早上咬著昨天買的無內涵特大餐包，徒步下山再過橋去對面岸睇一個修道院的遺址。 Santa Clara 修道院遺址：好多年前因為河水泛濫，逐漸被淹沒，修女們建造了二樓，後來水位繼續上升，不得不放棄，到高處再建一座。以下整個凹陷的部份就是靠考古人員逐少逐少移走沙石，才能重見天日。呢幾歐參觀費俾得好值得，很佩服考古人員的毅力！ 加建的部份愈來愈貼近屋頂，不過最後都唔夠啲水升得高 呢個曾經係修道院牆壁的一隻窗，亦係當年考古人員從〝地面〞進入修道院二樓的入口。點擊圖片放大 睇完遺址，頂著大太陽行斜路上山，參觀十八世紀超豪華大學圖書館 Biblioteca Joanina！曬到溶！ 好斜 參觀圖書館又要俾錢買張套票，兩個人好似十一歐，但其實套票包埋的教堂和大會堂都無乜特別。參觀圖書館還有指定時間，買左飛的旅人們就在門口站著坐著等開門。。 內部嚴禁攝影，所以只可 post 下張floor plan XD 正門入去、即最高果層的古典裝潢保存得很好，據說選用的木材有恆溫和防蟲功效，而且館內由十八世紀開始已住左批蝙蝠！無錯，係館內！初初以為get錯左，專登問下圖書館管理員，佢好認真話啲蝙蝠就住在橫樑上，不過佢地夜晚無曬人先出黎，專食害蟲，唔會咬書咬紙咬枱凳！重好似話無人見過佢地，但肯定佢地一直與圖書館並存。。。(其實佢講完都有啲唔信，好似好搞笑咁，希望無理解錯) 然後再向下行有個監獄，以前專捉啲壞學生入黎閉門思過！呢十一歐值唔值就見人見智，叫做見識過一個有歷史又keep得好的圖書館。 這大學山頭氣氛不算特別浪漫，但見到好多情人忘我熱吻。有人內心掙扎了一輪後，見佢地重錫緊，忍不住按了一下快門。。 跟住又急急腳碌返落山，因為買左飛聽 Fado ! 盛惠每人十歐！(包杯 Port 酒) 一般唱 Fado 男或女都有，但 Coimbra Fado 獨特之處就係只有男仔唱，因為呢度啲男仔晚上會在女仔窗外唱歌彈結他求愛，據說如果女仔聽完接受男仔示愛，就會關燈開燈三次暗示答應；而如果有路人(花生友)聽到想表示支持，他們好識做，不會拍手嘈住人，只會暗暗喉嚨痕咳幾聲！除了情歌，還有好多校園風的作品，因為 Coimbra 係個大學城。 五十分鐘的表演聽到我地如痴如醉，一位情深款款的歌者，一位巧手彈 Portuguese Guitar 的憂鬱男，和一位彈結他的小伙子。其中憂鬱男 Solo 左段唔記得咩 minor 更另大家拍爛手掌！完show 忍唔住買左佢地隻碟 XD 很充實的一天~完~
