salad任食！d蕃茄仔真是又甜又新鮮！ 嚟到輕井澤當然要飲輕井澤啤酒啦！ 食完滿足的一餐，就起程返酒店，途中見到有間大型超市，即刻急轉彎去入貨！ 介紹唔同的輕井澤啤酒 入完貨，就返酒店喇！APA有新館同舊館，有新當然book新館啦！同訂房網站中的相片都算相符！雖然就真是比較細間，但都算幾新同乾淨，再加上地點方便，如果只是為宿一宵或無budget book皇子集團的酒店，APA都是一個唔錯的選擇，但如果一早諗好會租車，其實都可能會揀其他！ 點擊圖片放大
