「天空之鏡」絕對係人生必到景點之一，但先要搞得掂簽証呢關 呢篇文章以香港護照為主，係小弟2018年6月經由智利Atacama（San Pedro）入玻利維亞嘅經驗，之後可能有所更改，而BNO、台灣或其他護照，或者由其他關卡、機場入境都可能有所不同，歡迎大家補充。 由2018年7月開始，持香港特區護照入玻利維亞可以做落地簽，唔駛再喺Santiago或Cusco搞簽證，但可能成件事太新，你上網Search「香港護照玻利維亞落地簽」，都係search到同一堆廢話、各大網媒嘅新聞稿，但係咪真係得，似乎人人都各執一辭。 小弟成功入到，但又係咪咁簡單呢？ 我唔知大家點睇「落地簽」呢個Term，我理解就係好似以前台灣咁，去到機場填Form、俾錢，完，但玻利維亞要搞咁多嘢，完全唔係「落地簽」囉。 首先睇下各大網媒嘅官方資料寫乜： 1. 預先填好簽證申請表格並簽署。 2. 有效期不少於6個月的護照。 3. 如果將會進入黃熱病高危地區，需要有效的預防黃熱病疫苗接種證明。 4. 旅程路線單或往返機票及住宿訂單；如果入住當地民居，要有合法家庭住址的玻利维亞人的邀請函，邀請函須在玻國移民總局登記並公證。 5. 合法的個人經濟能力證明文件。 6. 近期個人證件照，4 x 4 厘米，白底。 7. 簽證費繳費單，費用30美元。 對於第一至六點，小弟可以做到，但因為玻利維亞個簽證唔可以太早搞，只可以15日內。即係點？意即你填完佢張Form，喺15日內要入境，如果唔係要重頭填過，而果張Form係有時限，過咗就要重新填。假如你10月1日填咗，而你打算10月20日先至入境，果張Form就已經過咗期，而你就需要喺15日前搵部電腦Online重新填過，因為張Form只係Valid 15日－－係，冇錯，你搞完一大輪要由頭到尾重新填過。 填唔係問題，最大問題係我填完後，仲要入果30美金簽證費，但呢15日入面我根本冇銀行、網上銀行有人又話佢唔俾，所以果30蚊我交唔到，而我亦覺得，「落地簽」應該可以「落地」俾，所以決定去到先算。 San Pedro de Atacama係就係一個旅遊城市－－周邊旅遊點中轉站，說穿了都係一個幾荒蕪嘅小鎮 另一問題係，個表格要15日內填，如果過咗要重新填，但小弟出發前15日內根本冇printer。當然如果你喺大城市如Cusco、Santiago應該唔難搵Printer兼俾得到錢，但問題係小弟喺呢15日裡面都喺Easter Island同Atacama呢兩個鳥不生蛋地方，就連Hostel都冇Printer，就真係有少少頭痕，好在後尾喺去Atacama前，喺Santiago機場（離境大堂中間information center）有免費printing，所以印到。 除咗玻利維亞嘅天空之鏡，San Pedro附近都有幾個，日落景極震撼！ 好喇，萬事俱備，我嚟到接壤智利同玻利維亞邊境城市San Pedro，都係對果30蚊美金有疑惑，就去Information center問問，喂邊境有冇得俾錢呀、我網上銀行俾錢得唔得呀？Information center答我係，曾經有香港人俾完30蚊美金、有埋繳費單，去到邊境都係要加錢，佢就此打去玻利維亞大使館問，對方態度惡劣cut佢線，所以都唔知係咪堅30蚊。 即係冇答到我問題，我決定唔理，直接去邊境。 我係跟三日兩夜團去（堅正，容後再講），去到邊境我心諗點都有司機幫我掛，點知個司機唔識英文，而入去個邊境關卡每次只限兩個人，好在有個同團巴西人幫我。 其他人一嘢就過得，偏偏偉大嘅特區護照就要一大堆嘢，我預備咗果份網上表啦、相啦、Passport副本（呢樣一定要）啦，連埋護照俾佢，條友左睇右睇，係咁篤佢手臂個玻利維亞印章，我當然唔知佢講乜，個巴西人都唔明佢講乜，佢係咁篤係咁篤，我同巴西團友以為佢問我知唔知果個係咩，點知個關員竟鬧個巴西人唔知佢講乜點做翻譯（留意返，巴西係講葡文，唔係西班牙文），搞完一大輪先知係要黃熱針證明！ 