前文提及左今次住既酒店既資料同埋第一日食既晚餐，有興趣可以上深圳尋歡記1-1 或者深圳尋歡記1-2 睇返啦～ 行程： 第一日 下晝搭火車去羅湖->6點到過完關搭地鐵去會展中心站->大約7點到食同順居北京菜館（等左15-20分鐘到入座）->買左杯奈雪之茶就返酒店CheckIN 第二日 2點酒店CheckOut ->搭地鐵去購物公園站食西貝筱面村 ->行左陣COCOPARK ->搭地鐵去皇崗返香港 第二日訓醒教就同朋友搭地鐵去購物公園站既cocopark食西貝啦，購物公園站都只係會展中心後一個站，2個商場相隔既地點都唔太遠，如果你地唔係好似大熊第一日咁夜到，有興趣都可以行埋過去cocopark睇下。 點擊圖片放大 COCOPARK呢個商場十分之大，相比起中心城，亦都較為新，而且好多網紅美食店都係呢個商場入面，例如樂凱撒、拾味館、撒椒、探魚、西西弗書店，又或者係喜茶同奈雪之茶呢到都有。我相信大家無聊假日無野做都可以係到hea成個下晝。而且呢到仲有波波池同繩網陣等，無論係3-8歲又或者係8-13歲既小朋友都可以係到玩下放下電，側邊亦都有唔少既工作人員睇住，不過每次玩既費用就係¥120, 價錢唔平，但相比起香港，可能要去有一啲camp或者報啲course先玩到。 今次黎到COCOPARK其實係想試食一下呢間話自己合埋眼點任何一樣野都咁好食既西貝筱面村。 地址： 福華三路星河COCO Park 商場三樓L 3s-011號鋪(購物公園站E出口) 營業時間： 週一至週五 11:00-14:30, 17:00-21:30 /週六至日 11:00-21:30 人均消費約：¥87/人 一入到黎成間鋪頭既主要裝修都以紅白為主色，廚房係半開放式既，可以清晰見到廚師煮野食，感覺都乾淨衛生。而且已經過左中午食飯時間，鋪店既人流都算多，大熊同朋友都等左一陣先入得去。 坐低左待應會放一樽茶係枱面，呢樽茶叫苦蕎茶，承惠每位6蚊。另外牆上有個QR code, 內地而家有好多網紅既餐廳以掃QR code 黎點菜，無網絡既朋友仔都唔洗擔心，好多商場或者店內都有Wi-Fi提供，方便大家點餐。不過除左QRcode點餐，我地都可以另外要求點菜紙點餐既。 今次我地2個人總共點左6樣野，分別係西貝面筋、酥皮肉夾膜、羊肉串、烤羊排、黃涼米糕同自製酸奶。 西貝面筋(¥36) 呢道菜差唔多係每枱客都必點既菜式，個醋汁調得岩岩好，唔太辣都唔太酸，而面條既口感似粉皮，成個菜拌完再食落去似我地食開既涼拌川菜，非常開胃。 酥皮肉夾膜(¥13) 呢個肉夾膜對我黎講係我暫時食過最好食既肉夾膜，個包黎到既時間仲係好熱，食落外酥內軟，加埋啲肉碎同配料，鹹味岩岩好亦都食到唔同配料既味道，唔會油膩，而且店員仲會好細心幫我地分開一半，方便食用，不過略為覺得餡少左啲。 羊肉串（4串起）(¥7/1) 每串分量都足料，肉粒係肥瘦相間，食落去味道嫩口同有好重既孜然味，但我就覺得仍然有陣臊味，唔係太接受到同好膩，淨低既都交哂比另一個鍾意食羊既朋友仔啦～ 烤羊排(¥118) 雖然菜式連爐一齊上但個爐全部都無人黎過點火，佢側邊都唔係平時開Gas爐嗰款，係蠟燭黎既。不過都冇阻我地食呢道菜，平身上黎既鐵板都非常之熱，洋蔥都仲係到bobobo咁。 食落口無羊串咁臊，肥瘦都分明，邊位略為有啲乾，個人應該比羊串好食，但都係覺得比較油膩，食左2舊就交左比朋友啦～ 黃涼米糕(¥39) 呢個米糕係用糯米同小米做既，內面夾住紅莓乾同提子乾，另外會比多個桂花蜜我地蘸。食落去口感十分軟糯同埋冰涼，味道甜甜酸酸咁，個人而言覺得非常之好食，食多幾舊都唔覺得膩，下次去會再點。 自製酸奶(¥12) 呢個酸奶係無味既，比平時食開既酸，但都重奶味，不過不失啦，如果要少許甜味可以問待應攞蜂蜜。其實上大眾點評啲人話會連蜂蜜一齊比，但我地今次食就無比到啦。 順帶一提，鋪內會有一個紅色雪櫃係比啲客覺得嗰道菜唔好食既擺入去，嗰道菜都唔會收你錢，晏少少啲廚師就會去試下道菜有咩問題再去改進。 整體黎講，其實大熊都唔係太食羊，因為覺得好臊，所以如果唔太食羊既你地我就唔建議去食啦。但如果西貝話自己連唔食羊既客人都會食呢句我都覺得太誇張啦，有啲係Okay可以接受既，不過佢大部分菜式都以羊為主，另有一兩款豬牛雞魚等。整體品質同味道都唔差，但可能口味既問題有啲唔係好食得慣，個人覺得最值得推薦既係西貝面筋、黃米涼糕同肉夾膜，有興趣既朋友仔都可以去試下，因為香港的確好少可可以食到西北菜既。
