劉鳴煒自發表儲$3000離地上車膠卵後，被一眾廢青進行網上欺凌式地圍插，我食花生亦不忘抽下水，對他多少說點持平少少的公道話：哦，人家只不過係好心叫人儲下錢姐。 （圖片來源：無線電視《講清講楚》片段截圖） 最近在一同學結婚晚宴上，我看一眾同學講起旅行，雞啄唔斷，於是霸氣咁打斷她們的對話：你哋知唔知去少次旅行，月儲$3000就可以上車！她們突然一句就秒殺左我：咁你上左車未！ 果一刻我係幾咁懊悔自己背離大眾路線，走去理解一個富二代！簡直係Bull Shit! 前日劉鳴煒出席無綫節目《講清講楚》，被主持人問：地產商點解啲樓唔可以賣平啲，唔賺得咁盡？ 劉鳴煒回應說：「呢嗰睇法我覺得哲學上係唔容易去、唔容易去同自由市場社會融合。」 我嗰腦空白了兩三秒，當堂O哂嘴：「劉鳴煒3000，你講乜野呀？咩叫做哲學上係唔容易去同自由市場社會融合？」 真係出爐鐵，唔打唔得！ 點解咁多Model Answer你唔講？係要離地，仲要離題！ 你可以學超人咁講：君子愛財，取之有道！ 你可以學四叔咁講：因為建築成本高，地盤工人人工高！ 你仲可以咁講： 一，香港係行自由市場果套，樓價係根據供求關係決定的，買賣雙方都沒有強迫對方，買賣是自由交換的，不存在賺到盡的問題；大家係唔係想行共產黨計劃經濟果套？ 二，你可以坦承：係！地產商係賺得咁盡；之但是，咁講對地產商並不公平，在商言商，做生意嘅野，邊有保證實賺？地產商都要承擔虧本的風險。 三，我覺得，大家市民可以正面少少咁睇呢個問題，地產商都係上市公司，公司要為股東謀取最大的利潤，相信大家都唔會反對，正如加人工，大家都想加多D，加盡D啦？而且大家可以考慮買入地產商啲股票，它賺到盡，你都有得著。 ......
