今日有個重要任務，令我地不得不早早出門前往柏林大教堂。 途中經過 Sealife，都係入去睇下傳說中十大必搭魚缸電梯先。 有無柏林人／文化人／旅遊達人／歷史達人可以話我知棟在餐廳座位中的幾條有人仔 ga 柱係代表或者紀念 D 咩事？ 感覺上係同猶太人有關，不過附近又有無咩文字描述，所以都係估估下。 又見到呢隻熊。柏林周圍都見到呢隻熊，同一個姿勢，油上不同 ga 顏色 pattern。 裝下先！ 呢個魚缸電梯係 Sealife 的一部份，有飛就可以排隊搭 lift，穿梭魚缸中。無飛，咪在隊尾裝裝下 law。不過其實有秘技。但都係做左重要野先。 Yeah！順利買到飛！去聽當晚在柏林大教堂 Organ Concert，順便可以參觀下教堂。 所謂秘技，其實就係換個地方更近距離睇魚缸。。 因為魚缸其實係位於呢間酒店大堂中央，三面俾客房包圍，只要搭酒店上客房的電梯就可以升上去睇下 D 魚魚！俾錢買飛就在魚缸中央睇，無俾錢就在外圍睇，都好滿足架啦！酒店電梯要有房卡先可以上樓，好彩咁 arm 有頂樓住客同 Lift。乖乖的上落一次，心滿意足靜悄悄離開酒店。 然後搭車去遠少少的 Ostbahnhof，愈往東走，感覺愈荒涼另類。同市中心感覺好唔同。下車走幾步就到達 East side Gallery。 這段柏林圍牆五顏六色，上面好幾幅的塗鴉藝術在柏林不同手信上都有出現。呢個 east side gallery 原來好長好長，而一段圍牆有兩面，初初重擔心，兩面都仔細睇咪要好多時間有排行？原來著名塗鴉、構圖豐富嚴緊的塗鴉全部都在面向馬路果面，而後面主要都屬於 D （我地覺得）亂咁噴求其寫D字的塗鴉。所以望左兩眼就無睇了。 正面： 每幅塗鴉都有好多 interpretation，我地都無好好深入了解。有興趣上網解讀下，或者參加 D 專門介紹次文化、塗鴉的 walking tour，聽下導遊講解應該都會知好多野！ East side gallery 對面的一幢樓，玻璃反映藍天白雲。 盪返市中心，行下上次 walking tour 介紹過但無深入行過的 Holocaust Memorial。 走入冷冰冰又高的混凝土 block 中間，迷失感無助感油然而生。之前個導遊話如果同朋友一齊入去，以唔同步伐走，不約定的轉彎，好快就會搵唔返對方。只是行快了幾步，回頭想搵返熟識的身影真的不容易。望進混凝土 block 中間一條條的空隙，無人。偶然覺得有人在身後行過，原來唔係佢。行得太心急分分鐘撞落牆爆缸呢。呢種感覺就好似猶太人被追捕時逃走、驚俾人捉又驚搵唔返家人同朋友又要小心避免受傷。 離開冰冷紀念館範圍，再次投進陽光懷抱。今日難得陽光明媚，路上還遇到幾棵已疏疏落落正在開花的櫻花樹！ 一直以為重有好多時間，就悠悠閒閒周圍逛。再次睇錶，原來好快就夠鐘聽 Concert！沿著 Unter den Linden 菩提老祖大街係咁跑，總算揾到個位坐下。對柏林大教堂的內部建築印象不太深刻。。 第一次聽 Organ Concert，原來真係成個鐘只有 Organ 管風琴一樣樂器演奏。上次在寧芬堡聽的弦樂 Concert 好精彩拍爛手掌， d Melody 無論係熟悉或陌生都好，都會縈繞在腦海一段時間。而 Organ Concert 則係 sell 緊另一 D 野。其實對 Organ 的聲音並唔陌生，因為基本上所有歐洲教堂內都有或大或小一座 Organ，參與彌撒時或多或少總會彈奏。但平常 Organ 彈歌時，有 Chord 唱。而且彈一兩分鐘，又會停下做其他儀式有人講野。第一次成個鐘 only 聽 Organ！全場大概有 200 幾個聽眾，但大家都超級靜，如果想咳或打乞痴真係好唔好意思呢。 Organ 的聲音好有戲劇感，雖然只有 Organ 好似好單調，但個音又好似好厚咁。聽 Organ 會起雞皮，但聽聽下又好易會訓著，引用刁生的講法係聽 Organ 好適合沉思！見佢合左眼都唔知係訓著左定諗緊野。。。佢話乜就乜啦！XD 據聞當日聽的曲係 Bach 作的。 之後就去搵 Leo 同學食飯 lu！有驚喜的餐廳！下回分曉～～～
