今日係星期日，我地去左 Westminster Abbey 西敏寺睇下有無得參與彌撒。原來果日唔係一般的星期日，而係 Civic Sunday，所以彌撒開始前入口封左，只有受邀請的人可以入去。有著曬唔知係咪軍服的人啦、貌似貴族的家庭等等。佢地入曬去之後，就開放俾排隊的普通人進場，所以我地都有幸在西敏寺參與一場彌撒。 唔知係咪因為係特別彌撒，竟然邀請左 Royal Opera 的兩個男＿音在中途演唱聖詩。大開眼界。 彌撒結束後，沿著 St. James Park 行去白金漢宮 沒有遇上禁衛軍交接儀式，亦差十幾日先可以參加 Royal Welcome 的活動，所以只係入去 souvenir shop 行下就算。souvenir shop 入面好多皇室商品，有好多精緻高雅的茶具，雖然覺得好靚，但對於平凡家庭係不設實際的。。。 再向前行到了 Memorial Gates 這裡的石柱寫左好多國家／地方名，包括 Hong Kong，係紀念兩次世界大戰大英帝國各屬地參戰的人。 這天的天氣很舒服很適合漫步旅遊，我們繼續盪到著名百貨公司 Harrods。 遠遠看到這座古典的建築物，已經感覺到一種震撼同懾人磁場。 入面更誇張，可能係星期日的關係，人頭湧湧想行快D都唔得，當然亦會見到強國同胞執“口急”的熟悉親切場面。 人多到足以撲熄我購物同行街的慾望，不如欣賞下個百貨公司重好。 內部散發著懷舊同神秘的氣氛，有好多埃及風格的裝飾。 地下一層有 Princess Diana 同佢情人的紀念碑。原來佢情人 Dodi Al Fayed 係 Harrods 擁有者個仔，所以意外後就建了紀念碑悼念佢地。 呢座雕像叫 Innocent Victims，寄願佢地兩個可以無憂地在別處起舞。 Harrods 入面原來還有街市，圖中肉櫃其實展示住一隻無頭去曬皮毛的兔仔，我都係影完相先發現。 有賣海鮮 tim～ 重有各式的香噴噴餐廳。 P.S. 唔講唔知，Wikipedia 話原來 Harrods 係世界上第一個安裝扶手電梯的地方，開始時更會提供白蘭地俾在扶手電梯上的客人定驚！ XD 然後各自行動，d fd 去行街，我就去左刁大大勁力推薦的 Tate Modern！ 呢個美術館外型好鬼特別，因為佢係由發電廠改建而成。 呢個作品的靈感應該係來自中國的算盤珠珠～！ 其實只有2 個鐘行，所以行得好快，都唔知其實睇曬成個館未！行行下，無啦啦重先後撞到細佬同佢女朋友仔！佢地都好似因為唔夠時間而分開各自行 XD 閉館後再行一陣千禧橋，兩次經過 St. Paul's Cathedral 都無時間入去，就要急急腳去返 Leicester Square 附近會合朋友食晚餐！ 今餐食咩咁巴閉？就係要等成個半鐘位（無得訂木台）的 Burger & Lobster！ 呢度好特別，入到黎無人俾餐牌你睇，因為成間餐廳只係得 3 個都係盛惠 20鎊 ga choice！我地諗都無諗就決定叫 3 款 share 食！ 第 3 位：牛肉漢堡包（配沙律薯條） 當我已經食過舊老闆用心烹調的各式 burger，同埋 Amsterdam 的 Burger Bar 牛牛漢堡包，呢個包呢，講真真係好普通。入面 D 醬同配料都係 standard 野，唔難食 ga，不過等左個半鐘位（同埋要 20 鎊），絕對唔應該食呢個囉！！！ 第 2 位：Lobster Roll（配沙律薯條，同黃色的 lemon butter garlic sauce）呢個 Roll 係好食 ga！個包好軟熟，龍蝦肉絲好鮮甜，個醬點唔點都無所謂，印象中係無乜分加。美中不足的地方係龍蝦肉絲加埋可能只係半隻龍蝦的肉量。有點唔夠喉囉～～～我應該食到 2 個 roll。。。 第 1 位：原隻龍蝦！（grilled） 龍蝦肉夠多夠彈牙，鮮甜！以往食龍蝦伊面都係斬成一件件，原來成隻食真係爽好多！其實還有 steamed 的選項，唔知幾時先有機會再食了！ 後記：我地隔離木台有兩個女仔，各自食完一隻龍蝦，然後密密針左一輪，怕怕羞羞同侍應再 order 多每人一隻！我果刻真係不停吞口水！！I will be back！！
