對兩個住了在慕尼黑大半年的人黎講，柏林真係一個好多好野食的城市！（當然無得同香港比啦～～）在柏林的呢個星期，食左朋友介紹的“好西”，亦有行行下見到想食的餐廳，大部分都好好食，最差的情況就係 “又唔係好食到要排超長龍呀”，但仍然都係好食。最重要係平均都比慕尼黑平，可以食得豪爽（少少）。廢話少講，即刻美味回顧！ 首先梗係講左東道主德國菜先。 燉豬手！ 窮L s 只係叫左一隻豬手、一枝啤酒和一枝可樂，不過好彩，隻手好大隻！兩個人食剛剛好！究竟呢隻豬手有咩咁特別？同德國南部做法（以及香港人對豬手一般印象）唔同，北部的做法唔係烤到皮脆，而係用水燉／火合 的，當然加了好多唔知咩香草香料啦。話說好耐之前我地在農場打工時，農夫 Hans 知道我地好想食豬手（我地果時同佢講 pork hand....），有一日佢無啦啦拿左包疑似豬手黎，話免費的，村入面個屠夫唔要俾佢，今晚火合黎食丫。其實我地 3 個都完全唔識整豬手，佢話火合就火合啦！重要完全係白火合，佢話食果時加 D 鹽同胡椒就得。上碟時隻野白雪雪，完全無受到任何香草污染，咩都唔加食一啖原味先，嘩！即刻有D反胃感覺，無味得黎重有D腥！但鑑於農夫係好環保唔浪費，大家都要硬住頭皮食曬佢。。。煲內還有幾隻，農夫重話我地咁中意食，留返聽晚再食啦！真係勁驚！後來我地側側膊唔多覺俾左農夫兩隻狗狗，佢地好合作幫我地食曬。。。anyway 都好感謝農夫呢份好意！ 言歸正傳，呢隻當然唔可以同農家白火合比啦，甚至乎我們覺得比慕尼黑的烤豬手好食。味道有少少似滷水味，肉質好林，林得黎又唔會似湯渣。咬落D皮度，不會有咬烤豬手皮脆脆的罪惡感，取以代之係好似有好多骨膠原 XD 不過由於唔係香口野，唔係太適合配啤酒囉～ 餐廳：Zur letzten Instanz 地址：Waisenstraße 14-16，10179 Berlin（我地是在 Alexanderplatz 站行過去，搵左一陣先搵到） 小知識：係咁講南部豬手北部豬手好長氣，其實南部豬手德文叫 Schweinshaxe，北部豬手就稱為 Eisbein。 題外話：毫無懸念，香港人都叫呢味豬手。但原來台灣人叫呢味做豬爪！一開始成日會唔知大家up緊乜，後黎終於搞清楚原來都係講緊呢舊肉肉，但我用普通話講開佢時第一時間還是會講豬手。而德文則叫 Haxe，英譯 Knuckle， 即係豬蹄，其實四腳動物邊隻係手邊隻係腳有正確定義嗎？香港的定義好似就係用德國煮法烤果D就係豬手，同薑同醋一齊煲的就係豬腳？上網查過下，有人話：豬手係豬前腳, 蹄向後彎既.....豬腳係後腳, 蹄向前彎既.... 如果以肉食 texture, 豬手較好, 因多d 肉, 無咁實.亦無咁多脂肪. 後腳因較承重, 骨大少肉卻較多脂肪, 及較實. 食後腳既話多吃表皮及其膠質（出處：http://www.discuss.com.hk/viewthread.php?tid=9246780&extra=page=1&filter=0&orderby=dateline&ascdesc=DESC&page=1）嘗試 search 下圖睇下兩者點樣向後彎向前彎，但D圖好唔開胃，放棄了，有機會再研究啦！ 接落黎隆重介紹：Mustafa's Gemüse Kebap !!! 朋友介紹說這是最好食的 Kebap。所以見到人龍仍然無畏無懼！不過點解排極條隊都唔郁？第一個客 15 分鐘再望仍然排緊第一？！原來咁 arm 上一碌肉燒曬，換左碌新肉，所以要烤返半個鐘。 一場黎到，都要等架啦。（如果唔係就要諗今晚去邊食晚餐）漫長的無聊時間，上前望下餐牌，其實選擇大致上只得 4 個，你可以選 Döner 或 Dürüm －＞ 再選要肉定唔要肉。