最近多野做攪到冇咩時間睇新劇，要知道睇一套新劇係需要大量時間的，因為如果好睇的話可能會停唔到連續煲十幾個鐘...攪到我累積左好幾套日劇唔敢開嚟睇，驚一睇就欲罷不能，嚟緊又有幾套我期待必睇韓劇，依家就等我分享下我電視劇口袋名單啦！^^ 韓劇部門： 1)《前女友俱樂部》 即將於5月首播,tvN劇就係信心保證啦!!而且由宋智孝同《未生》嘅卞耀漢主演，兩個我都欣賞,必睇! 2)《心情好又温暖》(前名:《濟州島蓋茨比》) 著名編劇洪氏姐妹的MBC電視台新劇,洪氏姐妹嘅作品有《Big》《最佳愛情》《主君的太陽》等等受歡迎嘅劇 本身男主角係金宇彬可惜佢推左,依家確定由《未生》嘅安英怡(即係姜素拉)同《请回答1994》嘅七封柳演錫主演~ 日劇部門： 1）問題餐廳 我上個月睇《date》睇得我好高興，跟住上網見到有人話《問題餐廳》同《date》一樣咁精彩，既然係咁我就決定唔可以錯過呢套！ 2）年輕人們2014 我好怕過份熱血嘅日劇，但呢套口碑十分唔錯，又有可愛嘅兜風耳瑛太，演員陣容華麗（網民講的，我只係認得瑛太同妻夫木聰...）成功列入我口袋名單^_^ 3）Border 小栗旬真係多產演員，剛播完一套下一套又有佢份。不過呢套比較舊，係上年年頭嘅作品，但比網民力讚小栗旬響呢套嘅演技係佢咁多套劇裡面最出色，講到咁我仲有理由唔睇？ 4）無間雙龍 又係為左小栗旬而睇，有人話小栗旬會接嘅都係好劇，我幾認同的，佢有份演嘅劇幾乎冇咩地雷。有D演員唔知係幸運定係有眼光，接嘅劇普遍都幾高水準，我只要演出名單睇到有佢個名就係信心保證，小栗係其中之一；有另一D演員唔知係磁場唔啱定係冇要求，接親都係爛劇，我攪唔清係佢嘅演技令套劇爛定係劇本真心爛，總之我依家只要睇到佢個名就唔需要睇果套劇，佢個名我就唔公開喇，話到口中留幾句嘛！ 5）殘念丈夫 玉木宏嘅新劇，我偏好輕鬆愛情喜劇，呢套相信係我杯茶=) 雖然我經常看韓劇，但日劇比起韓國確實更多一層深度。 韓劇普遍係冇咩訊息想表達的、係夢幻的、 係專門比女士們ff的，男主角一定係高富帥而且腦中除左愛情就冇其他野，好似整個人生都係為愛而生，拍到拖就可以完結人生， 女主角又靚到好唔真實，著嘅衫褲拎嘅手袋都係一般人幾個月人工先買得到，植入式廣告過多(例如全套劇嘅人不論窮人定有錢人都用同一型號嘅手機)，劇情往往太過浮誇(現實邊有咁多絕症咁多霸氣總裁吖@@) 呢個係韓劇同日劇嘅最大分別：日劇個劇本大方向可以天馬行空（例如交換靈魂)但細節劇情要合理，而韓劇可以整套都唔合邏輯的，簡單d講就係咩都佢講哂（例子有最近套《海德》將催眠寫到萬能orz...)； 相反地日劇係好貼近現實的，男女主角唔會著名牌衫褲唔會係超現實嘅靚女靚仔，頂籠似係"比較靚嘅平凡人"，亦唔會有明顯的植入式廣告，日劇嘅劇本感覺到係完整的，對白好多都寫得好有心思，而且大部分嘅日劇都會有明確想表達嘅訊息，會令觀眾檢視自身，思考人生。 不過我認為冇話日劇同韓劇邊種好睇嘅，因為兩者係有唔同function的。韓劇係比人放鬆心情，短暫逃離現實的，唔係次次睇劇都要追求深度的，有時我就係想睇d唔需要用腦嘅劇輕鬆下； 日劇題材大多係人類真實要面對嘅事例如家庭、友情、工作，係需要消化需要反思的，佢有時某d對白會直插你內心深處，因此睇日劇特別容易有感觸。 日劇可以令你檢討自己，慰藉心靈；韓劇可以令你放下煩惱，盡情欣賞男主角嘅帥氣同長腿（放錯重點-.-），所以睇日劇同睇韓劇有唔同目的，更何況日劇都會有爛片，韓劇亦偶有非常出色嘅作品（例如未生、壞傢伙們），大家唔需要爭論日劇係咪高層次過韓劇，亦唔需要互相詆毀對方，睇過嘅人就自然明，我兩邊都唔可以缺少，兩邊都會繼續睇。
