Day 12 終於黎到今次旅程既尾聲,未黎之前好多人都話維也納其實玩2、3日都夠,如果唔係會好悶。但我相信好多人同我一樣,被「維也納」3個字吸引住,覺得會幾多野睇。 當真係到達時,其實市中心同廣東道真係分別不大,周圍都係名店,冇乜野好玩〜 但最後一日,黎到呢個音樂之都要睇下呢到既地標---維也納歌劇院 到達門口時,會有好多古裝人sale遊客買票睇歌劇,但我諗未必頂得住睇咁耐。於是我地只係參加左一個Guided tour,全程約45分鐘,最好係可以睇埋後台佈景,裡面真係好宏偉〜 點擊圖片放大 +3 之後我地就在附近如:hofburg palace...閒逛~ 由於今日係我生日,所以一早book左間過百年既餐廳Cafe Landtmann 食飯〜 呢度既環境真係好優雅,menu仲有介紹呢度歷史同埋有咩名人黎過。其實呢度最出名係食cake ,但我地叫得太多野食,最後都食唔到冇叫到,希望第二時有機會再食啦〜 Day 13 今日終於要返香港啦,因為下晝機關係,上午我地去埋最後一個景點-Upper Belvedere~ 不過入面其實同美泉宮冇乜分別,唔係我地杯茶,但總算消磨左d時間。 維也納機場都幾近市中心,駕車20分鐘就到。同埋還車過程都幾兒戲,泊返架車去停車場,有個職員完全冇check車就咁攞番鎖匙就走得。 上機前買手信先~~ 總結今次旅程真係好順利,捷克、奧地利真係好靚,但其實周邊好多地方都好吸引,可惜時間唔夠,如果唔係都想去埋十六湖、布達貝斯等地方,唯有當留小小遺憾,俾d動力自己下次再去啦!