講左咁耐在農場做咩，都未介紹過我地 helpx 個 host, H先生是一位退了休的地質學家，退休後同老婆搬來了這個小鎮做農夫，已經成二十年了。幾個月前老婆剛過身，現在由他獨力打理農場的大小事務，都feel 到佢幾吃力。我們到來幫忙前的一個星期佢都無helper, 所以頭幾日都不停捉住我地傾計，一餐飯連煮連食成五六個鐘，晚晚都九點幾才開飯，十一點幾先食完，再沖涼洗頭，第二朝六點半又要起身，都幾辛苦。 H先生很環保，做事很有原則，洗碗不可開水喉，要用warm rain water; 有洗潔精的水不可以倒在升盤，要倒到屋外坑渠，如無洗潔精則用來淋花 ; 不可以浪費的原則更令我們大開眼界: 紙品用來生火煮飯(對，我們是用木生火)，蕉皮薯仔皮蘋果心菜頭菜尾所有人類唔食的食物可以用來餵鴨; 面包碎要倒在屋外面當雞糧; 用過ga碗碟先要俾貓貓狗狗黏乾淨殘渣才入洗碗機，豬腳食剩啲骨就由家中兩隻狗狗解決埋; 蔬果腐爛薯仔發芽食品過期完全不當一回事，只要批走變壞的部分就ok; 膠袋鐵罐玻璃瓶當然回收; 煎完野的油和煮過菜的水會原煲收返好，聽日煎野煮野再用; 之後更加問我地點解要晚晚沖涼，因為佢只會一星期沖一次。。。實在不能盡錄。他如此環保實在令我們反思香港人製造垃圾污水的速度和分量是很驚人，我們都盡量乖乖配合他家中的規矩，但難免有時嫌煩想偷雞，俾佢見到就會係咁教育你，真的要步步為營! 他亦是愛妻號，開口埋口提住過左身的老婆，關於佢地兩年兩人用四千歐環遊世界，關於佢老婆的職業和威水史等等。。雖然佢有點長氣，其實內容都非常精彩，至少我地都未聽過！ 俾個背影大家睇下先 H先生除了牛馬雞鴨鵝之餘，還養了幾隻真正的寵物: 兩狗兩貓。狗狗Pero and Cooler 非常熱情忠心同乖乖，晚上會訓在你床邊的地下守護你，朝早亦會叫你起身，就算我有點怕狗都好中意佢地，不過最頂唔順就係小狗Cooler 成日都〝擔〞住貓貓捉到的老鼠屍周圍走，帶埋老鼠去行山，或者收埋入屋。。 至於兩隻貓，連一向愛貓的刁兄都唔中意佢地，事關佢地太煩了，我們一開飯就上餐桌lam黎lam去，趕都唔走，有次H先生叫刁兄幫手捉住隻貓打針，重俾隻貓抓到流血 ：( 所以亦無幫佢地影過相。 今次在農舍識左一對couple,比我們遲一星期到達， Carlos 來自墨西哥，Ana來自西班牙，他們住在西班牙Granada 。Ana 是個很敢言的女仔，初到步覺得間屋好污糟就直接同 H先生反映，重落手落腳洗野執野。例如餐桌對上的天花掛了一卷痴烏蠅的貼紙，我們第一次見到時都嚇一嚇，因為真係好多死左或重腳撐撐的烏蠅黏住，我們嚇完就當見唔到；但Ana 就會係咁叫屋主換過張，屋主回應說烏蠅紙還未滿座丫，Ana 繼續堅持，最後真係換了張新的。當然，轉眼又幾乎滿座了。 同佢地一齊捱，間唔中吐下苦水，一齊煮飯互相交流，為我地今次 helpx 生色不少！ 最後再介紹一下動物農莊的大哥大：鵝。估唔到班鵝比狗、比公雞重惡，聽講話有時啲狐狸偷入農場想食鴨，班鵝發生後會一齊出動趕走狐狸！就算有人類走近，佢地都會氣定神閒扮無野咁望第二邊，一啲都唔會示弱！今次之後我們對鵝好感大增！ 呢篇blog 一開始諗住叫oncall 36 小時，因為農場隨時有突發事要幫手，例如有一次晚上八點幾煮好曬飯突然要我們冒雨去放牛，大家都一肚氣，返到去餐飯都凍曬。不過完成呢篇blog 的時候我們已離開農場，之前的一切不滿都忘記了，只記得難忘的片段和短短十幾天跟各人各動物建立的感情！oncall 36小時對久經訓練的我們算得啲乜！！
