在德國搵散工做，其中一個（亦係好主要的）渠道就係去開元論壇。開元係德國一間旅行社，好多華人會在論壇登招聘AD，或租屋資訊，又或者賣二手野。（其實還有好多版塊，不過我地最常去呢三版） 我們當然要經常蒲開元，前兩篇講到的學生宿舍及人造人巢穴都係通過開元搵到。而工，我地都離唔開中國人關照。 刁沖憑著推銷自己六呎高、是個有氣有力年輕男子、加上識熨衫，搵到一份在酒店處理窗簾的短期工。點知呢邊未開工，另一邊佢又突然憑著流利普通話、誠懇態度（同時是個有氣有力年輕男子）搵到免稅店3個月的工作，只好推左窗簾工，同時向人地推薦左。我。哈哈，雖然我沒有六呎高，又唔識熨衫（不過我話我識，然後在家惡補熨返幾次），可能人地等人用掛，最後都叫左我去返工。YEAH 呢份工返一至六早8晚7，早上重要整埋三文治做 lunch，持續三星期，少D毅力都堅持唔到。叻叻Y 一次波都無射過 （印象中），只係遲到過兩三次姐。 工作目標係為即將開業的 Motel One 十三層所有房間裝好窗簾。Motel One 係連鎖酒店，簡約風但有 Style，貴唔貴就唔知啦。酒店主色竟然好似 Nu Skin Blue！呢隻曾經一度令人麻目的顏色，原來都幾靚幾 Sharp。 一齊返工有一個大陸留學生，幾個希臘人，其餘都係德國人。點知第一日收工，個中國男仔就俾人踢走左，好似話佢唔認真。我都唔係咁肯定，總之我 survive 了啦！ 裝窗簾，並不是一掛就掛上去咁簡單。所有窗簾堆曬在一個大房，首先要將呢D好鬼重的窗簾布按不同樓層分好，以便一層層運上去，再放入每間房。同時間，D男仔就去每間房安裝掛窗簾的軌。佢地鑽牆上軌前已有人畫好曬每條軌對應的孔。當窗簾入左房，就要在窗簾上鈎D鈎。 鈎鈎唔可以發夢，因為每隻窗size都有出入，鈎的數量也不同，所以要數住。一個唔覺意將D鈎反方向咁鈎，又要拆返出黎，唔止費時，重會手指痛！ 軌裝好，鈎鈎好，就可以掛上去。爬上梯頂雙手掛窗簾原來唔容易，一來窗簾好重，二來個鈎同軌上面個孔都好細，要岳高頭伸長頸伸長手咪起眼先入到一個鈎（可能我矮手又短），最慘係雙手都拿著窗簾，只能用雙腳夾住條梯。感覺好危險。我第一次掛時，雙腳控制唔到狂震，好不容易掛好一條窗簾，落到黎眼都花，個 leader 都睇到驚，最後好好人咁豁免我不用爬梯掛簾！ 掛完下一步就係收靚窗簾底部，因為窗的高度不一，所以掛完才縫返個底。由於得一部衣車，所以由專業人士包辦曬，唔使我做。不過我試過縫，都幾難，因為D窗簾好厚。 縫完，就要用熨斗壓返底部條邊出黎。最累係要拿著熨板和蒸氣熨斗逐間房出出入入，逐層樓上上落落。（因為人同搬運都用同一部電梯，所以唔少時間都用了在等 lift！） 同一時間有人去熨走窗簾上的皺紋，舉起蒸氣熨斗向上蒸呀蒸熨呀熨都好累。最後一步，就係用條繩綁埋條窗簾！禮成！ 工作期間，遇到好多其他專業工人，油油呀，砌櫃砌床，整水喉，整門較等等。可能由於接近完工期，在入面都唔會聞到好勁的裝修味，反而雙手日日同窗簾磨擦，搞到D皮膚粗曬又敏感，好彩好快無事！ 呢D都算係辛苦錢，重要扣左3X％稅！嗚！ 另外介紹下一隻我（們）在慕尼黑好中意食的朱古力先！牌子係Milka，印象中香港以前都有得賣呢個牌，但無印象話好好食。 在 Motel One 返工每日有一個小時午飯Break，附近無咩商鋪，除了一間新開張的REWE。所以我成日食完野就過去行下 （新開張那星期還有試食！還送了一盤花俾我～！）重點是每次經過呢個架都令我駐足不前。。。呢隻牌子除了有賣正常的純朱之外，重同好多其他零食crossover！ 個夾心有好多唔同口味：OreO，朱古力曲奇，士多啤梨，聰明豆，乳酪，餅乾。。最令我愛不惜手就係 OreO 同士多啤梨，食唔停口的！試過在夏天帶出街食熱到溶曬，點知用黎搽面包都好好味，返到屋企雪返硬佢又得！正價0.99歐，減價 0.55歐，所以都掃左D返香港同人開心Share！（不過一月返到黎，正價已經加到1.09歐啦！希望快D減價啦～～！！）
