星期一打風係屋企的冰格搵到之前買的西班牙豬腩卷，就唸整乜好，最後整日式叉燒，上網研究下，唯一冇材料就係日本清酒🍶同大蔥，蔥，趁未掛8 號風球就落街買齊材料整日式叉燒，原來都唔係好難，整咗兩三個鐘，整完雪了一晚，昨天切開好成功，用埋個汁整咗幾隻日式醬汁溫泉蛋，昨晚Mix 埋蒟蒻麵加咗菜，日式叉燒及溫泉蛋一齊食，又唔錯喎，日式叉燒好軟熟，一啲都唔UN，我都係第一次整日式叉燒☺️，好成功，有興趣的朋友可以試吓整。材料：1️⃣ 西班牙豬腩卷 1 條2️⃣ 粗鹽1湯匙（浸泡豬腩肉）大約一小時汆水料：1️⃣ 薑 幾片 2️⃣ 蔥 幾棵3️⃣ 花雕酒 適量4️⃣ 冷水 適量日式調味汁：1️⃣ 味林 75 ml2️⃣ 鏗魚汁 75 ml3️⃣ 料理洒 50 ml 4️⃣ 日本清酒 50 ml5️⃣ 黃糖40-50 g6️⃣ 水 450 ml 7️⃣ 昆布 2 片8️⃣ 薑 幾片9️⃣ 蒜頭 半個🔟 蔥頭 2 粒1️⃣1️⃣ 大蔥 1 條 （切段）1️⃣2️⃣ 蔥 幾條 （切段）（味道咸甜可以因個人喜好自己調節份量） 做法：1️⃣ 豬腩卷肉解凍後，用少許粗鹽開水浸泡豬腩卷肉，浸泡約60 分鐘，再沖洗乾淨備用。2️⃣ 冷水加入幾片薑、蔥段、少許花雕酒，煮滾後放入豬腩肉卷，水滾後轉細火煮7-8分鐘，沖洗乾淨及印乾水份備用。 3️⃣ 將所有日式調味汁材料放入煲內，先煮滾，煲5 分鐘備用。 4️⃣ 用油煎一煎封豬腩肉卷，可以分4個面煎，每面油煎2分鐘，煎至表面至金黃色。 5️⃣ 將已煎好的豬腩肉卷放入已煮好的日式調味汁，先煲滾煮10 分鐘，用小火煮30 分鐘，打開蓋翻轉豬腩卷肉，熄火焗30 分鐘，重覆做多一次，總共小火煲一個鐘，焗一個鐘。。 6️⃣ 煮焗完120 分鐘就待涼，再放入雪櫃雪一晚更入味。 7️⃣ 第二日就可以拆繩同切片，醬汁隔渣後收汁，將切片叉燒浸一浸熱醬汁後就可以配麵或飯食。點擊圖片放大 我都係第一次整日式叉燒，好似好複雜，其實又唔係好難整，花多少少時間，但味道又真係唔錯喎。隔咗啲醬汁，我仲用嚟整溫泉蛋🥚。 溫泉蛋做法：雪櫃拿雞蛋出嚟攤凍1 個鐘左右，煲熱水，水滾後放雞蛋冚蓋煮5分鐘45 秒，冲水，待涼後剝殼放入已隔咗的醬汁雪半日就搞掂。 我的晚餐🍲，溫泉蛋好糖心好食，叉燒好軟熟 😀。 喜歡看我煮嘢食, 分享旅遊點滴，周圍食，我的手作,同分享周圍遊同好吃CAFE就Follow Me啦❤️我的手作IG: Handmade-with fun（@handmadewithfun）• Instagram 相片與影片個人網誌IG: JW_小生活_愛食_愛旅行（@jacko_dailylife）• Instagram 相片與影片個人網誌FB: Jw_小生活_愛食_愛旅行 | Facebook
