這是本次旅程的最後一日！手上既 T10 車票只係剩低最後兩次(即一人一次)，大會一致通過「行過去，搭車返」既提案！ 但事實上，可以行到而順路既地方基本上行哂，所以我地今日就係要搵返d漏網之魚！ 首當其衝既當然係屋企左近既大市集！ 一心諗住過去睇下有無平靚正既海鮮執，整番個皇帝午餐當踐別禮，點知原來成個場都係賣乾貨既。。。行落仲好似鴨寮街，咩狗屎垃圾都有得買，包括N手用過後係櫃底搵番出泥又未洗乾淨既鑊，以及比人蹂躪到不似人形的Barbie公仔。真係古里吾島！ 下一個check point 就係四隻貓cafe！ 呢四隻貓有咩甘特別？依家其實無咩特別，不過以前就係藝術界既名流集結地，包括Picasso在內都有係到辦過畫展！ 行下行下，又有d餓，誤打誤撞入左間百年老店，買左個蘋果撻，仲要係非常蘋果個隻！基本上就係四片甜的蘋果加一片好薄的餅底。 當然一個撻係滿足唔到郭小姐，我地再向 La Rambles上好著名的街市出發！ 呢個街市人頭湧湧，亦都好多野食，其中比較特別既係鹹pancake! 味道還不錯！ 場內其他店 傳說中的用於Paella的番紅花！好貴 行完之後又再食Paella, 依然係太鹹 拿好行李就搭地鐵去機場。一般城市的機場都不在市中心，而且要俾多啲錢搭車先去到，但巴塞隆納就好正，只要扣 T10 中的一程就可以去到機場。到達機場後手上的 T10 還餘下六程，膽粗粗試下在機場轉賣，點知輕輕鬆鬆就賣了給一對正在頭痕唔知點買車票的韓國情侶！唔使蝕！ 巴塞隆納機場外牆有一幅 Miro 的作品，一隻雀一粒星歡迎世界各地的人來臨。 我地班機係第二朝七點幾，本身貪玩諗住試下訓機場，點知後來知道我地係好應該訓機場！如果唔係都唔知晨咁早點去機場！我地之前在 http://www.sleepinginairports.net做過 research , 啲人對巴塞隆納機場的評語都幾好，起碼安全、唔會俾人趕。呢個網製作好認真，會提醒初學者有咩要注意，各機場設施等資訊，還有好多過來人好心留下的評語。 大概十點幾到機場，首先行一圈睇下有無啲比較舒服的坐位。係無的，全部都係有扶手隔開的連位。選了個比較有人氣的位置，當晚我們見到的同路人大概有十個，有些直接入睡袋訓地板，我們採取輪流訓教，但其實都不能熟睡，因為張椅始終又硬又窄，最後大部份時間都係傾計、聽歌同睇《爆漫王》！ 機場原來十二點左右就會識大燈，唔知香港國際機場係咪廿四小時開燈架呢？ 早上大概五點陸續有人來機場，燈亦重新亮起，我地趕緊去 check in，因為要爭取時間去 priorty pass 的 lounge 度食早餐！不過昨晚訓得麻麻，所以胃口都一般。 就這樣，西葡之旅就結束了！
