Baden baden 與 Stuttgart 之間有個叫 Karlsruhe 的城市，我們見幾順路，trip adviser 又幾多景點推薦，所以就加插左呢個地點。呢個城市名的發音好難搞，中間ru 的音讀極都讀唔到德國人聽得明的發音！而呢個名的由來都有個好搞笑的故事，話說以前有個叫 Karl 的emperor，在呢個地方打獵時訓左個晏教，夢見一個座好靚的皇宮，醒返之後就決定要在呢個城市起皇宮！所以Karlsruhe 的解釋就是 Karl 在這裡 ruhe (休息) ！我都想發個靚夢之後買層樓！ 呢個城市的規劃以座皇宮為出發點，180° 以 sun beam 形狀發展出大大小小街道，睇地圖果時都覺得幾特別，所以我地叫佢太陽城。Couch surfing (CS，即係去人地屋企借宿) 聽就聽得多，出於好奇和想慳返啲旅費，就膽粗粗體驗下啦 (但其實都有淆底，去緊人地屋企途中係咁搵。附近有無酒店可以俾我們緊急逃走。。。) 我們很幸運，搵左不算太耐就有人覆我地，confirm 之後都無乜事前交流過，只有人地一張相、電話、地址。因為我們選擇拖住行李行過黎，踏入人地家門一刻，身水身汗，互相介紹一番，屋主Frank 又講下呢個城市有咩特別景點(當地人的角度係無乜景點)，第一次見面難免有啲緊張，多得有個未夠一歲的小baby 在家爬黎爬去搵人玩嘈嘈下，想deadair 都難呀！ 呢一家三口非常好人和好客，兩公婆英文好好，溝通完全無問題，而且好巧合，老婆Carola 讀EE，重黎過香港的中大exchange 一年！由於第一次CS，完全無概念要做啲咩、offer 啲咩，我地重話要上網search下有無CS禮儀。。。不過我地都唔好意思在人地屋企做大食懶，所以主動提出：今晚我地煮dinner 大家一齊食丫！好彩在農舍跟 Carlos偷師過點樣煮雜菜飯，見過Hans 點樣煎white sausages，可以扮下野，睇得出屋主見我們煮飯時都有點擔心，(個飯亦有啲啲燶和痴底)，但食落一啲都唔失禮人！真心好食！哈哈！ Frank 雖然覺得 Karlsruhe 無乜景點特別好睇，但就強烈推介我地去 ZKM | Zentrum für Kunst und Medientechnologie。好好彩我地8月2號去參觀，博物館8月4號就開始大裝修！我地由屋企行過去，首先經過一個 weekend market，好多芝士、ham、蜂蜜、天食品、蔬菜賣，可惜我們行李空間非常有限，啲野食又大大件，即使想試想買都只可以忍手 :-( 這是在 Hans 度成日食的 herb cheese (blumenkäse)，芝士外圍有細細條香草花卉包住，幾特別，不過次次見到都好大舊！ ZKM 的展品是比較 contemporary和多元化，好多裝置藝術，好多可以同spectator 互動的作品，邊睇邊玩，足足用左成五個鐘！值得記錄一下的有ground floor 重口味的特別展覽，著重官感刺激，但睇到有點反胃；二樓 Hologram 作品展，透過光的照射在平面上看到很立體的影像、動物，甚至有套 etv 解釋製作方法；三樓是一個打機展，展出舊式電子game進化過程，亦有好多新野，例如有個叫Pain Station，兩個玩家左手都要按著一塊金屬 panel，輸左就會有懲罰如電攻、火攻、鞭打(手掌)，邊個頂唔順縮手先就輸！我們都有心試玩，其實啲所謂電流、火燒都係好輕微，不過啲音效好勁，令到我好驚，次次唔夠兩關就縮手，搞到刁兄贏左都好無癮，哈！ 另一特別裝置：黑房中有五個盆栽、一個黑屏幕，初初唔知可唔可以掂啲植物，後來有個職員話可以輕輕力摸，原來觸摸唔同盆栽就會有不同的vegetation在屏幕出現，好得意！ 其他鬼馬野： 行到好累好肚餓，在館的canteen食啲野醫肚。不得了，又見到Spätzel ! (其實因為Spätzel 在德國南部是很common...) 今次做法係只用芝士焗，好香好creamy ! 配埋啲沙律菜就唔會太滯！真係好好味！ 行完ZKM，我地去左市中心行下啲指定景點，都係教堂、拱門之類，其中一個出名的景點是市中心的金字塔，聽講是某人的墓，點知真理，因為有地下鐵路工程，成個市中心都維修中！周街都係地盤，好多本來有睇頭的建築都著多左件衫，包到實乜都睇唔到，金字塔都唔例外。好多路都封左或者要改道，行到人都燥。最頂癮是見到呢張明信片：抱歉！工程至2020年！ 講真呢個城市觀光價值是below arrange，但因為CS識左這家人，令呢兩日好難忘。 有一晚待小baby 訓左之後一齊玩board game、學沖cocktail、同佢地傾計了解左好多德國的事、臨走果日佢地知道我生日，買早餐時重買左個tart 俾我，最搞笑係小baby一見到就手指指拍曬枱話要食！ 總結第一次 CS 體驗令人很安心，事前擔心的事情都沒有發生，屋主好，環境亦都好(我地雖然訓廳，但係訓的是IKEA雙人梳化床，有被又有枕頭，非常舒服！) 認識了很多只做遊客未必會發掘到的事情，最重要係識到新朋友！我們應該唔會想再黎 Karlsruhe 旅遊，但希望有機會再見這一家三口啦！
