嘩嘩嘩終於打到呢個值得紀念的日子了！ 2015 年 3 月 29 日：我地一齊完成了人生中的第一個半馬！ 2014 年 8 月時心血來潮報左名，然後斷斷續續都有偶然練下跑，後黎忙於返工搵工搬屋，再過左幾個月慕尼黑開始越來越凍，再落雪，實在有太多藉口唔練跑了！ 1 月返到香港開始淆底，一星期都有跑一次麗城海旁！每次跑都會好驚訝，因為不久以前我還是由西約跑到汀蘭居就已經有窒息感覺，同埋好想行返轉頭返屋企。在私人陪跑員刁先生鼓勵＋獎勵＋恐嚇＋欺騙＋（下省 100 種手段。。。）之下，來回深井都唔驚！體能耐力意志力真係可以鍛鍊返黎的。 2 月住在 Laim，被兩個公園夾在中間（豐儉由人：短途往右跑 Hirschgarten 方向，一圈 2K；長途往左跑 寧芬堡 方向，一圈 7-9 K），加上時間緊迫，真的再沒有偷懶的理由了！ 3 月 28 日晨咁早由慕尼黑搭 9 個鐘巴士上柏林，坐到腳都痺。落車即刻去落腳地，乖乖求其食個 kepab 就沖涼訓教。本來唔知會唔會太緊張訓唔著，但舟車勞頓過後真係累到極點。。。一教訓天光 晨咁早起身，天氣陰濕寒冷，著住大羽絨出門，先去 Karl Marx Allee 的集合區攞號碼牌！我係 F6511！你係 7193！除了號碼牌，還有一個要綁在鞋帶的 chip，要黎計時。（好似要俾成 10 驗租。。）還俾左一個大索繩袋，可以放曬 D 隨身物品入去。 集合區其中一部分泊左好多貨車，原來係俾參賽者的臨時儲物室！ 未夠鐘，周圍 fing 下，到處都人頭湧湧，走進一個因半馬而封左的 u-bahn 站度同眾人拉筋。拉到咁上下又影下相又執下野，再去貨車放野。（圖中是免費拿的 adidas 背心膠袋背心，因為早上有雨，很多人都穿著，但臨起跑前停雨了，大家都紛紛丟到路上。。我們收起了一個作留念，它的下場是....回到慕尼黑某次剪頭髮當左好似披風咁用 haha！） 其實只係跑 2 個幾鐘的步，但真係好緊張，一時又突然好口喝，飲左兩啖水又開始人有三急，到處的流動公廁都大排長龍。終於放完水行入起跑區等候，由於有些少機械故障，所以遲遲都未開始，企企下又再急，思前想後還是爬過鐵欄再放水。開始前真係好緊張，又驚甩鞋帶，又驚著風褸太熱，又驚口喝又驚急。 上面就係 21K 的路線。沿途會跑過柏林好多不同區域，見到好多著名景點，首次踏足柏林的我們對此表示十分興奮！！首先經過 Vapiano （只係一間連鎖餐廳，但唔知點解印象真係好深刻），望到電視塔，不久右手邊出現又一座很大很舊的建築，後來才確定是柏林大教堂！再穿過柏林的標誌 Brandenburger Tor，然後就係一條大大大直路六月十七日大街 Straße des 17. Juni ，見到勝利女神紀念碑 Siegessäule。。。全部都係好新鮮的風景！為左減少負荷無帶電話，雖然無法拍低呢 D 咁特別的 moment，不過起碼都用眼親身睇過，感覺同行路睇景點好唔同！（下次我還是不會帶電話，因為專心跑是很重要的！） 出發前曾經好掙扎要唔要聽住歌跑，因為好驚自己意志支持唔到。雖然我地有訓練，但跑黎跑去都係 8 － 12 K 的距離，已經覺得好Q攰，所以認為有 50％不能完成賽事。不過原來跑馬拉松同自己平時跑係非常唔同的！！賽事的氣氛可以令你好享受咁跑，從而不知不覺跑了很多。 路邊好多人舉牌等緊自己屋企人出現同佢打打氣，乜野年紀的打氣者都有，亦有好多敲擊樂團在旁打鼓，非常熱鬧，而且旁邊有好多人一齊跑，周圍望欣賞下健碩俊男或美腿，驚訝點解某個伯伯咁老還跑得，見到有個女人的號碼係 F689，看著一些大 pat pat fing 來 fing 去引以為鑑等等，很快就去到第 1 個補給站，飲下水～ 跑前刁沖其實負傷在膝，比賽開始後無耐已經有點痛，終於到 17 K 左右開始跑下停下行下，（佢懷疑係中途停下來放水致腳痛加劇！）所以就到我開始鼓勵返佢，要頂住呀，行都行埋佢！到最後 1、2 K，突然 notice 到一個步得好辛苦但我地總係超前唔到的男人，佢衣服上大大隻字寫住“Vegan Runners”！刁沖的鬥志頓時被燃點起來，多次想爬佢地再多次俾佢拋離（幾步咁多啦 XD） um... 最後我地幾乎是一起衝線的，不過....他在我們前面....（這張相大家的腳已經沒有離地咁濟） 衝線的人都有獎牌！成績係 2:46:45，對呢個時候是慢是好慢還是近乎行路的速度是沒有概念，完成到已經是一大 achievement！ 個天雖然好陰，但我地就好開心！ 還有按摩服務！ 食返D蕉補充體力先！ 後記：可能因為太冷的關係，人潮散得很快，我們離開時已經很冷清，工作人員都已經執緊野。趷住腳回到 airbnb，沖完涼邊度都唔想去，就在床上煲劇吧！ 晚上還是不甘寂寞，溜出去與 Leo 食餐勁的！希臘菜！好味的魚、包和配菜！ （一星期後終於可以看到官方影的照片，未俾錢當時會有 logo 檔住啦，但點解幾乎張張個 logo 都係檔住我塊面！！！！由於太貴，我們都係 cap screen 算了。）
