小心!呢篇會係極度主觀嘅文章~玻璃心者慎入。以下所講嘅韓劇Oppa全部都曾經令我心跳加速!!但如果你心中嘅男神唔響我名單裡面係唔出奇的,因為我口味有小小非主流,近期好hit嘅李民鎬同都敏俊金秀賢或者係張根碩呀李鍾碩等等都不在我榜內～而且我今次只講有演過韓劇嘅喔爸,冇包括KPOP男明星(可能遲下打另一篇文專講KPOP喔爸~) 開始！ 1)劉亞仁 代表作:《密會》 劉亞仁係香港人比較少提及嘅滄海遺珠Oppa,因為technically 嚟講佢唔算靚仔，但佢明明長相可愛又好演技呀!難道只有我覺得佢好吸引嗎？劉亞仁最多人睇過嘅作品應該係宋鍾基做男一嘅《成均館緋聞》，當時佢仲係做緊男二，但我冇睇過。後來我認識劉亞仁係因為無意間睇左幾集《時尚王》，大爛片！我睇左兩三集就棄劇，不過當時覺得呢個男仔生得幾可愛吖唔似一般韓國男明星嘅典型外表，好有個人特色嘅長相，但都未沉船。直到上年睇左《密會》，係我嗰陣嘅美藉roommate 介紹我睇，佢評語為very beautiful drama ，我當時心諗一套劇點會用beautiful 嚟形容㗎，但我錯了，的確很美。OMG!我終於沉船了！密會係套藝術成份好高嘅電視劇，非常有意境。戲內嘅劉亞仁好好好sexy!!!佢戲中每次彈鋼琴或者每次緊張我都沉船，嗰種性感係來魅力而唔係肉體，嘩我唔識形容，總之我愛上那個鋼琴天才！佢演得超級好！劉亞仁唔係花瓶，佢係生得比較好睇嘅實力派演員，真心希望佢可以更紅，因為佢值得。想認識佢多啲可以睇下佢做嘉賓嗰期running man喔;) 佢個性活潑開朗！ 2)孔侑 代表作:《BIG》 《Big》係一套我個人極度喜歡而冇咩人討論嘅韓劇，><點解？？？好中意個劇本啊好有意思！本人最愛韓劇三甲。我亦都睇呢套而認識孔侑，又係非典型靚仔，我偏愛有特色嘅外表^^"不過我懷疑自己係愛上劇中男主角嘅性格多過愛上孔侑本人，但我確實因此對佢好有好感，孔侑大叔之後有劇我都會支持下！ 3)金宇彬 代表作:《繼承者們》 2014年嘅大勢演員絕對係金宇彬！紅到接劇接廣告都接到手軟！金宇彬令我沉船嘅當然係《繼承者們》嘅崔英道啦 ！霸氣外露！長腿更加令我愛上佢～而且佢多次被唔同嘅演員前輩讚佢有禮貌有前途啊呵呵呵 暖男啊要繼續紅下去！ 話說金宇彬上年嚟香港嗰陣我有特登去睇佢的(好毒啊><) 當時個商場係勁多人,但你響人群中係一眼就可以見到金宇彬響邊,佢簡直係個發光體!!!!又高人一等又白又靚仔!我當刻好震撼,完全難以相信世界上有咁好睇嘅人~~~相信我!如果見過佢本人一定被圈成飯的!!!! 4)林時完 代表作:《未生》 第一次接觸林時完係2012年睇《擁抱太陽的月亮》，男主角係金秀賢，我完全冇愛上佢，因為金秀賢飾演一個咩都喊嘅大喊包皇上-.-連我咁中意喊嘅人都睇唔明佢喊咩... 而且劇情唔多掂，但當時我愛嘅係林時完演嘅少年許炎啊！佢 一出場真係驚為天人！太有氣質喇！ 佢演嘅許炎簡直有仙氣飄出嚟㗎！完全不食人間煙火嘅感覺！我完全迷上許炎，但後尾套劇講所有人都長大，換左另一位大叔演大人版許炎，嘩我真心火都嚟！ ... ... ... ！！！！！ 仙氣呢？？究竟發生左咩事？還我少年許炎!!!>< 仲有可愛善良嘅陽明君！少年陽明君係咁： 大人版陽明...真係你嗎先生...？我接受唔到！ 仲有演待衛嘅雲，少年時代尚算一名小鮮肉 大人版嘅雲，我真係暈@@ 係咪我miss左啲咩野？點解發生左巨變？ 並非想針對任何人，但我當下真係接受唔到許炎由神仙變為凡人...其實呢套劇選角真係太有問題，大人版除左金秀賢之外其他都完全唔係嗰回事！唔單止唔似樣，連氣質都完全唔同囉！