响粵語長片裡面，關德興演飾黃飛鴻全香港都知，甚至有人直接叫佢做黃飛鴻。原來，關師父仲係鎮守坪洲金花廟嘅神仙，嘩！係真唔係呀？ 原來成件事係有段故嘅。根據坪洲金花廟網站所講，响1981年金花娘娘寶誕日前幾日，金花娘娘就托夢俾响日本公幹嘅關師父，話同佢有緣，仲要求佢協助宣揚金花廟。同一時間，坪洲金花廟主持蘭姐夢見金花娘娘，指坪洲可修廟嘅善信有心無力，希望借助關師父之力去完成。結果關師父就响當年金花娘娘寶誕帶同弟子入坪洲祝賀，後嚟關德興師父更拜金花娘娘為師。自此，每年金花娘娘寶誕，關師父都會租專船入坪洲賀誕，亦成為坪洲金花廟一年一度嘅盛事。 到咗1996年，關師父離世，坪洲金花廟主持蘭姐同善信表示得到金花聖母顯靈指示，關師父仙遊之後封為護法大將軍。於是關師父個仔關漢泉先生請人造咗個關師父護法將軍神像，安放响坪洲金花廟供善信參拜。所以，如果大家去到坪洲金花廟，見到金花娘娘旁邊有個好似關德興師父嘅神像，就係呢個喇！
