氣炸五味腐皮卷早幾日整咗氣炸五味腐皮卷，朋友都話好食😋，話自己包真係唔同D同埋材料新鮮，想同大家分享一下，做法唔難，不過要有心機的，因為要刨絲，工夫多一點，不過食得健康啲。材料：1）冬菇2）新鮮超甜粟米🌽粒粒3）木耳絲 （或木耳切絲）4）綠豆粉絲5）紫蘿蔔 （可以用紅蘿蔔🥕又得)6）腐皮三塊 (我買咗樹記腐皮) 調味料：1）蒜蓉2）鮑魚汁3）冬菇水做法：1）首先將冬菇浸軟，浸軟後洗乾淨切絲，記得留返冬菇水用來炒材料。2）我就買已切絲乾木耳絲，浸軟後洗乾淨備用，十分方便，或者乾木耳洗乾淨再切絲備用。3）新鮮超甜粟米🌽洗乾淨，剝粒粒備用。4）綠豆粉絲浸軟後洗乾切短少少備用。5）紫蘿蔔去皮洗乾切絲或刨絲備用。6）先用中火加少少油同蒜蓉先起鑊再炒一炒，放冬菇絲，炒勻後放木耳絲，再炒一炒，加粟米粒同紫蘿蔔絲均勻後，加適量鮑魚汁同冬菇水，再改小火煮五至六分鐘，見紫蘿蔔絲軟身後加綠豆粉絲，再加少少冬菇水，均勻炒4-5 分鐘就搞掂，再試下味道，待涼後就可以包腐皮卷。點擊圖片放大 +6 7）一大塊腐皮可分成10 小塊，將炒好已涼的材料放少許在腐皮上，再卷一卷，再將左邊同右邊摺疊卷好，尾部可以加少許水封好，包好後就可以氣炸或煎又得。點擊圖片放大 +4 8）放牛油紙在盤上，放己包好五味腐皮卷，再噴少許油在面上，先用180 度氣炸6 分鐘，再反轉再180 度氣炸6 分鐘就可以吃到新鮮熱辣辣外脆五味腐皮卷。點擊圖片放大 小貼士：一次過吃唔完，可以將已包好五味腐皮卷放入密實盒再放入雪櫃，第二日氣炸一樣咁好食😋。
