豬豬, 今日9月18號, 我地分手第16日,好明顯我又再次高估左我自己, 以為前幾日訓得返嚟就無咩事啦, 未愛完但都起碼痛完. 可惜問完你我地仲有無機會, 你答唔想, 只可做朋友時雖然心痛, 但我都以為頂得住啦, 原來都係唔得架, 又三日訓唔好, 尋晚AXL同佢女友帶左啲FRIEND嚟玩BOARD GAME 飲酒到四點幾, 之後發夢見到同你係返埋一齊, 我地係個公園到, 同埋你媽咪, 你同我講你媽攞啲錢去投資啲高風險產品, 叫我勸下佢, 我地就係個涼亭到講呢樣野...結果醒返, 原來只係發夢, 真心HURT, 9點未夠就訓唔返...全日都好掛住你. 但係我唔WHATSAPP你啦, 我都怕, 我怕我真係只係因痛而愛, 我怕好似某朋友安慰我咁講, 你唔係真係好愛佢, 唔係唔會廿日分兩次手, 真愛唔係咁既. 你只係個人太好勝,加上未輸過 ,係佢面前衰左你就要係佢面前威返, 你知分左手無機會, 所以你先會咁着緊, 其實都係幻覺, 你好快無事. 係咪咁呢? 我早上覺得唔係, 我係真心好愛你,好愛好愛, 而到夜晚呢, 間唔中我又會覺得係...我地真係唔夾, 即使一齊返自己都會好辛苦, 只係拉長嚟辛苦...如果係開心既我唔會咁短時間同你提兩次分手, 只不會係依家短痛太痛又屎忽痕求你轉返個長痛PLAN!!! 原來我連自己點諗都未搞清楚, 竟然係夜晚個個經過一日“深思熟慮”既我係真心, 定係朝早心UP到醒個個既先係真心? 咁仲學咩人講真係好愛, 講咩一生一世, 山盟海誓? 我氹到你返嚟先發覺又頂唔住咁點啊? 再嚟一次應承左你性無能加甩頭髮? 唔好啦...夠啦. 我係到開個BLOG, 記底自己每日點諗既心路歷程, 一邊可以自己睇返點諗, 另一邊係有日我好肯定愛你個陣, 就比你睇返我既改變, 心既改變. 而如果過多一頭半月我真係可以無事, 亦可以成為我一個深具教育意義既回憶. 依家既我不時會回憶起你同我講既野, 你話你唔鐘意間屋亂, 好啦, 我就由執好自己房, 而且保持佢整潔開始, 每日做啲改變, 希望天可憐見, 你會回來我身邊.