衣著 無論男女下身都著Longyi，常常在街從後見到男人在整理longyi，就是把它原本繫在腰頭的結打開，再重新打結，初時以為Longyi是一塊布，驚訝怎麼緬甸男人可以如此坦蕩蕩俾人睇晒:o 及後先知原來Longyi是一條長裙咁，要過頭笠既 男人的Longyi是沉色的，黑、暗綠、暗黃，純色或帶隱晦的間紋 女的Longyi可多花款咯，各樣顏色各種花款都有，也有絹質閃令令的，在Bagan遊客區裏賣的Longyi除了貴，款式還很暗淡，去返本地人的市集就有很多款可選擇 佢地絕對會襯過先出街，例如下身是桃紅色，上衣就粉紅色，下身深紫色，上身就是淺紫色，很是好看。這裏色彩繽紛，阿婆阿嬸都會大紅大紫。不像香港，老的著阿婆碎花，後生的返工要著黑色 其實著Longyi好唔方便，規限了你要碎步慢走（所以印象裏緬甸女人都像昂山素姬那般優雅），成日擔心佢會鬆身成條跌落地，下大雨時更是麻煩，可人民仍然對Longyi不離不棄，在緬印度人華人都穿Longyi 無論什麼學校，學生都是劃一穿白色裇衫，綠色褲、裙或Longyi（視乎年紀），學生可自由選擇穿什麼款式的白裇衫，有些多d detail位有蝴蝶結、暗花，裝飾都一定要是那種綠色的，你去市集就能看到很多款式 也有見過某些公司的員工制服是白裇衫綠Longyi，同樣可自由選不同款的白衫 至於Longyi內藏什麼？常常在別人整理Longyi時偷偷地打量都睇唔到，有次見個漁民在湖中整理Longyi，畀我見到光脫脫的兩舊肉:o，有緬甸人說男人會著底褲，但老一輩會什麼都不穿，女人則可能著多條小短褲咁 鞋，緬甸人只穿拖鞋！有晚行完一日去左間高級餐廳食飯，個晚落住大雨，職員擔住遮從我落的士就護送我入餐廳，餐廳樓底高，每枱都有小蠟燭，播住輕快英文國， 很有情調，一踏入去那高級地氈個下，心諗，死喇，我著住人字拖咋喎，立刻望一望那些長裇衫長褲彬彬有禮的waiter，車！佢都係著人字鞋咋嘛！ 是的，無論你什麼身份，上身穿得幾雍容華貴，下面都係配人字拖，最多拖上加多幾粒閃石裝飾囉。穿貼身one-piece準備落老蘭的辣妹都係著露趾涼鞋的。皮鞋密頭波鞋都有見過，但真係，好，少，囉。 著左十日拖鞋，唔得，要著返次波鞋先，點知仰光可以在幾分鐘間由天晴變成傾盤大雨，死死地氣回房換返拖鞋，呀點解無水鞋？不過水鞋襯Longyi又好怪雞既... Thanaka不多說了，仰光人用thanaka比率比其它地方少，她們寧願搽粉 食物 今次好少mou街邊，以下的都以偏概全 入到去緬甸local小店，舉起一隻手指跟他要一份，店員以簡單英語問你要pork定fish，就會端上湯、白飯、六七小碟配菜，間間啲配菜都唔同，有女人手指秋葵、水草、荷葉、全生的生菜、俾賓尼兔食既生甘筍、熟既椰菜花、好有口感的豆腐（像玉子豆腐）、蜜瓜、牛肉乾、青檸、豆、芽菜、幾款不知名的醃菜醬料，放得桌上滿滿一枱 因為無菜單，老闆又唔識英文，有時食完都唔知係咩sosad 早知仰光有得買個張A4咁大既緬文對中英文蔬果list我就買張隨身帶，食唔出係咩即刻叫佢指 在仰光第一晚食左Lonely planet好推介的Monsoon餐廳，就是我上文說好高級那間。及後兩日我都有幫襯，因佢有英語餐牌，好清晰地分左緬式、泰式、LAOS、越式 係度食左個緬式雞湯麵幾好味，侍應說是緬式早餐，配蝦片、青檸、咸的醬料、辣粉、蒸蛋、洋葱 晚餐嗌了兩個前菜，一個係緬式前菜tofu thoke: yellow tofu with tamarind sauce，一個係Laos前菜sweet potato rolls with ginger。明明係前菜，嘩！乜咁多豆腐，春卷都有五條，平時係香港食西餐，前菜通常得好少，，好un 試過在小店和長途巴休息站裏把一碟喜歡的小菜/菜湯吃完，店員主動替你refill，不會計較 其中一樣地道野食是咖喱，但有別於印度個種，味道好random，間間唔同，咖喱可選魚、雞、豬，但感覺緬甸的肉類都不好吃的，好老好un咁，所以我多吃素食 鮮榨果汁選擇有：菠蘿、芒果、青檸、西瓜、木瓜、香蕉，好熱帶呀何。