踏入2021年，第一篇blog 先祝大家新年進步，疫情快消失。說時遲那時快，結婚已經一周年了，新手人妻升上year 2。可能最近天氣凍容易餓，老公「玩食字」情況比以前嚴重。又可能呢排天氣凍，穿得比較擁腫，導致屢次喺房間走動時候唔係扯跌呢樣就推開左果樣。老公忍唔住問我「我又唔係姓哥，點解你會咁架?」自詡都讀過下歷史既我，苦苦思索邊個姓哥同有乜關係? 哥倫布? 仲有哥乜呢??諗左五分鐘後，原來佢想話我哥斯拉。 又另一日，上網碌到啲幼稚園面試心得。雖然我地就未咁快要諗選校（宜家連B都未有。不過小朋友呢方面，有時又可以黎同成長得好快），我又貪得意問老公「幼稚園你想揀根德園定係St. Catherine 呀?」老公0.01秒就答我「我只係想佢既功課跟得完 … 」嗯，家長們都辛苦了。 早幾日落街買野，見到塊窗簾啲圖案同屋企用緊果塊一樣pattern，叫老公睇下。佢無厘頭問我「咁你知唔知邊度係頭，邊度係尾呀?」 我唔知佢問乜就話唔知啦，然後佢就話「你真係不知『簾始』。」 黎到一個我地最近比較重視的話題，因為想今年(2021)內買到樓搬屋~ 所以雖然最近疫情第四波，但我地都有在做足防疫措施下出去睇下樓叫做攞啲經驗同感覺（無抽新樓因為唔想等樓花）。其中一個有留意既區份係馬鞍山，而馬鞍山之中又以烏溪沙一帶比較舒服。咁當然又忍唔住笑下 + 研究下啲屋苑，例如銀湖天峰聽落似銀狐，迎海啲外牆又黑又橙夏天唔知會唔會好熱之類。黎到雲海，新地既樓都係想買又買唔起，都無謂笑佢，只係輕輕講左句「林峯以前有套雲海玉弓緣」。老公即刻又爆「我只係想有間『雲海欲供完』咋。」===這一年的新婚生活大概就這樣。工作有壓力，疫情很困擾，生活也不盡如人意。但有身邊的他在繼續給予無限支持，有笑聲的日子就比較容易過。 另外我都會煮多少少餸等老公唔洗餓到成日食字～ 以上，謝謝收看。(一周年蛋糕~) ig : yaukeeyk 莎莉看世界