介紹返，（在德國）Döner 係指好似一個大圓型散紙包（無拉鍊）烘過的麵包，入面唔放散紙，放蔬菜放肉片；而 Dürüm 就係把菜和肉放在一大塊好似好薄好薄烘過的 Pizza 餅底上，再捲成棒狀，用錫紙包住，一邊食一邊撕開錫紙。通常都係 Dürüm 貴過 Döner，可能因為 Dürüm 可以包多D肉？ 既然碌肉未燒好，就買個無肉的 Gemüse Döner 頂下肚先。 驚為天人呢！！！當時肚餓當然有關係，但客觀分析下，真係好好味！！平時 Döner 或 Dürüm 入面的沙律都係生，入口的感覺只有清新和爽；但呢個無肉的 Gemüse Döner 入面的 Gemüse（德文蔬菜的意思）係炒過架！重有薯仔！真係令人喜出望外！5 分鐘唔使我地已經食曬成個，lam lam 脷呢～～～～ 碌肉燒好後，我地再要了個正常有豬肉的 Dürüm，連埋最後一日過黎返兜那次試埋 Gemüse Dürüm 同有豬肉的 Döner ，4 大 combination 食曬之後我地一致認為最平的 Gemüse Döner 係最好食的！而且我地重未在其他地方食過有炒蔬菜同薯仔的 Döner，所以黎柏林值得排隊試下 ga！ 說不上餐廳，只係一個有一張企位木台的車仔檔：Mustafa's Gemüse Kebap 地址：唔知點講，總之 U-bahn Mehringdamm 站其中一個出口出去就係啦！出錯左就在路面睇下其他出口有無一架食物車，同好長的人龍。 插隊介紹 Mustafa's Gemüse Kebap 龍尾方向的 Curry 36。其實這次去柏林無食到，係 6 月再去柏林睇波時，再排隊等食 Kebap 時去買的。Curry 36 的人龍都有咁上下，不過真係唔知 Currywurst 咖哩腸有咩咁好食，真係好似司華力腸加好多醬。當然，有 D 店個醬會好食D。我地估計佢有咁多人排隊係因為有好多肚餓的人排緊 Kebap，太餓啦所以買條腸頂住先。我地估。 再介紹跑完半馬的晚上食的希臘餐廳： 由一個樣子有點古古惑惑的中年侍應為我地介紹菜單，叫枝白酒試下先。刁生話唔係好中意囉～旁邊紅色小杯係送的餐前酒，唔知叫咩名，都 ok ga。 我地 3 個人的 main course 分別係煎魚、炸魚扒同埋雜扒餐。 好香好鬆軟的麵包 我點的雜扒有點太乾身，鞋鞋地，無乜肉汁，雜扒中的羊比較好食，其他一般般啦。另外兩個魚餐就幾好食，皮香脆肉嫩滑。不過最有驚喜的竟然係兩個配菜 － 米意粉同薯仔！ 餐廳：Taverna Apollon 地址：Danziger Str. 72, 10435 Berlin （唔記得左點去～） 泰國菜都有食！ 士多啤梨 milkshake 好飲！ 豆腐卜炒雜菜（配白飯）：OK la。 （前）菜遠豬肉，個名我改的 XD 都好食 ga，不過醬汁個味同炒雜菜好似。（後）烤魚餅：超好食架呢！好耐無食過炸魚餅，想在家整亦好麻煩，印象中好似 5－6 歐 2 件。除了甜酸醬，還有一個開胃的小沙律，都好正！ （無食到我最愛的菠蘿炒飯，有點遺憾） 餐廳：Suksan Thailändisches Restaurant 地址：Ansbacher Str. 4, 10787 Berlin（在 U-Bahn 站 Wittenbergplatz 行過去好快，附近還有個大商場 KaDeWe，不過呢個商場就行唔行都無所謂。） 下一位佳麗係越式餐廳 Madami～～ 又係同 Leo 同學食。刁生點了炸田雞乜乜飯。我對田雞有莫名的厭惡，但在極力推介下，試食了一條田雞腿。！！！好嫩滑，重炸得好香，好食過炸雞脾！！！不過見佢一碟先得 6 條腿（其實已經算多，而且睇返相先見到有隻煎蛋，若隱若現好吸引呀....），分左兩條俾大家食，就無再搶掠。幾乖！ 我點的 Mango Chilli Source 雞肉飯，個汁同雞肉都好食 ga，不過唔夠炸田雞腿好食。