第二日既行程主要係去城堡區 HRADČANY 係呢個區有兩樣野係比較深刻：聖維特主教座堂（Katedrála svatého Víta）以及黃金巷（Zlatá ulička） 關於聖維特主教座堂，我地當時混進左人地既 guide tour，所以聽左好多故仔，不過大部分都唔記得lu。依家只係記得呢個教堂係同時擁有羅馬式及哥德式建築既教堂，而且係內外都可以感受到呢兩種風格。 另一樣還有記憶的就係教堂入面的一幅畫，講一位教士 Jan Nepomucký 既事蹟： 話說當時既皇后有外遇，所以會成日走去搵呢位教士告解。有日國王就要求教士供出個位同皇后偷情既人，教士當然係唔會講啦。於是，國王就命人將呢位教士掉落河浸死。不過好有可能呢D都只係藉口，因為呢位教士既宗教觀點本身就同國王唔同，而且教士亦好捍衛自己既信仰，所以國王咪借機殺人囉。 而黃金巷就有趣D，首先呢度原本係一D 煉金術士（唔係咩鋼之煉金、焰之煉金個D呀！）聚居既地方。依家就換成左展覽館同手信舖。 奇奇怪怪既盔甲 呢到亦曾經係卡夫卡（Franz Kafka）既住所，係呢度買左我地第一同第二本德文小說，希望不久將來可以睇得明啦！ 上次唔知邊個係哈維爾，甘卡夫卡識啦掛？又唔識？唔緊要，一陣仲會去佢既博物館，到時你就知！ 係黃金巷真係有黃金！地上執到寶，問天問地攞唔到～ 不過唔係你既就真係唔係你，轉個頭又唔知係邊跌左。。。 臨走同 Praha 泥番個合照先！ 呀。。。點解我硬係覺得佢係想講：「我地係靚呀！吹咩！？」 之後就去左卡夫卡既博物館，但時間唔夠，而且入面主要係展示佢寫作時曾經用過既物件，所以都係唔好哂錢啦！至於卡夫卡係邊個？《變形記》有無聽過呀？無？咁真係要自己wiki下啦！ 行到凍凍地餓餓地，就試食左一個地道的麵包牛肉湯，街頭小食的價錢，唔單只個湯可以暖下胃，個包亦都好好食！但奇就奇在我地見到 9 成的人飲完 D 湯都唔會食埋個包就走人，非常浪費同可惜！ 左拐右拐下，終於拐到列儂牆。去唔到香港列儂牆，甘我地就去睇睇原版啦。 本來諗住順道去埋列儂場附近的教堂，點知連TV recording 都出埋，無野好講。。 係Praha，有一個極出名既景點係仲未出現，就係查理斯大橋（Karlův most）啦！其實之前果日我地已經經過左一次，不過當時落大雨，又凍又大風，用眼睛欣賞過無人ga大橋就急急腳去搭車，無影到相。今日天氣好D 再一次經過，已經變得人頭湧湧！ 橋上立滿不同雕像，當中包括 Jan Nepomucký。傳說當時D人知道佢被拋左落河後，大家都想搵返佢，就算救唔到人，搵番遺體都好。而當晚天上出現左五顆星，星星下就確確實實係教士既遺體所在，所以依家佢頭上就多左五顆星星啦。 佢當年"被"投河既位置 行左咁耐又肚餓啦。我地有備而戰，一早問左我地既旅遊師兄－Henry 弟弟攞定D食野好路數！結果，Henry弟弟萬歲！！！成餐平靚正，餐廳裝修重好傳統，好有氣氛！！食左烤豬手，配埋 wasabi 食好惹味，還有 BBQ 拼盤和 Henry 口中好似肉醬意粉個醬的牛肉湯 goulash，而第三張相係神秘菜色，係個舊同事叫我地必食的 "knedlo vepro zelo"，我地俾個名 waiter，由廚師特別為我地準備嫁！呵呵呵～～其實就係豬扒，配菜係一D 好特別ga 薯波、麵包片，不比豬扒失色！ P.S. 我地請後面木台的客人幫我地影即影即有，點知佢地覺得好新奇，最後幫佢地影返張作留念 :)
