今日分享一個重要項目 - 註冊。 講註冊前又想岔開小小，其實傾結婚時，係有諗過到底要不要「正式註冊」的。同男友一起多年，生活上好多時都已無分彼此（除了婚前婚後一直奉行的財政獨立），有無呢個法律地位真係咁重要？如果要順長輩意思公告親朋，咁請食飯算啦？唔洗特登話俾人知有無註冊既。 咁當然，有啲時候有個正式身份係比較方便啲既。「老公唔俾/ 老公會鬧/ 要返去問過老公」呢幾句入面，「老公」二字相比「男友」係更有力。 但另一方面，我地窮人諗法，結婚無稅務優惠之餘喺各樣社會福利方面好似更加分唔清咁。不過又咁講，你結婚係為左攞福利架咩？你為左愛對方想俾個承諾同佢一世架嘛。好喇，結論都係註冊吧。 --- 我地無宗教信仰。婚禮場地可以選擇 ： 1. 註冊處行禮 2. 律師樓行禮 3. 自己揀個地方搵律師證婚 第 2 項好快被 ban，因為實在一啲喜慶感都無。律師樓處理既野太多了，難聽啲講，結婚又係佢，立平安紙又係佢。當然有啲律師行有專做證婚，額外有啲禮堂仔/ 會議室咁既地方俾你 book，價錢亦可以好平。不過，都係覺得無謂，因為有更好的選擇吧。 第 3 項，年紀細啲既時候都有諗過喺草地行禮，九龍仔公園同大埔海濱公園之類都係考慮之列。但了解過其實呢種康文署場所係咩都唔包，要自己搵 set up 都幾煩。而到大個啲啲，多左機會同律師交手接觸 ，感覺其實都幾差。我唔知係呢個行業宜家做爛左市定我遇到既都麻麻地，但我就唔想再花時間 effort 搵個可靠律師，亦唔想婚禮時個名有機會俾人讀錯。 好喇，咁就決定註冊處，其實都係有私心既。 - 費用最平 （註冊費 $305 + 租用禮堂 $715 （平日時段）） - 其實我覺得係幾莊嚴，因為註冊處個禮堂真係全部淨係做婚禮 - 沙田果間對我地黎講都算近 & 方便新界既家人 - 紅磚牆其實都幾靚 + 感覺好 formal - 註冊處內裝修係有點歷史，舊舊的感覺反而令我更鍾意 - 自己父母係喺註冊處行禮，有承傳感覺 - 反正婚姻條例都係政府監管，咁去返政府既註冊處搞實無錯喇~ 不過當然都有佢無咁好既一面。 - 時間地點唔夠方便，全港只有五間婚姻登記處，timeslot 也要跟佢開放時間 - 時段只有 15 分鐘 （無得慢慢 march in） - 誓詞只讀佢 standard 果段，應該無得加長（我請在場各人見證，我 xxx 願以你 xxx 為我合法丈夫/ 妻子） （待續）
