這個 trip 終於來到最後一天，先參觀 British Library，再去 British Museum。 British Library 位於 King Cross 地鐵站附近，可以由 hostel 行過去。去到地鐵站見到好多警察，入去望下，原來今日有悼念 2005 年發生的倫敦七七爆炸案的活動。睇返 wiki，原來我地 hostel 可步行去到的 2 個地鐵站 King Cross 同 Russell Square 都有爆。恐怖襲擊愈黎愈頻繁，普通市民真係防不勝防。。。 車站旁有間好有氣勢的酒店 St. Pancras Renaissance London Hotel，本身諗住入去借廁所順便參觀下，不過最後都係唔夠膽。 British Library 除了是一個圖書館，還有好多展覽品。（重點是免費）而今期其中一個係咁宣傳的展品就係 Magna Carta。um....完全唔知咩黎。當時我嘗試用一個離線英文字典 app 查下 Magna Carta 係乜傢伙，估唔到竟然查到！中譯：大憲章。不過都係未聽過。。。 是但啦，呢個世界有太多野我唔識，入去行下先。呢張椅的形狀係一本俾監獄波波鎖上的書。缺乏想像力的我想不透當中含意，不過覺得應該有點意思，所以先拍下。剛剛 wiki 了一下，原來呢個雕塑叫 Sitting on History，想表達 “ refers to the book as the captor of information which we cannot escape”。我領悟到的大概係書本內實在有好多知識、歷史，睇書係好重要。（wiki 真係好有用。。。） 大部分的珍藏都收在 Sir John Ritblat Gallery 呢個 permanent 展館。 入面的收藏品其實都幾精彩，即使你對那方面不是十分有興趣或認識，都應該會覺得好睇、新鮮同開眼界（當時可能我睇得太少野，所以先會覺得 amazing 啦。。。）不過唔可以影相，有點可惜。 收藏品分成以下 10 類：Music、Shakespeare、Literature、The Beatles、Historical Documents、Maps and Views、Art of the Book、Sacred Texts、Printing、Science。 Highlight 的類別是我覺得好睇的部分，其中最觸動我的是一份由 John Lennon 寫的 Help 手稿，透過歌詞及打風般的字體散發思緒凌亂同無助感，當時正係佢地紅透半邊天，一時適應唔到突如奇來的轉變。另外還有好多重要的收藏，如 Da Vinci 的唔知咩手稿、Shakespeare 的第一本作品集、唔知咩野版本的聖經、世界上最早的印刷品 Diamond Sutra。。。。（原來即係金剛經）等等等等。還有好多好好睇的舊地圖。 圖書館另一個位置放了係咁宣傳的 Magna Carta 大憲章，原來今年係大憲章簽署的 800 週年，所以有個英國藝術家邀請左世界上好多唔同的人一齊完成一份大憲章 Wikipedia 的刺繡。 觀賞期間，圖書館無啦啦敲鐘，所有人原地停低，放低手上工作。原來是為倫敦七七爆炸案默哀。 坦白說，現在還是不清楚大憲章的歷史重要性，只有含糊的印象知道大憲章對日後的法律／憲法好有影響。在圖書館買左本 800 週年紀念圖書，希望睇完會了解更多啦！ （重未開始睇。。） 其實 British Library 除左有好多架勢展品睇，另一架勢之處就係 法定存送 呢樣野，wiki 話：“根據英國法例，任何出版商在英國出版書籍，都需要法定送存一本複本予大英圖書館收藏。” 之後再行去 British Museum 參觀。（對，也是免費） British Museum 好大，根本無可能一次就行曬睇曬。所以我地只係跟住 Museum 張地圖睇曬 Don't Miss 的展品。 復活島 Easter Island 石像 Hoa Hakananai'a 係其中一個博物館話不可錯過的東東。 另一樣係 Rosetta Stone，那個石碑重要之處不是內容本身，而是石碑上的三語對照幫助解讀本來已失傳的埃及象形文！！！ 石碑上刻有古埃及象形文（又稱聖書體，係獻俾神明的文字）、埃及草書（平民百姓用的字）同古希臘文（因為當時埃及已經俾希臘大帝 Alexander the Great 統治緊，所以統治領地內所有的此類文書都需要添加希臘文的譯版）三種語言。埃及象形文本來已失傳，專家們一直解讀唔到佢地所發現的埃及象形文。直到呢塊石碑出土，真係一天都光曬！ 其實好多 Don't Miss 睇完都唔知有咩咁特別／背後有咩故事（例如有副名為 Lewis Chessman 的棋，話係世界上最著名的棋。。。。 ） 今日行完兩個博物館，真係覺得自己知識太貧乏，呢個世界真係好大呀！ 但另一方面，起碼我去完呢兩個地方之後有認識都新知識，都算不枉此行！ Stay foolish, stay hungry!! －－－－－－－－－－－－－－－－－－－－－－－－－－－－－－－－－－－－ 呢次咁充實的旅程終於完結！一個人再次回到被譽為 giant hostel 的 Stansted 機場，與過百名等早機的旅客一齊在椅上半睡半醒度過一夜。 返慕尼黑又可以繼續用返歐羅 lu~~~~~~~~~~！
