搭完亡命小巴，心慌慌，食D定定驚先， 一支公？食咩好？ 諗都唔晒諗，例牌食譚仔。 找到一個靠墻的二人座位，一坐下，餐牌都無需望，就揮手落單：唔該雞肉炸醬三小辣，凍檸茶！呢個配搭不知不覺已食左7，8年。 作為一個急性的人，食野一般都比較快，唯獨食譚仔是例外，非常斯文又有節奏：一湯匙撈起點湯，夾起適量米線，一塊雞肉，加點芽菜, 韮菜或腐皮 ，最後再夾起適量的炸醬，然後一口食下， 米線煙韌， 芽菜韮菜爽口， 湯底麻辣， 雞肉味溫和，再加上炸醬的香口， 不論味道，還是口感都非常豐富和有層次，大滿足！ 一支公食譚仔唯一不足就是觀感，感覺有時太差，由踏入門口果一刻已開始，當個收銀問幾位，發現我得一個人時，感覺總會眼定定望住你，仿佛打左個突：一個男人食譚仔？！ 好似今次，我找了個靠墻的二人座位，一坐下就後悔了，望一望左面張四人座位，正有一男兩女在一路食一路談話說笑，唉！ 孤然一身並不可怕，最慘的是有比較，孑然一身和成雙成對的對比太大！故當一個人時，連「 二小辣 」都刻意避免，費時辣到要用tempo紙巾抹鼻水，唔知以為我係到流馬尿，好慘咁樣......所以一支公食譚仔真係要D勇氣！ 故一有機會，就會和Lady一起食譚仔 ，又唔知點解，兩人食譚仔又真係特別有意思，先唔講可以交換D餸來食，或多或少都叫碟土匪雞翼，食一碟土匪雞翼又十分煩腦，簡直係左右腦一齊都用上： 細碟是HK$20三隻，每隻HK$6.666......除不盡！ 大碟是HK$30五隻，每隻HK$6！ 理性的左腦說：大碟啦！抵D！真係好L賤嘅做生意方程式！ 感性的右腦說：細碟3隻，大碟5隻；都係單數......當然Lady First！女士食多隻！男士風度立即加分！U Know? 女士窮其一生都在計算計較中，哪怕是已婚的夫婦，計算的不是食多一隻雞翼，而是在計較你是否愛她多點，其實女士邊可能食得咁多？最後還不是男士食了最後哪一隻雞翼？不過前戲還是要做足，滿足她情感上的需求，即所謂Lady First！在這一點情理上，我想中西都是一樣的。 或是另一方案：最後一隻雞翼兩人一齊食啦！ 反正大家都分享過口水，就不要分得那麼仔細了；這個方案有時還是二人世界的獨立座位比較好，如果是搭枱，就真係好眼冤！ 至於和同性朋友食時，就會盡量避免叫呢D除不盡的小食，費事又煩呢D計數的問題，和女士計數可以是種情趣，同一男人計數？Come on...算了吧...實在嘔吐！ 食食下，突然想起藍橘子篇「食譚仔悟出一蚊致富的真諦」，有對男女以辣油撈米線，以代替要加一元的麻辣湯底......都刻意望一望罇辣油，點知搵唔到，再睇返隔離左右，又係唔見，好巧，唔通係三哥同雲南嘅分別？Anyway，罇辣油又邊可以代替個又麻又辣的湯底？層次都唔同，就如「扑野」不等同做愛一樣。 食完，望一望個電話，差不多是時候接Lady和兩位小朋友回家了，飲完杯凍檸茶就埋單，仲用現金俾$，真係唔方便，幾時可以用八達通......
