新人台上既致辭，說不上係籌備婚禮時既大項目，但確實又好緊要。今日就同大家分享下我地既經驗。 由於我地係註冊處簽紙只需要讀出既定誓詞，所以婚禮當日要預備「講野」既時候只有 ： 1. 早上接新娘時 2. 晚宴開始前 如果會另外證婚既朋友，就可能需預備多一段證婚時候講。 === 我同老公本身都唔係怕講野既人，所以一直無想過要特別準備啲咩。直到結婚前一晚，在腦海中想像一下第二天的 rundown，才如夢初醒，「弊喇 明天上台講咩好？」 早上接新娘時還好，在場既都係兄弟姊妹家人，感覺輕鬆熱鬧啲，又有攝影師幫忙搞氣氛，唔需要像台上致辭咁得自己兩個企左上台，可以講得 personal 啲，真情流露更緊要。 至於晚上致辭，因為賓客不少，亦包括長輩的親友，我地都希望致辭可以講得得體一啲，唔洗好風趣，最基本希望客客氣氣多謝晒啲來賓。 === 網上有不少分享參考，再加上我地參與朋友婚禮聽過既，加埋自己想講既野，綜合如下 ： - 儘量想簡短簡短簡短 - 首先多謝大家喺呢個時勢都到來 - 多謝雙方父母及家人長輩 （略略講下成長時候既片段/感想） - 多謝親朋好友既到來 （特別重要既人物可以提一提，譬如有啲已移居海外專程回來既朋友/好忙好忙但都出席既老細前輩） - 多謝兄弟姊妹 （呢樣好重要，因為婚禮佢地真係幫左好大忙） - 多謝工作人員 （一係唔多謝，如果唔係儘量都唔好漏。包括化妝攝影場地司儀等） - 多謝老公/老婆 （呢樣係好好好緊要，點講就自由發揮啦） - 最後就係希望大家 enjoy the night，食得開心啦~ 我同老公個 speech 既 flow 大致都係以上咁。當然有啲次序可以調下，語調語氣都可以根據自己舒適既黎調整。有信心既加一兩句搞笑 soundbite 都無所謂。 老公仲特別提醒，多謝老爺奶奶/外父外母比多謝自己父母更緊要，有助未來家庭和諧~ === 事前喺腦海中度好個 flow 後練習過幾次，大約 1 分 15 秒。我覺得個長度係非常之好~ 由於我好眼淺，儘量都避晒唔講感性野。但最後上到台上多謝父母時，講到「多謝」兩個字就忍唔住眼紅口震 .. 好彩有度定要講咩，如果唔係可能就會諗唔到亦講唔出口了。 以上純粹同大家分享一下~ 有興趣看小妹分享的也請支持一下我的 ig account : yaukeeyk 莎莉看世界～ 有Sally同Brown既日常點滴。 多謝收看~ ===== 有興趣也歡迎看看我其他關於婚禮的分享 - 【求婚篇】- 點確定佢就係 Mr Right? 「 #我的夢想婚禮 」 #我的夢想婚禮【結婚戒指篇】環在無名指的承諾 #我的夢想婚禮 【$5,000 搞掂之婚紗及禮服篇】
