今日繼續上旅遊歷史課。 早上先去參觀國會大樓，還上了一節 Lecture。（溫馨提示：儘管參觀是免費，但一定要提早上網預約！Lecture 則好像逢星期二才有。） Lecture 的叔叔首先問大家，知唔知自己身處的建築物叫咩名？點解好似咁低B 的問題？但一半人答 Bundestag，一半人答 Reichstag。正確答案係 Reichstag。但究竟點解會有 2 個稱呼？原來這座建築一開始的用途是德意志帝國的帝國議會開會用的。德意志帝國叫 Deutsches Reich，這建築物就叫 Reichstag。隨著歷史洪流，德意志帝國再到威瑪共和國再到第三帝國再到宜家德意志聯邦共和國，這座建築物仍然存在，仍然叫 Reichstag。而今時今日在內開會的團體就是 Bundestag 德國聯邦議院。 叔叔也有講過希特拉曾利用呢座建築物的一場神秘大火清除政敵，鞏固權力，不過希特拉自己並無在此開過會。 我身後和聯邦鷹下面的紫色座位就係 d 議員開會的地方，叔叔都有好仔細講解主持會議的人旁邊通常會坐 d 咩人，與會議員又會按咩野次序（例如今次討論咩野議題）而坐在不同位置。平日市民都可以入黎旁聽。 呢舊野（玻璃圓頂）應該就係最吸引遊客的部分了。二戰前的神秘火災燒爛左國會大樓，再到二戰後被荒廢， 直到 1990年10月3日兩德統一時，首都城市由 Bonn 變返 Berlin，呢座建築物亦重新使用返，修復設計加入左一個非常格格不入的圓頂，由最初的爭議聲不斷，到後來與舊建築融為一體，象徵柏林經過巨大改變而到達現時的嶄新面貌！ 沿著圓頂的斜坡向上行，遊人唔算太多，可以 360 度慢慢欣賞上四周景色。 出口有好大塊國旗。 參觀後，首先食一個自備的簡單午餐，等待下午參加 free walking tour。沿途經過了一個紀念被納粹殺害 "Sinti and Roma"人的地點。 即係咩人？（打緊blog 的今天）上網查下，"Sinti and Roma"人原來係指歐洲居無定所的流浪民族、因文化及宗教差異而曾被基督徒同納粹迫害的人，er...原來即係吉卜賽人。 風和日麗下等一小時當然無問題，但由這天起柏林的天氣真係變得超奇怪，等候期間有時落細雨，持續吹勁大風，傘都吹反的強度，大風吹得街上的樹葉塵埃垃圾在路人身邊起舞，starsbucks 又擠滿人，想搵地方避避都好難。好不容易才等到集合，不過吹風雨打都值得，因為呢個 walking tour 同個 guide 都令我地獲益良多！ 我地由 Brandenburger Tor 布蘭登堡門出發，導遊哥哥係個英國人，紮個髻幾有型，還有好好聽的英國 accent。呢個門唔只係柏林地標，簡直係德國地標。就好似巴黎鐵塔代表法國咁！佢一開始係為左記念普魯士係七年戰爭中既勝利，但呢座拱門上既勝利女神雕塑係被拿破倫入侵時帶回法國巴黎，但幸好後來係戰勝後奪回，及後，德國人再將門前既空地名為巴黎廣場，大家認為係咩意思呢？XD 係TOUR開始次際，佢首先叫我地睇下身後的 Hotel Adlon。 原來 Michael Jackson 就係在呢間酒店的總統套房 fing 個 B 出黎 say Hi。在網上查查這酒店的資料時，見到 trip advisor 有句評語：A historic hotel that's unfortunately known for Michael Jackson....umum，的確，這屬 Kempinski 集團的酒店原來 1907 年開始營業，經歷過二戰時期損毀、再重建，到現在的人就只係記得 fing B 事件。呢度最平的房都要 200 幾歐一晚，而貴係可以去到六、七千歐一晚。 （車～Kempinski 之嘛～我在蘇州出差果時都住過啦！XD 係幾靚的！） 導遊在馬路邊同我地介紹柏林另一對寵兒：紅綠燈公仔！cutie 的外型好似話係為左教冷戰後的東德小朋友過馬路而設計的！真係好可愛。佢地重有自己的專門店呢。（多謝西裝人完美示範～～） 來到 Holocaust Denkmal (Memorial) 歐洲被殺猶太人紀念館。高高低低的長方型就好似代表住被殺的人的棺材。遠望好有動感，但行到入去就會覺得好迷失。