呢個算係我嘅生日 trip， 特別要求朋友仔陪我去靈隱寺走一轉， 因為呢個寺對於我有特別意義， 感謝朋友們！ 出發~~~ 在東涌搭11號可到大澳，途經靈隱寺。 靈隱息肩亭，呢個亭都有成三十年歷史！ 一行咁多人，都好鍾意餵山溪魚...... 由落巴士到行入寺都唔洗十分鐘~~~ 由落巴士到行入寺都唔洗十分鐘~~~ 當我讀小學~ 中學時，每年七月節都會同一大籮親戚一齊去靈隱寺住兩日（或者更多日，唔係好記得......）貢天 （唔知係唔係咁寫， 即係做一d儀式去拜天）。 好記得果時行入寺嗰度有棵番石榴樹， 我第一次見到野生番石榴， 爸爸仲掰開比我睇~~~ 唔知呢個係唔係番石榴呢？ 入到寺去就會必食豆腐花， 唔記得好唔好味， 但就好開心！ 我就係坐响呢個竹「林」食豆腐花！ 入到寺已經下午兩點幾，仍有好多人食齋菜~~~ 食飯呢就開好多圍， 開到成個寺前面都係枱（唔知點解記得係木枱......）， 我記得我仲幫手盛飯， 不過細個時唔係好鍾意食齋菜， 宜家你叫我食多幾日都唔係咁老泥...... hahahahaha~ 宜家ｄ齋菜好味咗好多！ 夜晚瞓呢， 就同好多靈牌一齊瞓， 四嬸話佢好夜先入到寺， 見到ｄ靈牌就驚到成晚瞓唔著！ 但我又唔係好驚喎~ 細佬（男人）佢地就慘ｄ， 瞓响個大鐘隔離， 晨咁早就比個鐘敲醒！ 唔知細佬同爸爸係唔係比呢個鐘嘈醒呢？ 每次供天都係响半夜， 我都無辦法睇到個儀式， 皆因我捱唔到眼瞓！（哈哈） 只係聽到口述－－ 大家一齊跪响寺出面既空地， 然後傳一支好大既香（想像直徑有六十厘米係大香）~~ 拜拜拜。 大家就係跪响呢個空地前面貢天 觀音殿 上個香~~~~ 除咗呢樣嘢， 對於大人嚟講， 最開心莫過於係可以－－－－打麻雀！ 無錯！ 係打麻雀~~~ 但佛門清靜地呀...... （諗起都想狂笑！） 如果宜家ｄ主持人比阿媽佢地打麻雀， 上硬 Utube 啦...... 每次去完靈隱寺， 我地一伙人都會行去大澳， 飲餐茶， 食餐好， 不過我記得自己唔係好欣賞果ｄ地踎茶樓， 可能因為我怕污糟啦！ 而大澳未有嗰條橋以前， 係要坐隻人力艇（手拉）過海， （應該可以叫做橫水渡吧？） 我成日都幫手拉~~~ 諗起都好玩！ 以前碼頭仲有船返屯門， 但宜家好似無咗 lu~~ （宜家都仲有喎， 不過要預早訂飛。） 最最最記果時天壇大佛仲未起好， 我地一家人就已經有同佢有合照， 真係好懷念爸爸在生時T.T 而嗰時未有去東涌o既陸路， 每次都要坐船出入大嶼山， 對我嚟講真係好辛苦！ 嗰時帶咗相機去大嶼山， 仲响船上影咗ｄ勁 leung o既戴住草帽相...... 最後返到屋企， 媽咪爸爸會帶我地上酒樓再食嘢， 我地個個都好似放監咁...... 狼吞虎嚥！