有次見到餐牌有Lemon Juice，嘩好掛住茶餐廳的凍檸茶呀，上到黎先知是青檸汁，原來這裏是沒有黃色檸檬的，只有青檸 飯前多有花生免費提供，這裏的花生好細粒。飯後有些店鋪會提供亞參片，好像山渣片咁，好好味呢！唔知香港邊度有得買 見佢地帶飯係劃一用金屬圓筒形的器皿，小學生或者，一家人到大金寺參拜時在寺廟午飯用 在仰光早上9點已見阿叔拎住一大杯啤酒，也有專門喝茶的地方，有很甜的奶茶和任飲中國熱茶，諗返轉頭，係喎全部喝茶談天的都是男人 寺廟外有不少大壼或水機裝水，但它們沒有提供紙杯，反而係放個金屬杯畀人循環再飲@@點解要咁做？應該推廣自備膠樽嘛... 人民 緬甸人給我的第一感覺是靜，源自往緬甸那班客機，成程機係好靜好靜，未塔過一班咁靜既航機，好舒服，及後塔overnight bus都係，啲人唔講野，靜靜地安坐原位，或睇電視或玩電話，甚至6pm上車已經開始睡覺，我和旅伴明明用正常聲線講野已經係車上最嘈咁，係酒店的dining room職員講野都係細細聲。啲人好靜，但overnight bus上的電視就勁嘈，可能是想令司機不要恰著吧 的士、商店不算開天殺價，在仰光乘的士通常不用講價。係鋪頭你擺明搗亂唔會消費，佢會樂意借道具畀你影相扮買野。係好多位你以為偷影佢相唔好意思，點知俾佢發現左後對你笑仲要yeah埋擺pose畀你影。有次諗左好耐想買件tee，傾好價錢揀好顏色先發現無合適size，唯有影張相留念算了，影完正面，老闆特登用Y叉從高處拎件衫落黎畀我影埋背面。sell野不算窮追猛打，在寺內拒絕了導遊服務他會笑著對你說no problem enjoy your day。在這裏笑容從來不缺 其實香港人真係好現實，肯畀錢你先係老細（中國人則是你畀左錢都黑你面） 看見我這外來客，他們會好奇望一望，然後低頭繼續喝他的茶，這令我感到自在，可以靜靜享受，好喜歡這種寧靜，這種悠然自得 走在街上唔覺得男男女女標緻靚仔，但啲僧人普遍就幾靚仔喎，眉清目秀，點解會有呢個靚仔和尚現像？我諗係因為髮型、衣著好影響。。無晒呢啲“世俗“野後靚仔晒 在街上吃蛋餅時遇到的那生意人說男女一生人都應該出一次家，not a must but they should，時間不一定，可能短至一周也可，至少要有三天 平時我地接野會用雙手，緬甸人很特別，會用單手，再用另一隻手托住手踭，左右皆可，咁先係禮貌，接野畀野人要咁。及後回到香港我一時反應不過來，都用了這手勢接野 見過小朋友指著佛像時食指向內屈，不可手指指嘛，不知是只適用於佛像定適用於全部 至於腳嘛，記得小學聽聖經故事，話耶穌幫人洗腳，老師解釋話可能你覺得手仲污糟啦，但以前黎講腳係好污糟，是呀！成日都要赤腳行，腳板真係勁污糟。有次係佛像前盤膝而坐，走時雙腳一伸諗住鬆鬆再企係身，即刻俾工作人員指示腿不可對著大佛 被當地人第一句問korean?的比率較高，唔通韓風都吹到黎？見學生的筆記簿封面是韓星，gangnam style Psy頭像也出現在衣服、襪子上 包車司機說他懂三句中文（普通話）：一）你好。二）謝謝。三竟然是。。。萬歲萬歲萬萬歲！！原來佢地有包拯睇！仲有西遊記。初初我聽唔明佢想講西遊記，佢形容為one monk with one monkey, one horse, one pig, and one person，咁我就明了haha 在仰光機場洗手間遇到最敬業樂業的大姐，本來清潔姐姐挨在廁所外休息，我一行入廁所佢立刻跟住入黎，佢為我打開一格示意我入去，去完出黎佢幫我襟水、幫我襟皂液，洗完手幫我抆紙擦手，心諗係咪想收tips? 隨住再有人入黎佢又忙碌地為人介紹廁格..沒有問任何人拎貼士 收集左幾張手寫單據，緬甸人寫英文都係圓圓碌碌，整整齊齊，可能因為寫緬文好似畫公仔咁，都唔撩得 周街都係趙完槟榔的血紅積~ 緬甸人簡單、純樸，睇相片描述就知~ 交通 第一日塔的士，咦，佢地揸右肽喎，當然啦，同香港一樣畀英國統治過嘛。坐坐下，咦唔係喎！點解呢架係左肽架？！左右肽都有，第一次見，勁！ 