見街市幾檔菜檔都有子薑買,又幾靚同新鮮,我估當造,買了兩斤整醃子薑,我的秘方是加了話梅肉會冇咁酸架,用嚟炒餸又得,皮蛋夾子薑真係perfect match ,而家天氣咁熱,間中食下酸野醒胃D。材料:子薑 2 斤白醋 500 ml冰糖 250 g to 300 g (視乎個人甜酸度)辣椒🌶️仔 四至五隻 (不喜歡辣可以不用加)話妹肉 三至四片 1)子薑清洗乾淨,刨皮,切片,我就會切厚身少少,醃出來比較爽身。2)辣椒仔去頭同話妹乾清洗後備用3)加入四至五匙鹽醃製三個小時左右,目的是讓鹽減少薑辣味道同出水。4)三個小時後,子薑用冷白開水沖洗多餘的鹽分,瀝乾水份備用。5)白醋加冰糖煮至冰糖溶解,攤凍,可以放入雪櫃雪凍更好。6)把薑片,辣椒仔同話妹肉,放入玻璃樽,倒入攤凍/已雪凍的醋糖水,放入雪櫃雪兩三天已經完成,想味道更佳雪一星期,整了一樽慢慢嘆。小貼士:玻璃樽用滾水煮4-5 分鐘,再抹乾冇水氣。點擊圖片放大 +4