（而相中右上角是 Leo 的牛肉湯粉，佢話無乜特別 law） 餐廳：Madami restaurant - mom's vietnamese kitchen 地址：Dircksenstr.37，10178 Berlin（都係在 Alexanderplatz 行過去） 最後一日，再食多次 Kepab 後都要專登搭車去試下 Burgermeister。 排隊時欣賞下四周非常另類（我們眼中）地道（當地人眼中）的環境。疊起汽水箱，插個椅背就成為椅子；鐵欄杆上放坐墊、前面放張桌，又變成了雅座。 不過最大的變身應該是廚房吧。這個綠色的箱子本來係火車橋下的公廁！未想到吧～還保留著男廁個牌。橋底人多空間少，撞正有人送汽水，不停大叫 Vorsicht !（德文中的 “睇L住！”）才好不容易從人群中走過一條窄窄的路。 我們點了一個有蘑菇的 Burger ～ 6－7 歐左右，都幾好食。原來歐洲好多 Burger 都要呢個價位，咁諗落在香港食 Triple O 都唔係太貴。。。不過後來才知道這裡最出名的係豆。腐。漢。堡！希望有機會再黎試下！ 講開又講，放包的小紙托非常實淨，上面的字體亦有藝術感，所以我地由柏林 Handcarry 左佢返慕尼黑，放了在書桌上放眼鏡盒。哈哈！ 餐廳（？！）：Burgermeister 地址：Oberbaumstraße 8，Berlin（可以搭去 U Bahn Schlesisches Tor 或 Warschauer Strass。其實柏林有好幾間分店，不過我個係呢間先至用橋底下的公廁改建掛？） 來到甜品，有 Fassbender & Rausch Chocolatiers！一樓係 Shop，二樓係 Cafe/Restaurant。 有好多 Cake，花多眼亂，最後都無買到。 有好多不同味道，比較特別又記得的是帶點酸的 Balsamico 味和好清新的 pomegranate 味！選了好多款朱古力，但其實食落肚得幾粒咋 >.< 開心 Share 嘛 :) （精神分裂中）不過食到落肚果幾粒都好好食！（因為時間和金錢關係，無去到樓上的 Cafe 消費，所以唔知好無味。） Cafe & Shop：Fassbender & Rausch Chocolatiers 地址：Charlottenstraße 60, 10117 Berlin（在 Gendarmenmarkt 附近） 最後來一個小點心。包包 Berliner。 這個我地係在 Lidl 買的，0.49 歐一個。 來柏林之前已經好期待食呢個包。食落都無失望 ga，鬆軟的包灑上了少少糖粉，入面有 D 莓 Jam。點解會咁期待？因為我以為 Berliner 淨係得 Berlin 有！後來才知道慕尼黑的 Lidl 都有賣 Berliner 。。。 如果 Berliner 同拜仁州的受歡迎包包 Brezel 只可以擁有一種，好肯定會選 Brezel，因為 Brezel "come" 食好多，成日食都唔會厭，又頂肚。而且，最平 0.29 歐就有一個了！ ＊＊無食過都介紹？：Wok to Walk＊＊ 歐洲城市周街都會見到賣亞洲炒麵的小食店，我地都有食過下，不過就覺得一般啦，真係肚餓又無乜選擇先會食。但我細佬同佢女朋友卻大讚英國有好多間、德國只有柏林一間的 Wok to Walk 好好食，好食到欲罷不能咁，還上官網 check 埋慕尼黑原來真係無分店。 Wok to Walk 的點餐形式大致上好似車仔麵，麵底一個價錢，加唔同料就加唔同錢，再即場炒俾你食。佢地話試過一個麵加料加到 9 歐，同埋好似有（虎）蝦，好好食 wor！ 有關 Wok to Walk 的食評我唔負責架 XD 其餘介紹都係個人意見同喜好 XDDDDD