導遊坐在其中一個長方型上（佢叫大家唔好企上去，以示尊重，同怕有危險，但坐就得 wor...），迎著超強風、喊破喉嚨地為大家講述二戰前後的事。其中講起一戰二戰中間的時期，馬克點貶值，D 市民要推住成堆錢去買麵包。點解明明中學 history 堂讀過咁多有關的事，但每次聽人講起呢 D 歷史仍然有種 “哦！乜原來係咁” 的彷然大悟感。究竟我個腦裝咩架。 手多多去 google map 睇下呢個 Denkmal 的衛星圖。好震撼。 然後來到一個屋苑的停車場。 原來這片土地下曾經係希特拉的 Bunker， 亦係佢渡過最後時光的地點。 然後行到現時的財政部大樓，原來前身係納粹的空軍基地。 再行前少少就係 Death Zone。 之前幾個景點都是關於二戰、納粹，而 Death Zone 就係因二戰而帶來的冷戰而帶來的柏林圍牆的衍生物。概括黎講就係二戰後多國勢力競爭，周圍劃地盤，成個德國俾共產國家（蘇聯）同西方國家（英美法）分成 4 份，而當中蘇聯果份（即東德）入面包括的城市柏林又再被蘇英美法分成 4 份。未有柏林圍牆的時候，好多在東柏林東德的人湧去西柏林，希望再逃離東德，搞到東德勞動人口大跌。1961 年時東德的話事人就下令在幾日間起一圈石屎牆包住成個西柏林。即係如果唔好彩你某個屋企人朋友前幾日去左西柏林唔知做咩，諗住過幾日返黎，或者叫你過幾日過埋黎西柏林。點知一夜間就有鐵絲網隔開了，再過多幾日鐵絲網變埋石屎牆。真係太 dramatic 了。果時無電話無 whatsapp 無 email 無 fb，這次一別真係唔知點搵返對方，每次嘗試代入當時的東西柏林人的處境都令我好想喊。圍牆在 1989 年先被拆除，足足 38 年，對失散的親人愛人朋友是何等煎熬！ 講返 death zone 先，其實即係圍牆往東德方向推前好似 100 米再欄 D 鐵絲網，圍牆同鐵絲網中間係剷平曬的沙地，幫助軍人更容易“截殺”想偷走的人。縱使係咁樣，仍然有好多人用盡方法逃離東德，我們聽過最 unbelievable 又成功左的是在家秘密自製熱氣球飛過圍牆，同埋秘密挖隧道 (tunnel 57....突然覺得好似 curry 36 XD)。 之後就到了另一人氣景點 Checkpoint Charlie。 原來這裡叫 Charlie 的原因係因為 C for Charlie....呢度有 2 張背住放的軍人證件相（一個美軍一個蘇聯軍）同背住放的告示，因為這裡是東西柏林邊界，互相警告對面的人唔好走過界，睇 L 住！ 還有幾個著曬軍服的人扮返當年今日，俾遊客去合照。都唔知有咩咁好扮咁好影。 柏林市中心抬頭到處都見到呢D管。聽導遊講原來係水管，有藍色、粉紅色。好鬼 sharp。 好多地方都有 mark 返呢度曾經係柏林圍牆。 walking tour 全長 3 小時，加上果日風大到不得了，好在中間有個人 break 可以抖下。最後行去 Gerdarmenmarkt 御林廣場，呢度有 3 幢大建築： （左） （中） （右） 因乜解究左右兩個教堂咁似樣？！導遊話右邊的法國大教堂係先開始建築及建成，而左邊的德國大教堂就係抄人 wor。唔知係咪真呢，不過真係好似樣！ 地上這鋼板紀錄了納粹在這裡焚書的事件 焚左幾多書呢？就是在這玻璃下空間內吉書櫃可以盛載的數量。呢個表達方式比起數字更深刻震撼。 雖然話係 free walking tour，其實最後都會俾 tips 的。因為這些導遊的收入都是來自小費。這次的導遊哥哥雖然係英國人，但對柏林都好熟悉，講解充滿熱情，very good！自從在 Amsterdam 參加過 walking tour 後，真係覺得好值得。有好多野真係睇十本旅遊書都唔會知道或注意到。 上完沉重的歷史課，去行下著名朱古力店 Fassbender & Rausch Chocolatiers 先～ 好多產品，睇到暈。本身好想食上面呢 D cake，但因為只可以簡一舊又簡唔到，所以最後用了差唔多的價錢買左幾粒朱古力，起碼可以試多D唔同味！ （可憐的 Y 只有幾粒。。。大紙袋係刁生買俾同事的手信 >.<）（不過真係好好食！我現在還記得的味係好特別帶點酸的 Balsamico 味，和好清新的 pomegranate 味）
