《慕姸小廚房》又開工喇！其實我係好小入廚嘅，你問我鐘唔鐘意煮嘢食？我會答你‘我鐘意食多啲囉’！咁點解又會間唔中煮下飯仔咁呢？因為「住家飯餸+個湯」係會令家人感到非常開心的，所以就算我唔食牛腩(盡量唔食）都會煮蘿蔔清湯牛腩俾屋企人食嘅！而我最欣賞嘅係索哂啲牛腩肉汁嘅白蘿蔔，真係甜到入心入肺，好味到不得了！係咪普天下嘅「識食之人」都係‘愛食肉’嘅呢？尤其係牛肉，牛肉的確有難以抗拒的誘惑，牛肉含高蛋白質、鈣、鐵、磷、維生素B群、葉酸及維生素A，而且脂肪含量較低(精瘦部位），牛肉的營養價值高於其他各種肉類，能夠增強體力及提高免疫力。平時我好忍得口，但當出國旅行就會忍唔住會破戒，韓牛同和牛我係抗拒不了的呢！但自己煮嘅美食要忍口真係好辛苦㗎～(￣▽￣)相信大家一定試過這道港式美食，清湯牛腩其實係好難煮得唔好食嘅，除非⋯除非⋯啲牛腩唔新鮮、啲蘿蔔炆得唔夠淋啦！哈哈！ 食材：(3-4人份量）鮮牛腩、鮮牛骨腩 約800 g本地白蘿蔔 1條洋蔥 1/4個蒜頭 3塊冰糖 約10 g花椒 1 茶匙八角 1 塊月桂葉 1或2片清雞湯 1公升清水 1公升做法： 1.首先可以慢火把牛腩出一出水，去除血腥及雜質，然後取出後清洗乾淨及印乾水份備用。 2.開火落油炒香洋蔥及蒜頭，再加入牛腩炒香，炒香後加入清雞湯煮滾後，立即再加入1公升清水。 3.用清水沖洗一下花椒八角及月桂葉，滾起後加入花椒八角月桂葉及白蘿蔔，一同炆煮30分鐘，記得滾起後立刻調整到小火。 4.方法係細火炆煮30分鐘，熄火焗30分鐘，然後再細火炆30分鐘，再熄火焗30分鐘或1小時，再開火炆30分鐘，再熄火焗1小時或2小時，記得煮起就調低火，因為太大火滾（牛肉會好韌）而且湯汁會起泡泡，令湯底渾濁。5.如果想要湯底清澈，記得炆嘅時候唔好太大火，食用時，用另外一個器皿盛起白蘿蔔及牛腩，把湯隔去油份及香料，啲湯就會好清，清到冇乜油就可以連湯都飲埋，不過我今次冇隔油，因為我會留湯底過夜，留待明天煮烏冬做早餐時用，烏冬係要有少少油先比較滑，會索哂啲牛肉鮮甜味。 小貼士：通常煮完牛腩嘅湯底會留過夜，聽日早餐就有牛腩湯煮嘅烏冬食啦！煮淋啲，每條烏冬都吸哂啲牛腩汁，好味到不得了⋯⋯簡單加隻流心蛋，就係女兒最愛吃的早餐之一啦！或者用腩汁嚟煮生菜都好好味呢！以上是以個人口味作為調味的分享(>^ω^<)謝謝(^з^)-☆
