由里斯本市中心去 Sintra 都幾簡單，只要在 Rossio 火車站買張價值十五歐、可任坐 Sintra 巴士、連來回里斯本的 day ticket，再坐四十分鐘火車就到。 由於成車人都係去 Sintra，我地就大安旨意睇《爆漫王》，直到全車人企起身，我地都跟大隊一齊落車。 在Sintra要去的景點好明確，巴士線就好似旅遊巴咁車到你去每個景點的門口：落車＞買入場卷＞行景點＞在出口等巴士＞在下一景點落車。。。由於時間關係，加上每個景點都收費不菲，取捨之下我地選擇左摩爾人城堡、佩納宮同歐洲最西端: 天涯海角。 摩爾人城堡 Castle Moorish 建於七至八世紀，城牆在山頂延綿，可以睇到 Sintra市的全景。可能因為我未去過萬里長城，所以覺得呢啲城牆好有氣勢！呢個山頭在1995年被列入為世界文化遺產。 山頭上有一部免費的望遠鏡。平日呢類望遠鏡都要收費，所以從來無玩過。第一次睇，發現原來真係望得好遠，重要好清楚！在摩爾人城堡可以望到山下另一皇宮景點 Quinta da Regaleira 中的遊客行來行去 (睇左呢幕就當自己都去過嘩哈哈哈)，還有海上的一艘船 (肉眼望只係海上的一小白點)！好 amazing，不過之後都仍然唔會俾錢睇 XD 點擊圖片放大 +2 點擊圖片放大 影完一大堆寫真就落山上巴士去另一山頭的佩納宮 Palace of Pena。由於佩納宮是在佩納公園內，所以佩納公園的門票就走唔甩。有三種門票，1) 只買佩納公園，可以睇下佩納宮的外圍；2)買 Park + terrace ; 3) 全包... 窮鬼選了最平的門票(都要€7 / 人)，諗住遠距離觀賞下就算，點知原來都可以行到好多地方，所以都好滿足！ 色彩明亮, 令人好開心 ! 不過好多部份都包紮維修中.... 同返摩爾人城堡遠距離合照 ! 好中意呢舊腰果石 睇完佩納宮，周圍行下 呢粒係好好食的CHERRY GIN in Chocolate...(大概咁上下啦個名...隔左成個月唔太記得) 周街都劃一價 1歐, 好好食 !! 在Sintra 火車站搭45分鐘車去歐洲最西端 Cabo da Roca，之前睇過個 Blog 話條路好多彎，搭到佢暈車浪想嘔，但沿途我們淨係覺得，好好訓。。。兩人輪流訓。。。 周圍都係一望無際的海洋！ 點擊圖片放大 睇相環境好靚！但實情係凍到抽筋！ 呢個石碑係眾人的check point，要影一張滿意的相，少啲心機、運氣和耐性都唔得。。。首先要等好耐，睇準時機zip過去，同時要好彩搵中一個識影相的陌生人，最後自己要生性擺好post 唔好眨眼！ 其實如果著夠衫，呢度真係值得留耐一點，行遠啲睇多啲。不過我們唔想咁快病，所以就乘了下一班車離開。 除了返 Sintra 搭火車返里斯本，重可以去另一城市 Cascais 搭火車。逗留了一會，好像San Sebastian 的 relax, party 感覺！ 呢個流浪漢好勁，賣藝賣到可以養多兩隻狗仔！睇真啲佢個兜係無咩碎銀，但狗糧個兜就好滿！ 回到里斯本，趕得及欣賞晚霞 晚上去了一間有 Fado 表演的餐廳，不知就裏地食了桌上可以選擇不吃的麵包和芝士、傻傻的點了兩份名字很不一樣但內容九成一樣的煲類食物，雖然好香口好好食，不過好滯，食唔曬。。。第一張係豬肉薯仔海鮮煲、第二張係豬肉薯仔蜆煲。。相似度大概就像孖生兄弟。。 至於Fado 表演，是有幾位男女歌手輪流唱，我們最中意聽兼彈Portuguese Guitar的中年男歌手，聲音渾厚。呢餐雖然有啲食多左食貴左，但都是很好的體驗！ 食飽飽，一邊散步消化，一邊欣賞夜景。好充實的一天 :-)
