"I have been to Tübingen and it is a really good city." - Frank "Tuttingen is a place you would be disappointed. Sigmaringen is ok. The castle is good, but Tübingen is a place you shouldn't miss!" - Hans 呢兩個就係我地對 Tübingen 僅有的資訊，評價極高，但老老實實，我地從來未聽過呢個地方，甚至經常即將佢同 另一城市Tuttingen混淆，而trip adviser上面既資料亦唔多。講到甘正又甘神秘，我地就安排一日day trip去睇睇究竟係何方神聖！ Tübingen係一個幾幸運既城市，係二戰時無被摧毀，保留左唔少古色古香既建築。現今佢係一個大學城，更增添一點書卷氣！呢個城市景點唔多，我地參觀了在山頂上的城堡(同時係大學) Schloss Hohentübingen 、教堂、沿河邊散步、行下橫街，有種返到舊歐洲既感覺，清淨優美。 (啲大學生要爬山返學。。。咪有更多原因走堂？！) 呢塊板話1869年 Friedrich Miescher 先生在呢個城堡度分解到啲 acidic substance...類似係DNA的初步研究 (對不起讀文科的我對此理解非常有限，講到一舊舊，總之係個重要的地方啦) 好喜歡教堂的彩色玻璃 某條街上一間模型店鋪外請了蜘蛛俠黎做宣傳，但點解要用鎖鏈鎖住佢呀！！！ 到德國成個月首次食中式便當，味道都算係咁，重有幾舊翠玉瓜而唔係椰菜，但我比較中意係個packaging！有條鐵線手抽，好精緻！哈哈！ 離開如詩如畫既 Tübingen , 就搭火車去另一個城市 Memmingen, 因為準備聽日搭廉航去西班牙！在Memmingen 逗留了不夠24個鐘，完全無入過市中心參觀，七點下火車就與 Couch Surfing的 host Joana同佢朋友Queenie 去超市買野，因為今晚我地要一齊煮野食，煮咩？佢地竟然提議 home made Spätzle !! 超興奮 ！ 自製 Spätzle 其實並不復雜：用蛋、麵粉、水撈pat野先，再煲一煲水，水滾後不要熄火，在滾住的水上，放pat野上一個有很多窿窿的專用工具上，刮呀刮，一條條蝌蚪狀的麵就跌入水中，好快會浮起，就可以筆起，因為每次不可以刮太多，所以四人分量大概要重覆做十次左右，最後用牛油把蝌蚪麵炒一炒，就會更香！講起都肚餓！ 因為煮面時太專心，無逐個step影相，不過刁兄預言我返到德國肯定會買返個黎用，所以到時再整再影啦！ Joana好有心思，在garden set 到好浪漫咁同我地 dinner！佢地分享左好多趣事，最得意係德國有個叫capture the flag 的傳統：在夏季人地去camp時，晚上偷偷潛入人地個camp 搶左人地枝旗。。。換酒飲！不過一邊聽佢地講啲有趣經驗，不由得從心覺得自己老左好多，基本上聽到要捱夜、兩點都無得訓就已經驚驚！佢地細我地十年，精力真係非常旺盛！我地都要養好啲身子！。。。(養生的概念已經好唔年輕人啦哈哈哈哈。。。) 順帶一提，我們今次是住在house 的閣樓，環境唔錯架！好開心又遇到好人又好客的host，我都好希望第時在香港可以招呼返啲旅者！
