天氣開始漸涼，最啱就係一大班人打邊爐，火鍋放題店牛大人永遠都有長長嘅人龍，牛肉配料質素非常高，亦好抵食。主豆有3個餐揀，分別係吾同質素嘅牛肉同食物嘅種類。我哋叫咗最豐富嘅套餐 -120分鐘澳洲極上和牛吃到飽，呢個套餐先食到澳洲和牛M5牛肩卷、安格斯牛小排、手切封門柳、安格斯一口牛肉粒，今次仲有期間限定嘅SRF美國黑牛後腿肉同埋北海道十勝豚，每人仲會送兩粒M9和牛牛丸。湯底方面，共有10款，有辣有唔辣，亦有養生系列，加$50可轉鴛鴦鍋。今次揀咗阿嫲養生濃湯鍋，呈奶白色，比較健康。肉類方面，必食澳洲和牛M5牛肩卷同埋安格斯牛小排，澳洲和牛M5牛肩卷油脂豐富，比例平均，牛味濃郁；安格斯牛小排肉質鮮嫩多汁，豐富大理石花紋，口感細緻。贈送嘅M9和牛牛丸一咬落去充滿肉汁，非常彈牙可口😋手打滑類亦非常出色，推介蟹籽墨汁漿同埋章魚珍珠漿。蟹籽墨汁漿入口富有彈，口感爽脆；章魚珍珠漿食到粒粒章魚肉，爽口彈牙。另外有一個自助區，可以揀選丸類、菜類、飯麵類、飲品同埋調味料。飲品除咗罐裝飲品，仲有自家製嘅洛神花茶、白桃烏龍等等。點擊圖片放大 +7