嘩頂，好在我有打！ 我俾佢睇，佢都唔得，話一定要有影印本，而佢邊境係冇得影印－－你都唔好幻想果度會Printer，好在我有影印，即時俾一份佢。 真係好好彩有印，網上睇到好多文章都話，過境根本查都冇查、唔駛影印，甚至唔駛打針啦！我相信就算你冇打針，應該都俾你入（如佢所講唔入高危地區），但如果你唔識西班牙文，可能又要解釋多半粒鐘喇。 然後，佢又要我拎行程所有住宿交通證明（即第四點）。我話，果份表咪填曬囉，佢都係唔得，要我白紙黑字一份俾佢。一來我根本冇Plan（Backpacker去長trip我點plan呀），二來手寫又唔得，咁你想點？ 佢竟然話，冇行程表唔入得境。 我屌你呀？ 巴西人好努力咁幫我翻譯，話行程表都網上入紙俾曬你（其實上網我都係亂寫，填表果陣係要provide埋行程，甚至佢pre-set埋你會去邊），一係我手寫有乜問題？條友仲係咁搖頭。最後出動到佢大佬，叫咗我埋一邊，同我講US$110。 我知道呢度係海鮮價，但爬文人哋最高都係US$90，你掠我US$110？然後我話乜唔係US$30咩？香港入境處Official係US$30，條友竟話，從來冇人俾過US$30。 ok, fuck that，俾就俾。我俾咗兩張US$50，一張US$10，條友竟然話張10蚊有摺痕唔收，都好在我身上仲有多張50蚊新錢，佢先至收，然後，竟然有得找－－喺佢自己銀包拎俾我。 就此，佢露出一個不懷好意笑容，俾我入境。我肯定果110蚊佢有自己袋。 你可能話我柒，唔俾定30蚊所以咁煩，但我相信隨時俾完30蚊你到邊境都係要加。 大家睇到後面白色果舊嘢，就係邊境，如果唔係跟團，分分鐘唔覺意非法入境咗都唔知 可能個個邊境都唔同，但經驗話我知，你有乜都唔該好影印定一份、有咩資料打定印出嚟，因為唔接受手寫。同埋，錢可以解決嘅問題就唔係問題，你唔好咁老定成身得30蚊美金，唔係真係一身蟻。 如果你唔肯定自己住邊或行程係點，個人建議你預計到大概幾時去到前，求其上Booking.com訂得間Hostel，玻利維亞Hostel價錢好平，幾十蚊港紙有交易，就算你真係取消唔到（留意返三日兩夜團係全程冇Signal），都只不過係蝕少少錢，圍返都不過係十幾蚊美金，呢度俾佢掠一掠都百幾蚊美金啦。 總結，落地簽係咪堅？係堅嘅，但係咪咁簡單，絕對唔係，兼有俾人留難多一陣。 同埋，排過境時如果你唔識西班牙文，最好搵個識嘅人幫你翻譯，唔係雞同鴨講加上班關員態度極奇惡劣，你想如網媒新聞稿所講40分鐘入到境，真係發夢都冇咁早。個人經驗，我上面呢堆嘢打出嚟就短，實際經歷前前後後搞咗近一個鐘，全車等我一個食早餐。 最後，我真係好感激呢位巴西團友。 過程係就係煩，但無論係天空之鏡、鹽湖錯覺相、一個個好似離開地球表面嘅奇觀，都值得你千辛萬苦咁樣走去！ 之所以，「落地簽」呢單嘢係堅，你都真係可以入到境，衰啲講句如果你有錢，捨得俾大舊啲錢，少咁一兩份文件相信都唔係咩問題，但如果你喺Cusco、Santiago等地有時間，可以去大使館搞搞的話，不妨預先搞掂，好過膽搏膽，過境唔知點算。可能小弟經歷係特例，始終都係危危乎，都無謂蝕成80蚊美金啦。 【延伸閱讀】誰說最美天空之鏡夕陽只在Uyuni 【延伸閱讀】玻利維亞鹽湖記（Part 1）：19歲的你在做甚麼？ 【延伸閱讀】玻利維亞首都拉巴斯（La Paz）最驚艷的「地鐵」是這樣子 原創小說已於香港正式上架，各大書局均有代售，海外讀者亦可於網上書店購買，詳情請看：goo.gl/3g4Hk8 全新自製Postcard正式開售，歡迎下單！詳情請看：goo.gl/Dfmpbc 台灣書局兼網上平台亦已上架，可去文中連結購買：goo.gl/xzCymP 更多資訊及文章，請Like Fb Page： 【有故事的旅人】 【晞。觀影記事】 IG請Follow： #travelerwithmovie
