日前參加樂高90週年巴士遊，驚覺而家嘅a世代（2010後出生嘅小孩）日常生活以科技主導，舊時時興嘅玩意，如吹波膠、搖搖、超人迪加對佢哋嚟講甚為陌生，不禁感嘆時移世易。 筆者當年讀書時，最期待可以喺課間休息、體育課上同同學玩一啲集體遊戲，例如傳染病、麻鷹捉雞仔等，除咗享受遊戲本身帶來嘅緊張刺激感外，亦可以乘機同喜歡嘅同學親近，估唔到一個真·傳染病，令而家嘅小朋友有學不能返，舊時流行嘅集體遊戲，亦可能因此失傳。好在最近喺新聞見到有個大集團搞天台活化，請咗間得獎設計團隊── One Bite Design Studio，分別喺銅鑼灣區8個天台畫上唔同年代嘅集體回憶，如跳飛機、一二三紅綠燈、畫鬼腳(Wall Art)、狐狸先生幾多點、麻鷹捉雞仔、天台學校放紙飛機以及天台遊樂場放西瓜波等，咁樣日後同啲仔女講阿媽係點長大，都叫有啲相俾佢哋睇下。點擊圖片放大 呢啲畫除咗幫80後、90後記錄低舊時代嘅痕跡之外，亦促進咗文化嘅傳承，希望而家嘅人打住復古嘅旗號收藏古物、古衫嘅同時，唔好漏咗非物質文化嘅傳承。