我針對嘅係少年同大人嘅差異，唔係想批評大人版演員，因為我睇到真係打擊好大...oops我完全偏離主題了... Anyway,後來林時完有繼續拍戲但我都冇睇到，上年年尾見到有套叫《未生》韓劇響韓國好火紅，咁我又跟風開始睇啦，又中毒了！《未生》係必睇！但今次沉船有啲唔同，我愛嘅係套劇！之後先愛上每一個角色，當然包括男主角張格萊（林時完飾演）啦！ 5)車勝元 代表作:《最佳愛情》 我第一次睇車大叔演嘅戲係《最佳愛情》，我到依家都念念不忘獨孤真呀！太有特色嘅一個角色，愛佢嘅高傲愛佢嘅善良！我勁中意呢套劇，套劇當年響韓國都掀起一股熱潮㗎，可惜香港人冇咩點睇呢套！我知佢套《市政廳》比較紅但我冇睇過... 模特兒出身嘅車大叔好鬼有型，最近三時三餐更加令韓國人了解佢嘅高超廚藝同可愛嘅性格，廣告接唔停，演藝生涯又推上一個高峰！ 5)孫浩俊 代表作:《請回答1994》 《1994》又係一套神奇嘅劇，呢套選角冇著重外表而希望搵啲更生活化感覺嘅演員，睇完我完全冇迷上任何一個男演員啊！最深印象係孫浩俊但又未可以稱得上沉船。直至睇到佢上running man,原來佢真實性格同劇裡面係完全相反㗎！！忽然覺得佢演技好好哈哈哈 佢真人係怕生內斂含蓄嘅男仔，好可愛啊我中意唔多野講嘅人！^^而且佢講方言好可愛！我對地方出身嘅韓國男子特別鍾情啊因為感覺上佢地比較單純^_^我睇三時三餐都係想睇佢！好欣賞佢默默做好本份，唔邀功唔造作嘅個性，但始終安靜嘅性格響演技圈比較輸蝕啊！希望佢有更好嘅發展 6) 李秀赫 代表作:《高校處世王》 Need I say more???靚仔到呢個境界都唔愛我仲係女人嗎請問？？ 我響佢當年仲做緊模特兒嗰陣已經愛佢喇！獨特嘅外形+無敵大長腿，而且佢同權志龍係好朋友啊^_^睇住佢愈來愈紅就老懷安慰（？） 7)姜河那 代表作:《未生》 都係《未生》種下嘅情誼，呢套真係神劇，睇完會愛上所有角色。《未生》冇一般韓劇咁男一男二分得咁清楚，基本上男一係張格萊同吳科長，唔太覺得有男二，其他人全部都係戲份直迫男二嘅配角，但又未可以話佢地係男二。呢套劇連女主角都冇，雖然有人話姜素拉算係女主角但我覺得唔應該單純用性別去分，而應該要睇戲份，姜素拉同樣算係戲份超多嘅大配角吧。好吧我離題了... 講返姜河那，第一次睇佢嘅戲係《繼承者們》嘅學長，當時我眼裡只有崔英道，對學長冇咩留意，係《未生》令我睇到佢另一面，雖然佢唔係《未生》演得最好嘅一個，但佢演嘅張白旗有感動到我，我睇得出佢係有靈魂嘅演員。FYI,唔講唔知,佢同朴信惠係大學同學啊，而且佢唱歌都幾好聽㗎:-) 8)玄彬 代表作:《秘密花園》 睇完《秘密花園》後我沉船沉到深海最深處！喜歡你讓我下沉～～～我心目中永遠嘅男神！外表冇得彈了吧！太耀眼！望住佢就可以滋潤眼球！天生美男子，我信佢冇整容！由當年金三順嘅小鮮肉變成man到爆嘅男神～佢經常演高富帥總裁，但其實佢本人就係現實生活嘅高富帥最佳人辦啦！著咩衫都大氣，我愛佢演嘅角色，更愛佢真實嘅個性。好多人中意攻擊中意韓國明星嘅人話'你識佢咩？你點知佢真人係點呀？人地響鏡頭前緊係做好人㗎啦！'當然，作為觀眾係冇可能知道佢真性情係咪真係咁，但透過好多訪問、影片、報導，都可以從小事了解到佢真實性格大概係點。 當年佢要服兵役嘅時候選擇自願當出哂名訓練嚴格嘅海軍陸戰隊，一般韓國男星只會當普通陸軍或者演藝兵，甚至好多藝人會逃兵，服海軍陸戰隊嘅藝人一隻手數得哂，玄彬係當中嘅佼佼者，，佢訪問有講過佢爸爸係軍人，希望透過當兵令自己成為更出色嘅人，玄彬當年呢個咁勇敢嘅行為令全韓國都欣賞佢。兩年嘅地獄式兵役相信一定好辛苦，佢的確成為一個更有魅力更man嘅真男人！依家太瘦喇好心痛>.<塊面要長多啲肉啊如果唔係啲人又話整左容㗎喇... 數完喇！原來我都唔算好花心吖，因為我寫唔出十個...hahaha 令你沉船嘅喔爸係邊個呢？