呢度好多JEEP仔 仰光不准摩托車行駛，只有私家車和部份小量人力車，其它地方則有馬車、tuktuk，長途巴、巴士都是中日韓舊車 長途車價格低得有點過份，從Inle lake到仰光12小時冷氣巴連一支水一條即棄毛巾、牙膏、牙刷，要行沒有街燈的山路又越過高山又越過谷，都只是15美金，但我在Bagan包一日馬車，車伕只是送你到景點門口自己在外休息，就要25美金 在仰光塔三小時circular train只是3美金 對，這裏的overnight bus有牙膏牙刷面巾送，如果塔貴少少的車有埋面包、糖果。長途車都有中轉站，不過語言不通，問唔到今次停係放tea定放飯 景點 呀。。。其實我係幾失望的，Bagan唔係我想像中咁靚，無論是日出、中午定日落，覺得被明信片和攝影大師的相呃晒，萬塔不是被叢林包圍，望落去都幾禿。比較喜歡的景點有烏本橋和monywa卧彿像日落。其它景點不是特別驚喜，天色倒是處處美麗。 其它 試過係普通餐廳、高級餐廳停電，甚至機場都試過，平時去到咪會抬頭睇Mon睇邊間航空公司排隊，一入到機場，全部Mon熄晒。等登機時再停，伸手不見五指，所以。。我是不會在此吃沙律或雪糕，幾華麗的餐廳都不會@@ 好多人用華偉Huawei手機，也有人用tablet玩農場呀candycrush 問過大學那老師，佢地係用Viber和Skype通訊 緬甸歌幾好听喎，有些是改編自國語歌的，聽過有《夜來香》、劉若英的《後來》 緬甸唔用阿拉伯數字，睇唔明local鋪頭pricelist幾錢 沒能耐完整地看完一節緬甸電視節目，感覺是吵吵鬧鬧，明明可以用實景都用假CG代替 廣告方面，想賣一支電筒？唔洗諗到天花龍鳳，請兩個明星，一齊拎住電筒照，露一個招牌笑容，yeah，搞掂，好簡單 我有睇過電影《昂山素姬》架..不過忘記了大部份，少少歷史：1885年緬甸淪為英國殖民地，Yangon改為Rangoon，Myanmar改為Burma，緬甸成為印度的一個州，大量印度人移居緬甸，他們從事商業或政府基層人員，緬甸人沒有能力與之競爭，1935年昂山將軍(即昂山素姬父親)投身政治運動，他於1947年被對黨暗殺，終年35，1948年緬甸獨立，1962年軍政府實施獨裁統治和關閉鎖國政策，1988年人民發起反軍政府的遊行示威，但遭到軍隊和警察的血腥鎮壓，一直在英國居住的昂山素姬回國探望病危的母親，因此看到處於軍政暴權下祖國的苦況，於是留下來投身民主化運動，並於1990大選取得選利，但軍政府宣佈選舉無效，她於1989年始斷斷續續被軟禁至今。1997年昂山素姬丈夫癌症末期，軍政府拒絕讓他入境，昂山明白若她離開緬甸將不能再重回祖國，結果昂山沒有離開，他們沒有見面，丈夫在1999年在牛津病逝，1989至1999年這十年間她只和丈夫見過五次。這是什麼心情，什麼犧牲 以為昂山素姬在緬甸是絕對禁忌，出乎我意料外見到有很多她與她爸爸的製品，有人民在家掛他倆的畫像在牆上，一左一右，像姓金兩父子，磁石貼、衣服，連給小學生做習作的筆記簿封面也有。當然，不敢在街隨便討論政治。 一向好喜歡東南亞晚上的餐廳，每間都掛著不同的燈飾，無論是幾出名lonely planet幾推介的餐廳，一行入去就有位，位子寛敞、寧靜，每人盛惠五十，係香港，工作了九小時放工仲要排一小時pokka cafe一小時simply life，然後同兩個陌生人坐同一張枱聽她說工作的煩惱家庭的壓力，落樓仲要畀兩舊水 總結是..去完柬埔寨，覺得其它的都不外如是！哈哈哈，無論景點、人、方便程度、紀念品、消費都是 費用 26/5/2014-7/6/2014 12日12夜 機票：南方航空 廣州<->仰光 Hkd$2154 和階號：廣州<->深圳 來回約Hkd$200 VISA：Hkd$150 保險：Hkd$146 住宿：Hkd$1360 (八晚住宿、三晚夜巴、一晚機場) 洗費：Hkd$2520 (包食、交通、入場費、買野) Total：Hkd$6530 Rate: US1=920-961kyats 更多旅遊故事: 帶著問號去旅行
