Blog: jagsmiles.com Facebook: facebook.com/jagsmileshk Instagram: instagram.com/jagsmileshk 旅途上剛巧路過的一餐，經新加坡飛悉尼，中間碰巧有7、8個鐘等轉機，於是，又出境探一探這個每年一到的城市 - 新加坡。日子有功，現在遊新加坡已經不用帶地圖，況且只是數小時的速遊。 不太喜歡Orchard Road的繁囂、肚子吃不下胡椒辣椒蟹、China Town的熟食中心也快要打烊，我們選擇去較為年輕的Bugis逛一逛。Bugis Junction及附近的商店跟香港真的沒兩樣，卻偏偏被我們發現了一家創新又美味，揉合日式烹調與法國菜式的餐廳 - Miam Miam。 以木與簡約為設計主調的餐廳，裝潢型格。餐牌內嘅食物相張張影到好似stock photo咁，旁邊亦無列明「圖片只供參考」，而當侍應將一碟碟與餐牌內一模一樣嘅美食送上嘅時候，我倆更肯定這家餐廳絕非虛有其表。我地食咗四樣野，四樣都叫我地食過返尋味！ Soup Of The Day - Minestrone 蕃茄味好重，較香港的酸一些，配以香噴噴鬆軟的牛油麵包，是不錯的餐前選擇。 Famous French Toast 講到明「Famous」，咁就點都要試一試佢啦！同樣用上香噴噴的麵包，煎香後唧上忌廉，再配以西多士嘅精粹 - 糖漿。同茶餐廳嘅跟本完全係兩個唔同Level，麵包本身已經好出眾、好香，捨棄牛油而用上忌廉亦令口感更滑更香，再加上賣相吸引，唔怪得之呢度嘅西多士可以咁「Famous」！ Riz Au Curry 無吉烈豬扒同大蝦嘅日式咖喱飯，可以有乜咁好食？賣相有幾靚我就唔再講啦，佢個咖喱飯啲用料其實普通到唔可以更普通：腸仔、西蘭花、雞蛋、咖喱、飯，不果佢加咗樣超bit - 就係可以瞬間令公仔麵都變極品嘅...芝士！咁當然，佢地都將啲料mix得好好、好配合，咁先做到蔗渣嘅材料、燒鵝嘅味道啦！多嘅唔講，一個字 - 好味！ 最後甜品 - Valrhona Chocolate Souffle 足料炮製，朱古力味好重，外脆內軟嘅梳夫厘，精緻地為呢餐路過的晚餐劃上完美嘅省略號...因為，we'll be back！！
